chfila.ru сайтран илнӗ скриншот

Чӑваш патшалӑх филармонийӗн директорӗ пулма Максим Матросова шаннӑ. Йышӑнӑва республика ертӳҫи Олег Николаев ӗнер, утӑ уйӑхӗн 12-мӗшӗнче, алӑ пуснӑ. Документа республикӑн влаҫ органӗсен официаллӑ порталӗнче вырнаҫтарнӑ.

Филармонире илемлӗх ертӳҫи пулса Николай Казаков тӑрӑшать.

Максим Юрьевичӑн заместителӗсем иккӗн: Татьяна Фролова пӗтӗмӗшле ыйтусемпе ӗҫлет, Ирина Фролова – экономика тата финанс енӗпе.

u-f.ru сайтри сӑн

2020 ҫулхи кӑрлач уйӑхӗнче Шӑмӑршӑ район администрацийӗн вырӑнти ҫулсене пӑхса тӑнӑшӑн укҫа тӳлемелле пулнӑ. Анчах подрядчик укҫа-тенке кӗтсе илейменнипе суда тавӑҫ тӑратнӑ.

Суд ыйтӑва татса панӑ. Район администрацийӗн ӗҫшӗн кӑна мар укҫа тӳлеме тивӗ. Унӑн вӑхӑтра тӳлеменшӗн те нухрат кӑларса хумалла.

Ведомство палӑртнӑ тӑрӑх, подрядчике укҫа вӑхӑтра тӳлеменшӗн район администрацийӗн пуҫлӑхӗ айӑплӑ. Кунпа суд та килӗшнӗ. Пуҫлӑха хыснана 484 пин тенкӗ тавӑрса памалла тунӑ.

cap.ru сӑнӳкерчӗкӗ

Пӑрачкав районӗнчи Напольное салинчи Николай Васильевичпа Екатерина Николаевна Куманейкинсем 70 ытла ҫул пӗрле пурӑнаҫҫӗ. Нумаях пулмасть вӗсене "Юратупа шанчӑклӑхшӑн" медальпе чысланӑ.

Мӑшӑр 4 ачана ура ҫине тӑратнӑ. Халӗ вӗсем мӑнукӗсемпе, вӗсен ачисемпе киленсе пурӑнаҫҫӗ.

Сӑмах май, Ҫемье, юрату тата шанчӑклӑх кунӗнче 25 ҫул ытла пӗрле пурӑнакан мӑшӑрсене ҫак медальпе чысланӑ.

www.cap.ru сӑнӳкерчӗкӗ

Кӑҫалхи авӑн уйӑхӗнче пирӗн республикӑри 3 пин ытла ача ҫулҫӳреве тухса кайӗ. Вӗсем Чӑваш Енпе паллашӗҫ.

Пирӗн республика шкул ачисем хушшинче туризма аталантармалли ҫӗнӗ программӑна кӗнӗ. Унта ҫӗршыври 18 регион лекнӗ.

Турсене 5-9 классенче вӗренекен ачасем валли йӗркелӗҫ. Ҫул ҫӳреме республика тата федераци хыснисенчен 22 миллион тенкӗ уйӑрса парӗҫ.

Экскурси турӗсем вӑхӑтӗнче хӗрачасемпе арҫын ачасем республикӑри паллӑ вырӑнсемпе паллашӗҫ. Ҫула тухсан апатланнӑшӑн, трансфершӑн, «виҫӗ ҫӑлтӑрлӑ» е унтан та чаплӑрах хӑна ҫурчӗсенче ҫӗр каҫнӑшӑн ачасен тӑкакланма тивмӗ.

mordovmedia.ru сайтри сӑн

Шупашкарта пурӑнакан 37 ҫулти хӗрарӑм Адлер хулинчи отельшӗн укҫа маларах тӳлесе хурас тенӗ те ултавҫӑсен тӗлне лекнӗ.

Хӗрарӑм отелӗн сайтне кӗнӗ. Унти каҫӑ ҫине пусса банк карттин реквизичӗсене ҫырнӑ. Унӑн счечӗ ҫинчен 43 пин тенкӗ илнӗ.

Хӗрарӑм кун хыҫҫӑн тин иккӗленме тытӑннӑ. Вӑл сайт адресне лайӑхрах тишкернӗ, ӑна хӑҫан йӗркеленине курнӑ. Отеле шӑнкӑравланӑ та унӑн иккӗленӳ юлман: укҫа унӑн счечӗ ҫинчен куҫман. Хӗрарӑм кун пирки полицие пӗлтернӗ.

Кун тӗлӗшпе пуҫиле ӗҫ пуҫарнӑ.

httppro-dachnikov.com сайтри сӑн

Ҫӗртме уйӑхӗн 3-мӗшӗнче Муркаш районӗнчи Кӗрекаҫ ялӗ ҫывӑхӗнче 80 ҫулти старик ҫухалнӑ. Вӑл хурӑн ҫырли пуҫтарма кайнӑ. Тӑванӗсем ӑна тупма пулӑшнӑ полицейскисене - Александр Суворова, Алексей Васильева тата Любовь Павловӑна - тав тунӑ.

Ҫав кун старике малтан мӑшӑрӗ темиҫе сехет шыранӑ. Тупайманнипе 112 номерпе шӑнкӑравланӑ.

Йӗрке хуралҫисем вырӑна ҫитсе тавралӑхра шырама пуҫланӑ. Вӗсӗм старике 1 сехетре тупнӑ. Ватӑскер халтан кайнӑ.

Хӗрлӗ Чутай районӗнче пурӑнакан 22 ҫулти хӗрарӑм хырӑмӗ касса ыратма пуҫласан васкавлӑ медпалӑшу чӗнмен. Вӑл виҫҫӗмӗш ачине кӗтнӗ те, ку суя паллӑ пулаяссине чухланӑ.

Анчах хырӑмӗ ыратма чарӑнман. Пушшех те, тата вӑйлӑрах ыратма пуҫланӑ. Вара тин вӑл тухтӑрсене чӗнме шутланӑ.

Медпулӑшу машинипе Шупашкарти президент пепкелӗх центрне кайнӑ чухне ҫул ҫинче хайхискер ҫуратма пуҫланӑ. Темиҫе минутран Людмила Жижайкина тата Евгений Козлов фельдшерсем алӑра сывӑ арҫын ачана тытнӑ. Ҫапла пепке Ҫемье, юратупа шанчӑклӑх кунӗнче ҫуралнӑ.

Ӗнер 13 сехет хыҫҫӑн Атӑл леш енчи вӑрманта, Шупашкар лесничествинче, пушар пулнӑ. Ҫулӑм аҫа ҫапнӑран тухнӑ.

Ҫулӑм мӗн чухлӗ лаптӑк ҫинче алхаснине пӗлтермен.

Ку кӑҫал Атӑл леш енчи вӑрманта пулнӑ пӗрремӗш пушар мар. Ҫӗртме уйӑхӗнче те унта ҫӗр ҫинчи ҫӗрӗк ҫуннӑ. Ун чухне, пушарнӑйсем палӑртнӑ тӑрӑх, ку ҫулӑмпа асӑрханмасӑр усӑ курнӑран пулнӑ.

https://zen.yandex.ru/media/id/ сӑнӳкерчӗкӗ

Паян – Пӗтӗм Раҫҫейри ҫемье, юрату тата шанчӑклӑх кунӗ. Ҫав ятпа республика Элтеперӗ Олег Николаев саламланӑ.

«Ҫемье – сывӑ обществӑпа вӑйлӑ патшалӑхӑн никӗсӗ. Шӑпах ҫемьере эпир юратупа тӑрӑшулӑх, ӑнланупа пулӑшу витӗмне туйса ҫитӗнетпӗр, чи кирли – пурнӑҫ ҫулӗпе хамӑр тӗллӗн утма пил илетпӗр», – тенӗ республикӑн влаҫ органӗсен официаллӑ порталӗнче вырнаҫтарнӑ саламра.

Ҫавӑн пекех Олег Николаев «ҫемье ӑс-хакӑл ҫӑл куҫӗ тата чӑваш халӑхӗн пуян культурипе йӑли-йӗркине, ӗҫри ӑсталӑхне ламран лама куҫарса пыма, ҫирӗп сывлӑхлӑ, пур енлӗн аталаннӑ ҫынна, гражданина тата ҫӗршыв патриотне пӑхса ҫитӗнтерме пулӑшакан шанчӑклӑ хунтӑ пулнӑ май, патшалӑх политикин улшӑнми тӗп ҫул-йӗрӗ пулнӑ та, пулать те», – тесе каланӑ.

Яндекс.дзен сайтри сӑн

Чӑваш Енре ачасем ҫӳллӗшӗнчен ӳкнӗ тӗслӗхсем нумайланнӑ. Юлашки кунсенче Республикӑри ача-пӑча клиника пульницин реанимаци уйрӑмне 8-ти тата 10 ҫулти ачасем лекнӗ.

Пӗри 5-мӗш хутран ӳкнӗ. Ача пуҫне, ҫурӑм шӑммине амантнӑ. Вӑл килте аппӑшӗпе ҫеҫ пулни паллӑ.

Тепри 2-мӗш хутран персе аннӑ. Вӑл та вӑйлах аманнӑ. Тухтӑрсем унӑн пурнӑҫӗшӗн 3 сехет ҫурӑ кӗрешнӗ.

Тухтӑрсем каланӑ тӑрӑх, ҫӳллӗшӗнчен ӳкнӗ ачасен 90-95 проценчӗ реанимацие лекет. Кӑҫал 14 шӑпӑрлан ҫӳллӗшӗнчен ӳкнӗ. Телее, пурте чӗрех.