Чунҫӳревҫӗсем Петӗр Хусанкай музейӗ умӗнче

Утӑ уйӑхӗн 4-мӗшӗнче тухса кайрӗҫ те ҫулҫӳревҫӗсем, паян, утӑн 9-мӗшӗнче, вӗсен чунҫӳревӗ вӗҫленчӗ. Чунҫӳрев-2010 чӑвашпа ҫыхӑннӑ нумай вырӑна ҫитсе курчӗ — Тикеш, Ешӗл (ку хулаша ҫавӑн пекех Элшел, Ишлӗ ятсемпе асӑнни тӗл пулать), Пӑлхар, Сӑвар, Пӳлер хулашӗсенче пулчӗҫ. Ҫавӑн пекех вӗсем Кӑнна Кушкинче тата Слакпуҫра концерт пачӗҫ; Ешӗл хулашӗнче юпа лартрӗҫ; Силпи ял вырӑнӗ ҫумӗнче ҫӗнӗ пура вырнаҫтарчӗҫ; «Шуҫӑм» ансамблӗ валли клип материалӗсем ӳкерчӗҫ; чӑвашӑн чылай чаплӑ ҫыннисен вил тӑприсем ҫине (Андриян Николаев, Митта Ваҫлейӗ, Энтри Турхан, Анатолий Миттов, Николай Ашмарин, Николай Никольский) ҫитсе вӗсене пуҫ тайрӗҫ; Валем Хуҫа ҫӑлкуҫӗнчи шывпа сапӑнчӗҫ; Пӳлерти киреметре чӑвашла ятсем йышӑнчӗҫ. Шӑрӑх ҫанталӑк та, малтанхи кун ҫунӑ ҫумӑр та вӗсене чармарӗ — палӑртнӑ ҫулпа вӗсем кайса килчӗҫех.

Чунҫӳревпе эсир «Чӑваш тӗнчи» сӑн галерейинче (сӑнсем кӑшт каярах пулӗҫ), «Чунҫӳрев-2010» (кунта кӗске кун кӗнеки пур) сайтра паллашма пултаратӑр.

Сӑнӳкерчӗксем

#Пӳлер, #Атӑлҫи Пӑлхарстан, #Сӑвар, #Пӑлхар, #Чӗмпӗр облаҫӗ, #Самар облаҫӗ, #Силпи, #Пушкӑртстан, #Тутарстан, #чунҫӳрев, #Шупашкар, #Слакпуҫ, #Ухинкел, #Кӑнна Кушки, #Валем Хуҫа