Олег Николаевӑн Инстаграмри страницинчен илнӗ сӑнӳкерчӗк

Килсӗр-ҫуртсӑр йытӑсем пирки тӗнче тетелӗнчи халӑх ушкӑнӗсенче пӗрмаях ҫыраҫҫӗ. Кӳкеҫсем те хуҫасӑр ҫав чӗрчунсенчен шикленеҫҫӗ. Йытӑсем кушаксене туртса ҫураҫҫӗ, ачасене хӑратаҫҫӗ, ҫынсене ҫыртаҫҫӗ тесе «Кугеси/Общественный совет» (чӑв. Кӳкеҫ/Общество канашӗ) пабликра вӗҫӗмех пӗлтереҫҫӗ.

Килсӗр-ҫуртсӑр йытӑсен нушине тӳре-шара та пӗлет. Чӑваш Ен Элтеперӗ Олег Николаев, ав, кун пирки Инстаграмри хӑйӗн странцинче ҫырнӑ. Вӑл хыпарланӑ тӑрӑх, Ҫӗмӗрлере хуҫасӑр йытӑсене тытма 150 вырӑнлӑх приют уҫасшӑн. Анчах ун валли малтанласа укҫа пӑхса хӑвармалла.

Хальхи вӑхӑтра ун пек приютсем Шупашкарта (унта 350-500 чӗрчуна пӗр харӑс усрама май пур) тата Кӳкеҫре (150 вырӑнлӑх) пур.

Ҫӗмӗрлери моргӑн проекчӗ

Чӑваш Енри закупкӑсен регионаллӑ центрта вырнаҫтарнӑ аукцион тӑрӑх ҫулталӑк вӗҫлениччен Ҫӗмӗрлере судпа медицина экспертизин ҫӗнӗ пӗр хутлӑ ҫуртне туса лартмалла. Строительство хакӗ 25 млн 440 пин тенкӗпе танлашать. Аукциона нарӑсӑн 17-мӗшӗнче пӗтӗмлетӗҫ.

Ҫӗнӗ морг кивӗ ҫурт вырӑнне йышӑнӗ, ӑна кӑҫалхи ака уйӑхӗ тӗлне илсе сӳтсе пӗтермелле. Малтанхи пекех вӑл Ҫӗмӗрле районӗн тӗп пульницин лаптӑкӗнче вырнаҫӗ.

«Ҫыхӑнура» портал асаилтернӗ тӑрӑх, ҫӗнелнӗ судмедэкспертиза ҫурчӗсем пӗлтӗр Куславккара тата Вӑрнарта ӗҫлеме пуҫланӑ. Куславккара морг 2012 ҫултанпа пулман, Вӑрнарта вара 2015 ҫултанпа ӗҫлемен.

cap.ru сӑнӳкерчӗкӗ

Чӑваш Енре кӑшӑлвирус сарӑлнаран массӑллӑ мӗнпур мероприятие ирттерме чарнӑ. Ку урамра иртекеннисене те пырса тивет. Ҫапла йышӑннӑ оперштаб ларӑвӗнче.

"Хӑрушсӑрлӑх мерисемпе тивӗҫтерме пултарайман йӗркелӳҫӗсене массӑллӑ мероприятисене ирттерме чармалла" - ҫапла палӑртнӑ оперштабра. Аса илтерер: кафесенче те корпоративсемпе банкетсем ирттерме юрамасть.

Сӑмах май, кӑшӑлвируспа чирлекенсем нумай пулнӑран "Раҫҫей йӗлтӗр йӗрӗ" ӑмӑртӑва каярах вӑхӑта куҫарма йышӑннине пӗлтернӗччӗ.

Чӑваш Енри юсанмалли учрежденисенче ҫулсерен «Снежные фантазии» («Юр тӗлӗнтермӗшӗ») ятпа чи лайӑх хӗллехи кӳлепесен конкурсӗ иртет. Раҫҫей УФСИН-ӗн Чӑваш Енри уйрӑмӗнче вӗсене пӑхӑнакан мӗнпур учрежденийӗсен хушшинче конкурса пӗтӗмлетнӗ.

Кӳлепесене ӑсталанӑ чухне Ҫӗнӗ ҫул уявне анлӑ сӑнлани уҫӑмлӑ курӑннӑ, унӑн тӗп сӑнарӗ тигр пулса тӑнӑ. Ҫӗнтерӳҫӗсемпе призерсене эксперт комиссийӗ палӑртнӑ, вӑл кӳлепесене хӑйне евӗрлӗ ӑсталанине, пултарулӑха, ӗҫ кӑткӑслӑхне тата кӳлепесене мӗнлерех эрешленине хакланӑ.

«Конкурса тӑратнӑ кӳлепесене пурне те тӑрӑшса пурнӑҫланӑ май, вӗсене конкурс палӑртнӑ тематикӑпа ӑсталанине шута илсе, чи лайӑх композицие суйласа илме ҫӑмӑл пулмарӗ», — палӑртнӑ айӑпланнӑ ҫынсене воспитани тата социаллӑ ӗҫпе тивӗҫтерекен пай пуҫлӑхӗ Петр Рожнов.

Эксперт комиссийӗ палӑртнӑ тӑрӑх, конкурса тӑратнӑ кӳлепесене йӗркеленӗ май ытларахӑшӗ Ҫӗнӗ ҫул чӑрӑшне илемлетмелли капӑрлӑхсемпе тата сӑрӑсемпе анлӑн усӑ курнӑ.

Айӑпланнисен хушшинче ирттерекен ӑмӑрту вӗсен пултарулӑхне палӑртма, обществӑлла активлӑ пурнӑҫпа пурӑнма тата пушӑ вӑхӑта, уйрӑмах уяв тата ҫӗнӗ ҫул кунӗсенче тивӗҫлӗ шайра йӗркелеме май парать.

Малалла...

cap.ru сайтран илнӗ сӑн

Йӗпреҫ районӗн вулавӑш системине кӗрекен тӗп библиотекӑра «Чӑваш ҫӗрӗн мухтавлӑ ҫыннисем» кӗнекесен куравӗ уҫӑлнӑ. Ӑна республикӑра кӑҫал ирттерекен Мухтавлӑ ентешсен ҫулталӑкне халалласа йӗркеленӗ.

Вулавӑша ҫӳрекенсем Чӑваш Ене чапа кӑларнӑ ҫынсем пирки ҫрнӑ материалсемпе паллашма пултарӗҫ. Пресс-релизра пӗлтернӗ тӑрӑх, кунта ҫыравҫӑсем, музыкантсем, театр деятелӗсем ҫинчен кӑна мар, ҫавӑн пекех спортсменсем, халӑх ӑстисем тата ытти ҫынсем пирки те пӗлме пулать.

Куравра «Чӑваш Республикин Президенчӗн библиотеки» кӗнеке ярӑмӗ паллӑ вырӑн йышӑнать, вӑл Чӑваш Енӗн 11 паллӑ ҫыннин пурнӑҫне тӗплӗн уҫса парать.

Уйрӑм кӗтес Йӗпреҫ районӗнче ҫуралса ӳснӗ ҫынсене валли уйӑрса панӑ. Курава килекенсем Чӑваш халӑх поэчӗпе Ҫемен Элкерпе, Социализмла ӗҫ Геройӗпе Антон Шордеевпа, Раҫҫей Паттӑрӗпе Леонид Константиновпа тата ыттисемпе тӗплӗнрех паллашма пултарӗҫ.

Йӗпреҫ районӗн пресс-служби пӗлтернӗ тӑрӑх, асӑннӑ курав ҫулталӑк тӑршшӗпе ӗҫлӗ.

alatvesti.ru сайтри сӑн

Чӑваш Енре санавиаци вертолечӗ пациентсене пульницӑна часрах пульницӑна илсе ҫитерме пулӑшать. Кӑҫал вӑл нарӑс уйӑхӗн варринчен вӗҫме тытӑнӗ.

Хальхинче те килӗшӗве «Вырӑс вертолет тытӑмӗсем» обществӑпа алӑ пуснӑ. Кӑҫал ӑна санавиацишӗн 35,9 миллион тенкӗ парӗҫ. ЧР Сывлӑх сыхлавӗн министерстви пӗлтернӗ тӑрӑх, ҫулталӑк вӗҫлениччен сахалтан та 59 хутчен вӗҫме палӑртнӑ. Перекетлеме май пулсан 85 вӗҫев пулӗ.

Сӑмах май, пӗлтӗр санавиацишӗн 45,9 миллион тенкӗ тӳленӗ. Ку укҫапа 53 вӗҫев тума палӑртнӑ. Анчах пирӗн республика пӗчӗк пулнине кура перекетлеме май килнӗ, 109 хутчен вӗҫеве тухнӑ.

cap.ru сӑнӳкерчӗкӗ

Чӑваш Енре пурӑнакансенчен пӗр пайне муниципалитетсенче епле ӗҫлени тивӗҫтермест.

Виҫӗ районта тата пӗр хулара: Вӑрнар, Муркаш, Ҫӗрпӳ районӗсенче тата Ҫӗнӗ Шупашкарта — сӑнавлӑ майпа инвестици профилӗсене хатӗрленӗ. Ҫавна май халӑхра ыйтӑм йӗркеленӗ. «Что жители больше всего ценят в своих муниципальных образованиях?» (чӑв. Хӑйсен муниципалитет пӗрлешӗвӗсенче ҫынсем пуринчен ытла мӗне хаклаҫҫӗ) ыйтӑва хуравлакансенчен час-часах тӗл пулакан хурав ҫапларах янӑранӑ: «НИМЕ ТЕ».

«Ку вӑл пире шухӑша ямалли тата хамӑр стратегие юсамалли сӑлтав. Енчен эпир мӗн пуррине хакламастпӑр, ӑнланмастпӑр пулсан, эпир малалла каяймӑпӑр». Ҫапларах шухӑшлать республика Элтеперӗ. Кун пирки Олег Николаев Инвестици тата предпринимательлӗх хастарлӑхне сарассипе ӗҫлекен республикӑри координаци канашӗн ларӑвӗнче палӑртса хӑварнӑ.

cap.ru сӑнӳкерчӗкӗ

«Чӑваш Республикинчи чи лайӑх ҫамрӑк учёнӑй» X республика конкурсӗн ҫӗнтерӳҫисене палӑртнӑ.

Естествӑлла наукӑсем енӗпе ӗҫлекен ҫамрӑк ӑсчахсенчен И.Н. Ульянов ячӗллӗ ЧПУн органика тата фармаци химийӗн кафедрин доценчӗ Сергей Федосеев ҫӗнтернӗ, техника науки енӗпе тӑрӑшакансенчен — «ВНИИР-Прогресс» обществӑн лаборатори пуҫлӑхӗ Олег Митрофанов, социогуманитари енӗпе — И.Н. Ульянов ячӗллӗ ЧПУри патшалӑх тата муниципалитет управленийӗн тата регион экономикин кафедрин аслӑ преподавателӗ Инесса Васильева, медицина енӗпе — Республикӑн кардиодиспансерӗн тӗп врачӗн хирурги енӗпе ӗҫлекен ҫумӗ Николай Трофимов, педагогика енӗпе — И.Я. Яковлев ячӗллӗ ЧППУри шкул ҫулне ҫитменнисен пӗлӗвӗн тата сервис кафедрин доценчӗ Анастасия Николаева, экономика енӗпе — Чӑваш патшалӑх аграри университечӗн финанс тата кредит кафедрин доценчӗ Артур Семёнов. Чи лайӑх ҫамрӑк учёнӑй-тӗпчевҫӗ тесе И.Н. Ульянов ячӗллӗ ЧПУри электрика тата электрон аппаратсен кафедрин преподавателӗ Виктор Петров тесе йышӑннӑ.

Республика хыснинчен икӗ хаҫата пулӑшу памашкӑн укҫа уйӑрнӑ. Вӗсем – «Советская Чувашия» тата «Грани» хаҫатсем. Ку хушӑва кӑрлач уйӑхӗн 31-мӗшӗнче ЧР Министрсен Кабинечӗ Председателӗ Олег Николаев алӑ пуснӑ.

Ҫӗнӗ Шупашкарта тухса тӑракан «Грани» кӑларӑма кӑҫал 2 миллион та 129 пин тенкӗ панӑ. Республика шайӗнчи «Советская Чувашия» хаҫата 5 миллион та 560 пин тенкӗ лекнӗ.

Ҫак кӑларӑмсем кашни ҫулах пулӑшӑва тивӗҫеҫҫӗ. Пӗлтӗр, сӑмахран, «Советская Чувашия» хаҫата 5 миллион та 290 пин тенкӗ панӑ, «Грани» хаҫата – 2 миллион та 50 пин тенкӗ.

cap.ru сӑнӳкерчӗкӗ

Кӑшӑлвирус ҫӗнӗ вӑйпа сарӑлма тӑтӑннӑран социаллӑ пулӑшу паракан учрежденисем изоляци режимӗпе ӗҫлеме тытӑннӑ. Унта ӗҫлекенсем икӗ эрне хупӑ режимпа ӗҫлӗҫ, ниҫта та тухса ҫӳремӗҫ.

ЧР Ӗҫлев министерстви пӗлтернӗ тӑрӑх, республикӑри 6 психоневрологи интерначӗ, 1 ача ҫурчӗ, 3 ваттисен тата сусӑрсен ҫурчӗ, социаллӑ пулӑшу паракан 7 стационар уйрӑмӗ ҫак режимпа ӗҫлӗ. Пӗтӗмпе – 17 учреждени. Унти ӗҫченсем ӗҫе кӗриччен ПЦР-тест панӑ.

Изоляци режимӗпе ӗҫлекенсене ятарлӑ тӳлев парӗҫ.