«Рейтинг» информаци агентстви Раҫҫейре пурӑнакан ҫемьесен тупӑшне тишкернӗ. Мӗнпур вычета шута илсен Чӑваш Енри пӗр ачаллӑ ҫемьен уйӑхри вӑтам тупӑшӗ 26 496 тенкӗ юлать. Икӗ ачаллӑ ҫӗмьесенче вӑтамран 15 484 тенкӗ юлать. Ку кӑтартупа пирӗн республика ҫӗршывра 55-мӗш вырӑн йышӑнать. Вӑл енӗпе вӑл Крымран, Мари Элтан, Мордва Республикинчен, Чӗмпӗр облаҫӗнчен тата ытти хӑш-пӗр субъектран иртейнӗ.
2019 ҫулхи ҫав танлаштарӑмра Ямал-Ненецк автономи округӗ чи малта. Унта мӗнпур вычет хыҫҫӑн пӗр ачаллӑ ҫемьесен тупӑшӗ 101,6 пин тенкӗпе танлашнине шутласа кӑларнӑ. Иккӗмӗш тата виҫҫӗмӗш вырӑнсенчеи – Сахалин облаҫӗ (86,2 пин тенкӗ) тата Мускав (76,1 пин тенкӗ).
Шупашкар хула администрацийӗ пассажирсене хулари икӗ маршрутпа турттаракансене шырать. Кӑмӑл пуррисен заявкисене ҫӗртме уйӑхӗн 23-мӗшӗччен йышӑнӗҫ, вӗсене ҫӗртмен 25-мӗшӗнче суйласа илӗҫ.
20-мӗш номерлӗ маршрутпа контракта тӑхӑр ҫуллӑха алӑ пусӗҫ, 7-мӗш маршрутпа – ҫулталӑклӑха.
«Нефтебаза – Шупашкарти аш-какай комбиначӗ» 20-мӗш номерлӗ маршрутпа тӑвата пӗчӗк автобус ҫӳремелле, пӗрре саппас пулмалла. Эрне варринче маршрут тӳррӗн 41-мӗш рейс пурнӑҫламалла, каялла кайнӑ чух – 40; канмалли кунсемпе уявсенче – вуншар.
«Алькеш – Энергетиксен поселокӗ» 7-мӗш номерлӗ маршрутпа пӗчӗк 9 автобусран кая мар, анчӑх 10-ран ытла мар ҫӳремелле, саппасра 1 транспорт пулмалла. Ӗҫ кунӗсенче 60 рейс тумалла, канмалли кунсемпе уявсенче – 30-шар.
20-мӗш маршрутпа илсе ҫӳрекене хула мэрийӗ 4,5 миллион тенкӗ тӳлеме хатӗр, 7-мӗш маршрутшӑн – 269,6 пин тенкӗ.
Республикӑра ача-пӑча уйлӑхӗсем кӑҫал утӑ уйӑхӗн 1-мӗшӗнчен ӗҫлеме тытӑнӗҫ. Кӑштах улшӑнусем пулӗҫ: сменӑсем кӗскелӗҫ, ашшӗ-амӑшне ачасем патне килсе курма чарӗҫ.
Уйлӑхри ачасене кӑшӑлвирусран хӳтӗлеме республикӑн резерв фондӗнчен 26 миллион тенкӗ уйӑрӗҫ. Хушӑва ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев алӑ пуснӑ.
Резерв фондӗнчен уйӑрнӑ укҫа-тенке Спорт министерствине тата Вӗренӳ министерствине пайласа парӗҫ: пӗрремӗшне – 5,1 миллион тенкӗ, теприне 21,4 миллион тенкӗ лекӗ.
Етӗрне районӗнче пурӑнакан ҫынна пулла саккун пӑсса тытнӑшӑн пуҫиле майпа явап тыттарнӑ.
Асӑннӑ районти ялсенчен пӗринче пурӑнаканскере РФ Пуҫиле кодексӗн 256-мӗш статйин 1-мӗш пайӗн «б, в» пункчӗсемпе явап тыттарас тенине район прокуратури те ырланӑ.
Суд палӑртнӑ тӑрӑх, 62-ри арҫын 2020 ҫулхи пуш уйӑхӗн ҫурринче Сӑр юханшывӗнче тетӗл лартнӑ. Вӑл ҫапла мелпе пулӑ тытнин тӑкакне 7 пин ытла шутласа кӑларнӑ.
Арҫын хӑйӗн айӑпне йышӑннӑ. Тӑкака саплаштарнӑ. Суд ӑна пуҫиле майпа 5 пин тенкӗ штраф хурса панӑ.
Чӑваш Ен прокуратурин пресс-службинче пӗлтернӗ тӑрӑх, суд йышӑнӑвӗ саккунлӑ вӑя хальлӗхе кӗреймӗн-ха.
Чӑваш Енри ялсене укҫа парасшӑн.
Паян республика Элтеперӗн тивӗҫӗсене вӑхӑтлӑх пурнӑҫлакан Олег Николаев районсемпе хуласенчи старостӑсемпе тата территорири халӑх хӑй тытӑмлӑхӗн ертӳҫисемпе видеоконференци мелӗпе канашлу ирттернӗ. Ҫавӑнпа хӑш-пӗр муниципалитет Чӑваш автономи облаҫне йӗркеленӗренпе 100 ҫул ҫитнӗ ятпа хушма укҫа уйӑрма ыйтнӑ. Олег Николаев ку шухӑша ырласа йышӑннӑ.
«Сирӗн умӑртах Ял хуҫалӑх тата Финанс министерствисене ку укҫана епле уйӑрасси пирки шухӑшласа пӑхма хушатӑп. Кашни яла 100-шер пин тенкӗ уйӑрассине ырлатӑп. Ку цифра 100 ҫулхи юбилейпе ҫыхӑнӗ», – ҫак шухӑша пвлӑртнӑ Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев. Район центрӗсемпе хуласем валли укҫа виҫине урӑхларах шутласа памалла.
Чӑваш Енре пурӑнакан хӗрарӑм упӑшкине сыватас тесе ултавҫӑсене 800 ытла тенкӗ яхӑн тенкӗ куҫарса панӑ.
Упӑшки вилнӗ. Кун хыҫҫӑн та хӗрарӑм тепӗр 35 пин тенкӗ ҫухатнӑ. Укҫа-тенке каялла куҫарса панӑшӑн «комисси» илеҫҫӗ-мӗн. Паллах, ултавҫӑ экстрасенс нимӗн те куҫарса паман.
Шар курнӑ хӗрарӑм 65 ҫулта. Вӑл 2017 ҫулта телевизорпа чир-чӗртен сыватакан экстрасенссем пирки курнӑ. Упӑшкине сыватма вӗсенчен пулӑшу ыйтнӑ. Лешсем ҫулталӑкӗпех «сеанссем» ирттернӗ. Упӑшкин сывлахӗпе кӑсӑклансах тӑнӑ, амулетсем ярса панӑ, куншӑн, паллах, укҫа ыйтнӑ. Хӗрарӑм 800 пин тенке яхӑн куҫарса панӑ.
Анчах экстрасенссем пулӑшман – упӑшки 2018 ҫулта вилнӗ. Кун хыҫҫӑн экстрасенссем тӑкакланӑ укҫана тавӑрса пама сӗннӗ, анчах куншӑн патшалӑх пошлине тӳлемелле-мӗн. Малтан вӑл вӗсене ӗненмен. Каярахпа «банк ӗҫченӗ» шӑнкӑравланӑ, укҫа счет ҫине куҫнине пӗлтернӗ. Ӑна илес тесен 30 пин тенкӗ анчах памалла имӗш. Унтан комисси – 5 пин тенкӗ. Анчах хӗрарӑма нимӗнле укҫа та тавӑрса паман. Халӗ пуҫиле ӗҫ пуҫарасси пирки шутлаҫҫӗ.
Чӑваш Енри тӗпчевҫӗсем Улатӑр хулинчи 30 ҫулти арҫын тӗлӗшпе пуҫиле ӗҫе тӗпчесе пӗтернӗ. Ӑна хыпар вӑрттӑн илмелли техника хатӗрне саккуна пӑсса сутнӑшӑн явап тыттарасшӑн.
Тӗпчевҫӗсем шухӑшланӑ тӑрӑх, 2019 ҫулхи ҫурла уйӑхӗнче вӑл Вӑрнар поселокӗнче Муркаш районӗнчи 45 ҫулти арҫынна пӗчӗк видеокамера тыттарнӑ. Вӑхӑтлӑха. Уншӑн вӑл 25 пин тенкӗ ыйтнӑ.
Пӗчӗк видеокамерӑна тӳме айне пытарса ҫав арҫын теори экзаменне кайнӑ. Вӑл водитель правине илме вӗреннӗ. Анчах ҫул-йӗр хӑрушсӑрлӑхӗн инспекцийӗн ӗҫченӗсем камерӑна асӑрханӑ та туртса илнӗ. Вӑрттӑн хатӗрпе усӑ курнӑшӑн Муркаш район арҫыннине суд пуҫиле ӗҫпе явап тыттарса 15 пин тенкӗлӗх штрафланӑ.
Шупашкар хулинче пурӑнакан 33 ҫулти хӗрарӑм 1 миллион ытла тенкӗсӗр тӑрса юлнӑ. Кун пирки вӑл йӗрке хуралҫисене пӗлтернӗ.
Пӑтӑрмах умӗнхи кун хӗрарӑм патне пӗр арҫын шӑнкӑравланӑ, хӑйӗнпе банк ӗҫченӗ тесе паллаштарнӑ. Вӑл каланӑ тӑрӑх, кредит учрежденийӗнчи унӑн «уйрӑм ҫын пӳлӗмне» ватакан тупӑннӑ, такам счет ҫинчи укҫана вӑрласшӑн тесе ӗнентернӗ. Ултавҫӑсен хӑнӑхнӑ меслечӗпе усӑ куракан «банкир» хӗрарӑма пур пек укҫана ятарлӑ счет ҫине куҫарма сӗннӗ. Ун пек никам та ним те тӑваймӗ, укҫана ют ҫын тӗкӗнеймӗ имӗш.
Арҫын каланӑ номер ҫине хӗрарӑм 650 пине яхӑн куҫарнӑ. Кайран хӗрарӑма ун ячӗпе такамсем темиҫе кредит учрежденийӗнче кредитсем илнӗ тесе хыпарланӑ. Парӑма хӑвӑрт татас тесе хӗрарӑм 600 пин тенкӗ кивҫен илнӗ. Вӑл укҫана «парӑма» татма куҫарнӑ. Ҫапла вара преступниксен счечӗ ҫине 1 миллион та 248 пин тенкӗ куҫса кайнӑ.
...ЧР ШӖМӗнче пӗлтернӗ тӑрӑх, телефонпа шӑнкӑравлани кредит парӑмне пӗтерме тата тепӗр кунне ҫӗнӗ карта кӑларма шантарнӑ.
Чӑваш Ен Транспорт министерствин «Чӑвашавтотранс» хысна предприятийӗн 64 ӗҫчен умӗнчи парӑмӗ 5,9 миллион тенкӗпе танлашнӑ. ЧР Ӗҫ тата социаллӑ хӳтлӗх министерствинче пӗлтернӗ тӑрӑх, паянхи куна ҫав парӑма унта тӳлесе татнӑ. Шалу тӳлеме предприяти пурлӑхне сутса тунӑ укҫана янӑ.
Ҫав вӑхӑтрах пирӗн тӑрӑхра ӗҫ укҫине вӑхӑтра тӳлеменнисем татах пур-ха. Сахаллӑн та мар вӗсем.
Маларах асӑннӑ Ӗҫ тата социаллӑ хӳтлӗх министерствин пресс-служби хыпарланӑ тӑрӑх, Чӑваш Енри тӗрлӗ формӑллӑ предприяти-организацисенче хальхи вӑхӑтра шалу парӑмӗ 54,7 миллион тенкӗпе танлашать. Ӗҫ укҫипе татӑласса 1257 ҫын кӗтет. Кӑҫалхи кӑрлач уйӑхӗнченпе парӑм виҫи 14,9 миллион тенкӗлӗх чакнӑ.
Паян ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев ирттернӗ планеркӑра ӗне тытакансене укҫан хавхалантарасси пирки калаҫнӑ.
Иртнӗ эрнере Олег Алексеевич контрактламан укҫа-тенкӗн пӗр пайне (ӑна картишсене хӑтлӑлатма пӑхса хунӑ) харпӑр хуҫалӑха субсидилеме ярасси пирки каланӑ. ЧР Ял хуҫалӑх министерстви проект хатӗрленӗ, унта ку пулӑшӑва мӗнле парассине ҫирӗплетнӗ.
Проектра палӑртнӑ тӑрӑх, пӗр ӗнешӗн 2300 тенкӗ парӗҫ, икӗ ӗне тытакансене – 3300 тенкӗ, 3 е ытларах ӗне усракансене – 4300 тенкӗ.
Ку пулӑшӑва 22 харпӑр хуҫалӑх тивӗҫмелле, вӗсенче – 56 пин ытла ӗне. Ку тӗллевпе республика хыснинчен 185 миллион тенкӗ уйӑрӗҫ. Тӳлеве ҫӗртме уйӑхӗн вӗҫӗнче пама палӑртнӑ. Ӗне усракансен ял тӑрӑхӗн администрацине кайса заявлени ҫырмалла.
+23.3 °C