Чӑваш Енре Промышленниксен клубне йӗркелесшӗн. Ку шухӑша республика Элтеперӗ Олег Николаев та ырланӑ.
Промышленниксен клубне йӗркелес ыйтӑва Ҫӗнӗ Шупашкарта иртнӗ канашлура сӳтсе явнӑ. Унта хулан экономикине йӗркелекен тата бюджета самай укҫа хывакан пысӑк предприятисен пуҫлӑхӗсем пуҫтарӑннӑ. Асӑннӑ предприятисенче 8 378 ҫын ӗҫлет, ҫав организацисен пӗтӗмӗшле тупӑшӗ 41,1 миллиард тенкӗрен иртет-мӗн.
Чӑваш Ен Иранпа электроэнергетика сфери енӗпе килӗштерсе ӗҫлесшӗн. Кун пирки республика Элтеперӗ Олег Николаев тата Иран ҫӗршывӗн Хусанти тӗп консулӗ Давуд Мирзахани сӳтсе явнӑ.
«Эпир регионӑн, кунти предприятисен хӑвачӗпе паллашма килсе ҫитрӗмӗр. Электроэнергетика сферинче пӗрлехи проектсене пурнӑҫа кӗртес е оборудованипе тивӗҫтерес ӗмӗтлӗ эпир», – тенӗ Давуд Мирзахани. Сӑмах электричество щичӗсем пирки пырать.
«Электротехника кластерӗн предприятийӗсем пирӗн 200-е яхӑн. Вӗсем генераци станцийӗсем, атом, гидро-, ӑшӑ электростанцийӗсем валли оборудовани туса кӑлараҫҫӗ. Тӗнчери ҫак сферӑри компанисемшӗн те вӗсем конкурент пулса тӑраҫҫӗ», – каласа кӑтартнӑ хӑнана Олег Николаев.
Чӑваш Енри колонисенчен пӗринче айӑплав вӑхӑтне ирттерекенсем пушмак ҫӗлеҫҫӗ. Берцы ятлӑ ура тӑхӑнмали япалана 9-мӗш колонире ҫӗлеҫҫӗ.
Пушмака арҫынсем икӗ цехра хатӗрлеҫҫӗ. Пӗринче ӗҫлекен бригада кирлӗ пайсене касса кӑларса ҫӗлесе хатӗрлет, тепринче пушмака кирлӗ формӑпа хатӗрлесе ҫитереҫҫӗ.
Чӑваш Енри тӗрмесенче ларакансем, сӑмах май каласан, сӗтел-пукан та туса кӑлараҫҫӗ, ял хуҫалӑх продукцине туса илсе тирпейлеҫҫӗ, ттимӗр-тӑмӑр, йывӑҫ-чус, ҫӗвӗ производствинче ӗҫлеҫҫӗ.
вашской колонии шьют берцы
Чӑваш Енри агропромышленность комплексӗнче туса илекен продукци тӗнчипех ӑсаннине эпир унччен пӗлтернӗччӗ-ха.
Аса илтерер: Чӑваш Ен продукцийӗн пысӑк пайӗ Польшӑна (мӗнпур экспортран 33,8%), Китая (24,6%), Германие (9,3%), Сербие (6,8%), Таджикистана (4,3%), Белоруссие (4,3%) каять. Унсӑр пуҫне Монголи, Туркменистан, Израиль, Молдави, АПШ, Таджикистан, Йемен, Канада, Ирак, Азербайджан туянать.
Чӑваш Ен ытти ҫӗршывпа та килӗштерсе ӗҫлесшӗн. Кунти предприятисем хӑйсен таварне Великобритание тата Ҫурҫӗр Ирландие, Вьетнама, Дание, Индонезие, Кубӑна, Таиланда ӑсатасшӑн. Ку ыйтӑва нумаях пулмасть ют ҫӗршывсенчи Раҫҫей пайташӗсем Чӑваш Енри ӗҫлӗ ҫынсемпе сӳтсе явнӑ.
Ҫывӑх вӑхӑтра пирӗн ҫӗршывра йӑлара усӑ курмалли хатӗр-хӗтӗр тата электроника хакланасси пирки систереҫҫӗ.
Телеграмри «Чебоксары в курсе» каналта пӗлтернӗ тӑрӑх, хаксем ҫывӑх вӑхӑтра 10-15 процент ӳссе кайӗҫ. Ҫакӑ ноутбуксене, планшетсемпе смартфонсене уйрӑмах пырса тивӗ. Хак хӑпарни тенкӗ хӑй хакне ҫухатнипе ҫыхӑннӑ.
Хуласенчи лавккасенче хаксене ҫитес эрнере ылмаштарма тытӑнӗҫ.
Ҫӗнӗ ҫӑмӑл автомашинӑсем ҫулла тата кӗркунне 5-10 процент хакланӗҫ. Ҫакӑ та ҫӗртме уйӑхӗнченпе Раҫҫей валюти хӑй хакне ҫухатнипе ҫыхӑннӑ. Ҫавна май ют ҫӗршывран килекен саппас пайсен тата автомобильсен хакӗ ӳссе кайӗ.
Чӑваш Енре туса илекен продукци ҫине мӗншӗн ют чӗлхепе ҫыраҫҫӗ? Ҫакӑн пек пост пичетленӗ Телеграмри каналсенчен пӗринче. Ку ыйтӑва асӑннӑ канала вулакансенчен пӗри хускатнӑ.
«Почему у нас в Чувашии пишут на иностранном языке? Производитель Чув элеватор» (чӑв. Мӗншӗн пирӗн Чӑваш Енре ют чӗлхепе ҫыраҫҫӗ? Производителӗ Чӑваш элеваторӗ), — ҫырса хунӑ ҫав постра. Кунта сӑмах Шупашкарти элеватор пирки пырать.
Асӑннӑ поста вуланисене ку ыйту тӗлӗнтермеллипех тӗлӗнтернӗ. Асӑннӑ продукцие Казахстана ӑсатаҫҫӗ, ҫавӑнпа унти чӗлхепе ҫырни йӗркеллӗ пулӑм. Канала вуласа тӑракансем палӑртнӑ тӑрӑх, «Акконд» кондитер фабрики, ав, китай чӗлхипе те ҫырать, мӗншӗн тесен продукцие унта ӑсатаҫҫӗ.
Чӑвӑш Ен Узбекистана ҫӑнӑх ӑсатни пирки тахҫан сайтра хыпарланӑччӗ. Аса илтерер: машинӑсене кӑҫал нарӑс уйӑхӗнче ҫула янӑ. Ҫак кунсенче ҫав ҫӗршыва тепӗр парти янӑ.
«Чӑвашҫӑкӑрпродукт» АО Узбекистана ҫӑкӑр пӗҫермелли пысӑк сортлӑ ҫӑнӑх тата пӗтӗмӗшле усӑ курмалли ҫӑнӑх ӑсатнӑ.
ЧР Ял хуҫалӑх министерстви пӗлтернӗ тӑрӑх, «Чӑвашҫӑкӑрпродукт» предприяти ҫӑнӑха Таджикистана тата Афганистана ӑсатма тытӑнасшӑн.
Рейтингри 85 регионтан Чӑваш Ен пурлӑх шайӗ енчен 73-мӗш йӗркене йышӑннӑ. «PROГород» кӑларӑм шухӑшланӑ тӑрӑх, пирӗн республикӑра пурнӑҫ шайӗ чакса пырать. 2022 ҫулхи кӑтартӑва илсен, халӑхӑн 14,8 проценчӗ чухӑн пурӑнать.
Асӑннӑ кӑларӑм Шупашкарта пурӑнакансене пурӑнма мӗн чухлӗ укҫа кирлипе хула ҫыннисемпе калаҫнӑ май кӑсӑкланнӑ.
«Укҫа нумай кирлӗ мар. Ертӳҫӗсен коррупципе сахалтарах ҫыхланмалла. Манӑн ачасем алла диплом илсенех Чӑваш Енрен тухса кайрӗҫ. Шалу пӗчӗк, малашлӑхлӑ ӗҫ вырӑнӗсене е пысӑк ҫынсен тӑванӗсем йышӑннӑ, е хӑваласа кӑларса яма май ҫуккисем», — тесе шухӑшлать иккен, сӑмахран, Сергей Ежов.
Пуҫа ытларах ӗҫлеттермелле, чӗлхепе нумай калаҫатпӑр текен те пулнӑ.
Раҫҫейре «Марка» АУ «Тӑван ҫӗшывра утса кӑларнӑ строительство техники» маркӑсен серине кӑларнӑ. Унта Шупашкарти «Промтрактор» туса кӑларакан ЧЕТРА ПК12 погрузчике те сӑнланӑ.
Палӑртмалла: ЧЕТРА ПК12 погрузчик Раҫҫейре кустӑрмаллӑ погрузчиксен йышӗнче чи вӑйли шутланать.
Сӑмах май, «Промтрактор» продукцийӗ унччен те почта маркисем ҫине лекнӗ. 2021 ҫулхи кӗркунне ЧЕТРА Т40 бульдозера сӑнланӑ.
Паян Ҫӗнӗ Шупашкарта "Звениговский" тулли мар яваплӑ обществӑн предприятийӗ уҫӑлнӑ. Унта 120 ҫын валли ӗҫ вырӑнӗ пулӗ.
Предприятире аш-какай тирпейлемелли, ҫурмафабрикатсем тумалли, кондитер тата ҫӑкӑр-булка пӗҫермелли цехсем пур.
Хальлӗхе пӗр талӑкра 40 тонна продукци туса кӑлараҫҫӗ. Малашне ку виҫене 100 тонна таран ҫитересшӗн.
+15.3 °C