Юлашки ултӑ кунта кӑшӑлвирусран пӗрмаях виҫшер ҫын вилет. Ковид алхасма тытӑннӑранпа пирӗн тӑрӑхра 167 ҫын пурнӑҫӗ татӑлнӑ. Ку цифрӑсене федерацин информаци центрӗ пӗлтернӗ.
Иртсе кайнӑ талӑкра кӑшӑлвируспа 65 ҫын чирленине шута илнӗ. Эпидемиологи сезонӗ пуҫланнӑранпа – 10 327. Пӗтӗмпе 8 856 пациент сывалнӑ, ҫав шутран юлашки тапхӑрта – 66.
Кӑшӑлвирусран килте сипленекенсем валли пирӗн республикӑна ҫитес икӗ эрнере эмел кӳрсе килмелле. Аса илтерер: укҫана федераци бюджетӗнчен, пурӗ 48,5 миллион тенкӗ, уйӑрнӑ.
Юпа уйӑхӗн 31-мӗшӗнчен пуҫласа чӳк уйӑхӗн 5-мӗшӗччен «Артек» центрта «Пысӑк тӑхтав» конкурсӑн финалӗ иртнӗ. Конкурсра ҫӗнтернӗ 11-мӗш класс ачисене, 300 ҫамрӑка, 1 миллион тенкӗ, 9-10-мӗш классенче вӗренекен 300 ҫӗнтерӳҫе 200 пиншер тенкӗ панӑ.
Сӑмах май каласан, ку проекта Чӑваш Енри 3 пине яхӑн ача хутшӑннӑ. Финала пирӗн тӑрӑхри ҫичӗ ача лекнӗ. Вӗсенчен виҫҫӗшӗ: Комсомольскинчи 2-мӗш шкулти Александра Салмина, Шупашкарти 56-мӗш шкулти Игорь Александров, Ҫӗрпӳ районӗнчи Сӑнав поселокӗнчи шкулти Иван Иванов – тӗрлӗ номинацире ҫӗнтернӗ.
Чулхулари чӑвашсен автономийӗн ертӳҫин Алина Артемьевӑн хӗрӗ Дарья та финалистсен йышӗнче.
Чӑваш Енӗн Правительство ҫуртӗнче видеокамерӑсем лартса тухӗҫ. Пурӗ 3,8 миллион тенкӗлӗх. Видеосӑнав камерисене администраци ҫурчӗн кашни хутӗнче вырнаҫтарӗҫ. Унта «Optimus IP-E015.0 (2.8)P_V.2» маркӑллӑ 14 камера вырнаҫтарма палӑртнӑ, «Optimus IP-E025.0 (2.8)P» маркӑллине – 74, «Optimus IP-E025.0 (2.8-12)P» маркӑллине – 16, «Optimus IP-E025.0 (2.8-12)AP» – 6. Видеокамерӑсене раштав уйӑхӗн 25-мӗшӗ тӗлне вырнаҫтарса пӗтермелле.
Пӗрремӗш хутра 30 камера лартӗҫ, 15-мӗш хутра – 8 камера. Ытти хутра 5–6 камера пулӗ. Правительство ҫурчӗн техника хучӗсенче (вӗсем – 16-мӗш тата 17-мӗш хутсем) тата нӳхреп пайӗнче камерӑсем кирлӗ мар тесе шухӑшлаҫҫӗ.
Чӳк уйӑхӗн 4-мӗшӗнче Шупашкарти пӗр хӗрарӑм йӗрке хуралҫисенчен пулӑшу ыйтнӑ. Унӑн банк картти ҫинчен 35 пин тенкӗ укҫа ҫухалнӑ. Ҫав кун хӗрарӑм карттӑ ҫинчи укҫапа 500 тенкӗлӗх тавар ҫеҫ туяннӑ.
Укҫа ӑҫта кайнине пӗлес тесе 41 ҫулти хӗрарӑм мобильлӗ приложение кӗрес тенӗ. Анчах приложени уҫӑлман, логинпа пароль тӗрӗс мар тесе кӑтартнӑ.
Каярах хӗрарӑм ҫакна пӗлнӗ. Унӑн 14 ҫулти ывӑлӗ амӑшӗн телефонӗпе усӑ курнӑ. Мессенджерсенчен пӗринчи ушкӑнра яш реклама асӑрханӑ. Унта укҫа ӗҫлесе илме сӗннӗ. Каччӑ администраторпа ҫыхӑннӑ, лешӗ ӑна ставкӑпа укҫа тума май пуррине пӗлтернӗ. Яшран ҫав ҫын ачан амӑшӗн банк карттин реквизичӗсене ыйтса пӗлнӗ, унтан карттӑ ҫинчи укҫана вӑрланӑ.
Раҫҫейре килте кӑшӑлвирусран амбулатори мелӗпе сипленекенсем валли резерв фондӗнчен 5 миллиард ытла тенкӗ уйӑраҫҫӗ. Ку укҫана килте сипленекен пациентсем валли тӳлевсӗр эмел пама уйӑраҫҫӗ.
Пульницӑра выртман ҫынсен чирӗ шала ан кайтӑр тесе сипленмелли схема палӑртаҫҫӗ. Тухтӑр ҫырса панӑ эмелсене тӳлевсӗрех илме май пур. Ҫапла Раҫҫейре 640500 пациент тӳлевсӗр эмелсене тивӗҫмелле.
Михаил Мишустин премьер-министр резерв фондӗнчи укҫа-тенке регионсене кӗске вӑхӑтра ҫитерме хушнӑ. Чӑваш Ене 45 миллион та 829 пин те 500 тенкӗ килмелле.
Юпа уйӑхӗн 30-мӗшӗнче Ҫӗрпӳре «Росинка» ача пахчи уҫӑлнӑ. Унта 240 ача валли вырӑн хатӗрленӗ.
Палӑртмалла: ку ача пахчи Ҫӗрпӳ хулинче – чи пысӑкки. Унта ачасен 12 ушкӑнӗ пулӗ. Ача пахчинче бассейн, спорт тата музыка залӗсем, компьютер класӗ, психологи пулӑшӑвӗ паракан пӳлӗм, Лего-студи, мультипликаци студийӗ, агролаборатори, столяр мастерскойӗ пур.
Ача пахчине хута яма 217 миллион ытла тенкӗ тӑкакланӑ. Ӑна 2019 ҫулхи ҫӗртме уйӑхӗнче тума тытӑннӑ, ҫав ҫулах раштаван 25-мӗшӗнче вӗҫлемелле пулнӑ. Анчах срока каярах та каярах куҫарса пынӑ. Акӑ тинех ача пахчи официаллӑ майпа уҫӑлнӑ.
Хальхи саманара пирӗнтен чылайӑшӗ кредит тӳлет пулӗ. Совет саманинчи пек черете тӑрса хваттер тӳлевсӗр илеймӗн. Ӑна пилӗк ачаллисемпе вӑрҫӑ ветеранӗсене тата ытти хӑш-пӗр категорие ҫеҫ параҫҫӗ. Ыттисен ирӗксӗрех ипотекӑна шанма тивет. Теприсем вара ҫурт-йӗр е хваттер туянма ҫеҫ мар, япала илме те кредит карттипе усӑ кураҫҫӗ. Канашра пурӑнакан 37 ҫулти хӗрарӑмӑн та пулнӑ вӑл.
Юпа уйӑхӗн каҫхине ун патне арҫын шӑнкӑравланӑ. Хӑйӗнпе банк ӗҫченӗ тесе паллаштарнӑ. Хӗрарӑма кредит картти ҫинчи укҫан процент ставкине чакарма сӗннӗ. Хӗрарӑм палламан ҫынна ӗненнӗ-шаннӑ. Хӑйӗн телефонӗ ҫине килнӗ кода тата пароле пӗлтернӗ.
Ҫавсемпе усӑ курса ултавҫӑсем интернет-банкри уйрӑм ҫын пӳлӗмӗпе хуҫаланмалли телефон номерне ылмаштарнӑ. Унтан карттӑ ҫинчи 83 пин тенке вӑрланӑ.
Йӗрке хуралҫисем палӑртнӑ тӑрӑх, хӗрарӑм патне шӑнкӑравланӑ номере Кострома облаҫӗнче регистрациленӗ.
Тутарстанра пурӑнакан арҫын хӑйӗнпе паллӑ юмӑҫ пек паллаштарса Чӑваш Енри ҫынсене шӑнман пӑр ҫине лартса янӑ. ЧР ШӖМӗ пӗлтернӗ тӑрӑх, ун тӗлӗшпе пуҫиле ӗҫ пуҫарнӑ.
Ҫӗнӗ Шупашкарта пурӑнакан 33-ри хӗрарӑм полицие пынӑ. Хайхискер тӗнче тетелӗнче опытлӑ юмӑҫӑн Виктория Железновӑн пӗлтерӗвне асӑрханӑ, унпа ҫыхӑннӑ. Лешӗ ӑна пӑснине каланӑ. Ӑна сирме 7 пин тенкӗ ыйтнӑ. Хӗрарӑм укҫине куҫарсан тин ултавҫӑ тӗлне лекнине пӗлнӗ.
Оперативниксем Зеленодольск хулинче пурӑнакан 25 ҫулти арҫынна тытса чарнӑ. Кӑрлач уйӑхӗнче вӑл Чӑваш Енри тепӗр ҫынна та улталани тӑрӑ шыв ҫине тухнӑ. Ун чухне ӑна 20 пин тенкӗ куҫарса панӑ.
Чӑваш Ен Элтеперӗ Олег Николаев суйлав кампанине ирттермешкӗн 30 миллион тенке яхӑн тӑкакланӑ. Укҫан чылай пайӗ – юридици сӑпачӗсем тата ахаль ҫынсем пани. Хӑй Олег Алексеевич кӗсйинчен 50 пин тенкӗ кӑларнӑ.
Юридици сӑпачӗсем Олег Николаевӑн суйлав фондне суйлав кампанине ирттерме 37,6 миллион тенкӗ панӑ, ахаль ҫынсем – 3 миллион та 524,9 пин тенкӗ. 11,5 миллион тенкине тӗрлӗ сӑлтава пула каялла тавӑрса пама тивнӗ. Олег Николаев суйлав кампание ирттерме 29 миллион та 674,9 пин тенкӗ тӑкакланӑ.
Суйлава хутшӑннӑ ытти кандидат (вӗсем тӑваттӑн пулнӑ) ку тӗллевпе 9 миллион тенкӗрен ытларах тӑкакламан.
Ҫӗнӗ Шупашкарта 16 ҫулти яш банк счечӗ ҫинчи ҫын укҫине вӑрланӑ. Вӑл укҫа ачан аслашшӗ пулнӑ.
16-ри яш пӗррехинче 74-ри аслашшӗн банк карттипе лавккана кайнӑ. Лешӗ ӑна хӑйне валли апат-ҫимӗҫ туянса пама ыйтнӑ.
Банк картти алла лексен ҫамрӑк хӑйӗн телефонӗ ҫине мобильлӗ приложени вырнаҫтарнӑ. Унтан вӑл аслашшӗн банк картти ҫинчен 320 пин тенкӗ ытла вӑрланӑ.
Ҫын укҫине (аслашӗнне пулин те) тытнӑ ҫамрӑка тӗрмене хупса усрамасӑр 1,5 ҫуллӑха ирӗкрен хӑтарма йышӑннӑ.
+6.3 °C