Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Пĕлетĕп сан ятна кăна,

Веçех ыйтса ĕлкĕреймерĕм.

Уй-шухăшна тата чунна

Юратупа эп кĕреймерĕм.

Куратпăр пĕр-пĕрне сайра,

Сăмах хушма пит вăтанатăп.

Сана курсассăн урамра

Асфальт çинче те такăнатăп.

Ăçта пурнатăн? Мĕн ĕçре?

Кампа пĕрле утса çӳретĕн?

Кампа эс çуллахи ире

Çак кунсенче кĕтсе илетĕн?

Мĕнле хăват, мĕнле магнит

Сан еннелле ялан туртать-ши?

Пĕлес килет-çке, чун савни:

Ăçта-ха сан килӳ ларать-ши?

Пĕр мăшăр куç — çут çăлтăрсем

Вут-хĕм сапса çунаççĕ камшăн?

Асра халь çук ытти хĕрсем,

Пуçра пĕр сăн — чĕре çунтармăш.

Анчах çитет кун пек чăтса.

Çыру урлах сана калатăп,

Чĕре çумне алла тытса:

«Сана саватăп. Юрататăп!»

Шырать ыйхă витĕр кăкăр

Тутипе те аллипе:

Çимелле çав унăн çăкăр

Паянтан, тата шӳрпе.

Çумĕнче ачан çук амăш,

Çывăрать унран инçе.

Тек пĕрле вĕсем выртаймĕç

Малашне тӳшек çинче.

Ача пĕчĕк, хуйхă пысăк:

Амăш памĕ кăкăрне.

Çавăнпах-тăр ĕнтĕ хытă

Макăрать çине-çинех.

Курăнаççĕ çăлтăр евĕр

Куççульсем ун куçĕнче.

Пысăк çав асапĕ-терчĕ

Çĕнĕ пурнăç умĕнче.

Шутлать куккук, шутлать,

Пурнан çулсен вĕçне.

Юлать, хыçа юлать:

Çул, уйăх, кун, эрне...

Иртет кун-çул, иртет,

Ир-каç та кăнтăрла.

Чунпа эс уй-хирте,

Ун сывлăшпе сывлан.

Çунса сӳнен çулсем.

Кашнийĕ — çухату...

Пурнас пулсан çĕнрен:

Тухатмăш — юрату...

Çĕклет вăл, ӳкерет.

Райра эс, тамăкра.

Кайран çеç ăс кĕрет.

Чăнах та чăваша...

Шутлать куккук, шутлать,

Иртен çулсен вĕçне.

Савни куççуль тăкать,

Чарас пек ун шутне...

Çут тĕнче тĕвĕленнĕ тĕлте йăвине çавăрать çамрăк кăмăл.

Пĕлĕтсен çийĕпе шăхăрса çӳреме эс пĕлсем: çăмăл-çăмăл!

Çăлтăртан тĕртсе тунă шăпа çаннипе хĕвеле сĕртĕнеп те

Пуçĕнчи пурçăн тутăр тĕсне ăнсăртран улăха ӳкеретĕп.

Кайăксем чыхăна-чыхăна тухăçа çухатаслăн тутанĕç,

Чи хитре чечексем савнăçне хĕвел май çавăрса чăмăртанĕç,

Туйăмсем ирĕке туртăнса сывлăмпа сывлама чĕнĕç-чĕнĕç,

Çĕрĕпе çывăрмасăр утсем выртмара юратушăн кĕçеннĕн.

Курăксен ир енне пăчăртаннă куççуль тупсăмне уçса парăп —

Телейӳ çуралас шанчăкпа çĕнĕ кун чĕрçине пырса ларĕ.

Шурăм пуç çăралса çĕкленсен именсе, хĕрелсе тытăн шухăш:

Пĕлĕтсен çийĕпе шăхăрса çӳрес килĕ манпа шуххăн-шуххăн!

Пĕррехинче пĕр ялтан сыватăша вăйсăр-вăйсăр та япăх çамрăк хĕрарăма илсе килеççĕ. Ку пахăр вырăн çине выртнă-выртманах çывăрса каять. Ирччен çывăрать, каçччен…. Сестрасем врачран хĕрарăма епле эмелемелле пирки калассине кĕтеççĕ. Анчах лешĕ шарламасть-ха.

— Николай Ильич! — чăтаймаççĕ сестрасем. — Ку хĕрарăма епле эмелсемпе чĕртмелле?

— Тăхтăр, хамах калăп, — тесе врач станционартан поликлиникăна тухса каять.

Виççĕмĕш кун çеç хĕрарăм вăранать, урисем çине тăрать, хăйне килне яма ыйтать.

— Куратăр-и, чĕрĕлчĕ! — кулкалать врач сестрасем умĕнче.

— А-а….?

— Йывăр ĕçре канмасăр, тăраниччен çывăрмасăр кунĕн-çĕрĕн ĕçлесе ĕшеннĕ вăл, — ăнлантарать врач. — Халĕ çывăрса тăранчĕ те, акă, «сывалчĕ». Килне яма та юрать ăна.

Пирвайхи хут сана курсан,

Шутларăм: «Акăш ку», — тесе.

Тепрехинче эс тĕл пулсан,

Йăл култăм эп, хĕпĕртесе.

Чĕкеç чĕппи иртен вĕçет

Кунран-кун вăйлăн, çӳлĕрех.

Ман юрату çаплах ӳсет,

Çурхи шыв шавĕ евĕрех.

Çулталăкра çут çуркунне

Килес çук иккĕ нихăçан.

Епле кĕрес сан чĕрӳне,

Ун çăрине епле уçас?

Пĕр çăлтăр çӳлĕ тӳпере

Куç хĕснĕ пек çиçет, çунать.

Сан куçă çăлтăр пек хитре,

Кунран-кун пăлхатать чуна.

Ма эс пăхмастăн ман çине?

Епле майпа-ши пăхтарас?

Чуна вырнаçнă пикене

Мĕнле хама юраттарас?

Каçар мана, хăмла пек симĕс куç.

Каçар! Сана куççуль кӳрес теменччĕ.

Хам юратма пĕлеймессе кĕтменччĕ.

Каçар мана, хăмла пек симĕс куç.

Каçар мана, хăмла пек симĕс куç

Ху килĕшсен, ытах, пиччу сан пулăп,

Е асăнти таçти ют çын пек юлăп.

Каçар мана, хăмла пек симĕс куç.

Чечек пекехчĕ эсĕ маншăн.

Çут тĕнчере санран хитри,

Санран çепĕçреххи пулманшăн,

Хавасчĕ эпĕ мĕн тери!

Черем сана кăна уятчĕ.

Эс килĕштертĕн теприне.

Кĕр çитрĕ те шантарчĕ-ячĕ,

Ытарайми чечексене...

Кĕрлерĕ туй. Ислетрĕ çумăр...

Пусартăм эпĕ чунăма.

Эс халь инке... Çапла пуль çулăр,

Темерĕм эп ют арăма.

Чĕнмерĕм нимĕн. Шеллемерĕм.

Çӳпçийĕ майĕн — хупăлчи,

Чечек çине — пиçен темерĕм...

Çапла пуль юрату тĕнчи.

Ку тĕнчере тĕссем те урăхла:

Кĕрен çилсем хăюллăн улăхра

Сенкер утсен кăтрисене тураççĕ —

Кĕрхи илем çуркуннене çураçнă.

Кунсем кĕме манаççĕ улахран.

Кунти каçсем çухалнă канăçра,

Ним юлмиччен хĕрелнĕ анăçра

Сар чечексем пĕрне-пĕри саваççĕ,

Саркаланса кĕписене хываççĕ...

Кунта — нихçан та çылăх пулмасла.

Ирсем кунта пылаклă тунсăх пек.

Ав тухăçран васка-васка тухать те

Хĕвел ачи, чĕри ытла çунать те,

Юратупа пылланнă сывлăма

Чĕркуçлене-чĕркуçлене ĕçет.

Ку тĕнчери тĕссем йăлт урăхла...

Атя, санпа çак тĕнчере юлатпăр:

Сап-сар чечек, хĕвел ачи пулатпăр,

Ирпе — улах, каçпа улах тăватпăр —

Ун пек çынсем нихçан пурăнмасла.

Манран хитре чечек курсан — кала...

Çуркуннепе хитре чечек сахал-им?

Шыран пулсан чи хитрине шыра...

Ăна хампа танлаштарса хакламăп:

Ӳсетĕп эп таса юханшывра,

Вăл — çĕр çинче. Кирек хăшне суйла.

Манран ачаш хĕвел тупсан — кала...

Эп çеç сана таса чунпа ăмсанăп,

Хура чунсем юратуран кулаççĕ...

Хура каçра хĕвел епле ачашлĕ?

Сире валли каçран кун тумалла —

Чӳречĕре çăватăп шуçăмла.

Пуçу çине телей çусан, кайран

Çӳл тӳпене тинкерĕн, тен, сайра:

Пин çăлтăртан пĕрнĕ çеç асăрхамăн.

Сана вара инçетлĕхре те манмăп:

Ман çакнашкал нумай пурăнмалла —

Телейӳне курса ялкăшмалла.

...Вижу я, что небо не богато,

А про землю стоит говорить

Н. Тихонов.

1960 — 1964 çулсем.

Хусан — Мускав — Ленинград — Шупашкар.