ЧР Наци вулавӑшӗн директорне Роза Лизаковӑна отставкӑна янӑ. Хушӑва республика премьер-министрӗ Сергей Артамонов алӑ пуснӑ.
Документра палӑртнӑ тӑрӑх, Роза Лизаковӑна должноҫрен паян, авӑн уйӑхӗн 21-мӗшӗнчен, кӑларнӑ. Палӑртса хӑварар: вӑл ЧР Наци вулавӑшне виҫӗ хутчен ертсе пынӑ – 2001-2002 ҫулсенче, 2012-2013 ҫулсенче тата халӗ, юлашкинчен, 2020-2026 ҫулсенче.
Ҫавӑн пекех вӑл тӗрлӗ ҫулта ЧР Культура министерствинче ӗҫленӗ: 2002-2003 ҫулсенче культура министрӗн ҫумӗ,2004-2007 ҫулсенче культура тата ӳнер управленийӗн пуҫлӑхӗ, 2007-2008 ҫулсенче культура министрӗн ҫумӗ пулнӑ. Ҫавӑн пекех Роза Лизакова ЧР Культура министерствине икӗ хутчен ертсе пынӑ: 2008-2012 ҫулсенче, 2020 ҫулхи нарӑс-авӑн уйӑхӗсенче.
ЧР экономика министрӗн ҫумне Елена Кудановӑна должноҫрен кӑларнӑ. Хушӑва ЧР правительство председателӗ Сергей Артамонов авӑн уйӑхӗн 18-мӗшӗнче алӑ пуснӑ. Документа тепӗр кунхине, авӑн уйӑхӗн 19-мӗшӗнче, пичетленӗ.
Палӑртса хӑварар: Елена Куданова экономика министрӗн ҫумӗнче 2025 ҫулхи чӳк уйӑхӗнче ӗҫлеме пуҫланӑ. Унччен вӑл Чӑваш Респубикинчи Тӗрӗслевпе шутлав палатин сектор заведующийӗ пулнӑ.
Сӑмах май, халӗ ЧР экономика министрӗн Лариса Рафиковӑн виҫӗ ҫум тӑрса юлнӑ: Дмитрий Бельцов, Сергей Федоров тата Александр Башков.
Чӑваш Енре пӗр яш пикене пӑвса вӗлерни пирки Чӑваш халӑх сайчӗ унччен пӗлтернӗччӗ.
Аса илтерер: пӑтӑрмах ҫак уйӑхра пулса иртнӗ. Авӑн уйӑхӗн 1-мӗшӗнче Шупашкарти Трактор тӑвакансен проспектӗнчи пӗр ҫуртра 15 ҫулти хӗр виллине тупнӑ.
Следстви версийӗ тӑрӑх, ӑна хӑйӗнпе тантӑш ҫамрӑк пӑвса вӗлернӗ. Вӗсем вӑрҫӑнса кайнӑ. Каччӑ хӗре зарядник пралукӗпе пӑвнӑ.
Пӑтӑрмах хыҫҫӑн РФ Следстви комитечӗн Чӑваш Енри тӗпчевҫисем пуҫиле ӗҫ пуҫарнӑ.
Ҫак ӗҫе тума пултарнӑ ҫамрӑка йӗрке хуралҫисем ҫийӗнчех тытса чарнӑ. Ӑна Сӗнтӗрвӑрри хулинче шыраса тупнӑ. Вӑл айӑпне йышӑннӑ.
МИХри «Первый чувашский» каналта
МИХсем хыпарлани тӑрӑх пӗлтернине ӗненсен, яш Сӗнтӗрвӑрри тӑрӑхӗн пуҫлӑхӗн ҫумӗн ывӑлӗ-мӗн. Унӑн ашшӗ ӗҫрен кайнӑ тесе пӗлтернӗ.
Шупашкар хулин пуҫлӑхӗн Станислав Трофимовӑн ячӗпе «Макс» мессенджерта суя аккаунт уҫнӑ. Кун пирки вӑл паян хӑй пӗлтернӗ.
Станислав Трофимов тӗнче тетелӗнче унӑн ячӗпе суя аккаунт тытса тӑнине, вӑл унӑн маррине хыпарланӑ. Вӑл хула ҫыннисене халӑх тетелӗсенче асӑрхануллӑ пулма ыйтнӑ. Ҫавӑн пекех мэр унӑн официаллӑ страницинчи хыпарсене кӑна ӗненме чӗнсе каланӑ.
Сӑмах май, «Макс» мессенджерта унччен унӑн каналӗ ҫухалнӑччӗ. Кун хыҫҫӑн унӑн ҫӗннине уҫма тивнӗ.
Ҫакна та палӑртса хӑварар: республика Элтеперӗ Олег Николаев та хушӑран кунашкал хыпарсем пӗлтерет. Унӑн ячӗпе те аккаунтсем уҫаҫҫӗ-мӗн.
Ҫавӑнпа чӑнах та асӑрханӑр, официаллӑ ҫӑлкуҫсенчи информацисене кӑна ӗненӗр!
Вячеслав Канищева Чӑваш Енӗн строительство министрӗн пӗрремӗш ҫумӗ пулма ҫирӗплетнӗ. Йышӑнӑва республикӑн Министрсен Кабинечӗн Председателӗ Сергей Артамонов алӑ пуснӑ.
Вячеслав Юрьевич 1980 ҫулта ҫуралнӑ. И.Н. Ульянов Чӑваш патшалӑх университетӗнчен вӗренсе тухнӑ. Юрист пӗлӗвӗллӗскер Хусанти федераци университетӗнче «Промышленность тата граждан строительстви» енӗпе вӗреннӗ.
Ку ҫын промышленность тата капиталлӑ строительство объекчӗсене ертсе пырас енӗпе пуян опытлӑ-мӗн. Унчченхи ӗҫре Вячеслав Юрьевич техника заказчикӗн службине ертсе пынӑ, ҫав шутра объектсене хута яма документ парассишӗн яваплӑ пулнӑ. Мускавра тата ытти хӑш-пӗр регионта ӗҫленӗ. Раҫҫейӗн ҫӗнӗ субъекчӗсенчи инфраструктурӑна хӑпартассишӗн те яваплӑ пулнӑ иккен.
Чӑваш Ен премьер-министрӗ Сергей Артамонов хӑйӗн ӗҫ пӳлӗмӗнче юсав ӗҫӗсем туса ирттересшӗн. Кун валли аукцион пулассине пӗлтернӗ.
Унӑн пӳлӗмӗ Шупашкар хулинчи Президент бульварӗнчи 10-мӗш ҫуртра 14-мӗш хутра вырнаҫнӑ. Аукционӑн малтанхи хакӗ — 7 869 550 тенкӗ. Укҫа-тенке республика хыснинчен уйӑрӗҫ. Аукциона заявкӑсене авӑн уйӑхӗн 9-мӗшӗччен йышӑнаҫҫӗ. Аукционра пӳлӗм номерне кӑтартнӑ – 17-мӗш. Вӑл – Сергей Артамоновӑн.
Пӳлӗм лаптӑкӗ 45,5 тӑваткал метр. Дизайн-проекта «A la Carte» студи 2025 ҫулта хатӗрленӗ. Вӗсем пӳлӗме виҫӗ зонӑна уйӑрнӑ: йышӑну пӳлӗмӗ, кӗтмелли пӳлӗм тата кухня блокӗ.
Аукционра ҫӗнтернӗ подрядчикӑн кивӗ светильниксене, обойсене, плинтуссене илмелле. Унтан маччапа стенана якатса обой, декоративлӑ штукатурка ҫыпӑҫтармалла. Паркет урая лакпа витӗҫ. Аукцион хакне юсав ӗҫӗсем кӑна кӗнӗ, сӗтел-пукан хакне шута илмен.
Шупашкарти Хӗрлӗ тӳремре тӗлӗнмелле пӑтӑрмах пулса иртнине эпир унччен пӗлтернӗччӗ-ха. Аса илтерер: унта проката илсе ачасем ярӑнмалли машина тӗреклӗ арҫын ҫине пырса кӗнӗ. Инкекре арҫын хытах аманнӑ, унӑн ури хуҫӑлнӑ. Инкек вырӑнне васкавлӑ пулӑшу тухтӑрӗсене тата патшалӑхӑн ҫул-йӗр хӑрушсӑрлӑхӗн инспекторӗсене чӗнсе илнӗ.
Хӗрлӗ тӳремре электросамокатпа ярӑнма юрамасть иккен, анчах ача машинисене вара проката илсе ярӑнса ҫӳреҫҫӗ. Ҫав машинӑсем тепӗр чухне ҫынсем ҫине те пырса кӗреҫҫӗ-мӗн.
МАХри «Первый чувашский» каналта паян пӗлтернӗ тӑрӑх, унти машинӑсем саккуна пӑсса ӗҫленӗ-мӗн. Ку хыпара илтсен ирӗксӗрех ҫапла ыйту ҫуралӗ: йӗркене пӑсса проката паракан ача-пӑча ярӑнмалли машинӑсем пирки тӳре-шара ҫу каҫипе те илтмен, пӗлмен, курман-ши вара?
Чӑваш Ен Элтеперӗ тунтикунсерен ирттерекен планеркӑра социаллӑ ҫурт-йӗр тӑвас ыйтӑва сӳтсе явнӑ. «Чувашинформ» пӗлтернӗ тӑрӑх, ун валли лапамсем уйӑрасси пирки калаҫнӑ.
Паянхи кун тӗлне илсен республикӑра социаллӑ ҫурт-йӗр 180,7 пин тӑваткал метр кирлӗ е 5038 хваттер. Вӑл ишӗлекен ҫуртсенче пурӑнакансене унтан куҫарса кайма, тӑлӑхсене, нумай ачаллӑ тата ҫамрӑк ҫемьесене хваттерпе тивӗҫтерме кирлӗ. Унсӑр пуҫне ун пек ҫуртри хваттере служба хваттерӗ валли те уйӑрса параҫҫӗ.
Паянхи куна илсен, 19 муниципалитетра кадастр учётне 265,2 пин тӑваткал метр лаптӑк ҫинче 54 ҫӗр лаптӑкӗ пӑхса хӑварнӑ.
Ҫӗмӗрле, Вӑрнар, Хӗрлӗ Чутай, Канаш, Тӑвай тата Ҫӗрпӳ тӑрӑхӗсенче ҫӑмӑллӑхлӑ категориллӗ ҫынсем валли 14 ҫурт тума пуҫӑннӑ.
Питӗр хулинче Чӑваш Республикин кунӗ пулассине эпир унччен пӗлтернӗччӗ-ха. Мероприятисем авӑн уйӑхӗн 27-28-мӗшӗсенче иртнӗ.
Александр Белов журналист «Правда ПФО» тӗнче тетелӗнчи хаҫатри блогра пӗр самант пирки ҫырса кӑтартнӑ.
Санкт-Петербург хулин кӗпӗрнаттӑрӗ Александр Беглов хӑйӗн резиденцийӗнче Чӑваш Ен делегацине йышӑннӑ. Сӗтел хушшинче Олег Николаевӑн мӑшӑрӗ Наталья Николаева та пулнӑ. Вӑл ку мероприятие кам пулса хутшӑнни пирки ҫырса пӗлтермен. Наталья Николаева — Чӑваш Енри хӗрарӑмсен канашӗн председателӗ шутланать.
«Беглов официаллӑ лару сӗтелӗ хушшинче Чӑваш Ен Элтеперӗпе пӗрле унӑн арӑмӗ ларнине курсан, тен, тӗлӗнннӗ те пулӗ. Мӗншӗн тесе протокол тӑрӑх ҫемье рандевувӗ тесе палӑртман», — хыпарланӑ журналист.
Пӗрле сӑн ӳкерӗннӗ ҫӗрте Чӑваш Енрен Питӗре ӗҫлеме тухса кайнӑ Светлана Енилина та пулнӑ. Вӑл унта Финанс комитечӗн председателӗнче тӑрӑшать.
Ӗнер, ҫурла уйӑхӗн 31-мӗшӗнче, Чӑваш Енӗн сывлӑх сыхлав министрӗн ҫумне Резеда Хуснетдиновӑна ӗҫрен кӑларнӑ. Ку йышӑнӑва республикӑн Министрсен Кабинечӗн Председателӗ Сергей Артамонов алӑ пуснӑ. 1052-р-мӗш номерлӗ документа республикӑн влаҫ органӗсен официаллӑ порталӗнчи «Саккунсем» ярӑмра вырнаҫтарнӑ.
Резеда Минулловна министр ҫумӗ пулса ӗҫлеме 2023 ҫулхи пуш уйӑхӗн 31-мӗшӗнче пуҫӑннӑ.
Паянхи кун Лариса Тарасова министрӑн пӗрремӗш ҫумӗ пулса Марина Сергеева тӑрӑшать. Унсӑр пуҫне тепӗр ҫум пур. Вӑл — Олеся Игнатьева.
Республикӑн влаҫ органӗсенче вырнаҫтарнӑ хыпар тӑрӑх хакласан, сывлӑх сыхлав министрӗн пулӑшуҫин вакансийӗ те пушӑ. Министерствӑра пресс-секретарь пулса вара Роман Павлов ӗҫлет.
+12.3 °C