Юпа уйӑхӗн 20-мӗшӗнченпе Чӑваш Енре кашни кунах кӑшӑлвирусран вилнӗ ҫынсем пулнӑ. Ҫав тапхӑртан пуҫласа 48 ҫыннӑн пурнӑҫӗ татӑлнӑ. Пӗтӗмпе 161 ҫын кӑшӑлвирса пула вилнӗ.
Ку таранччен 10198 ҫын инфекциленнӗ. Вӗсенчен 8701-шӗ сывалнӑ. Юлашки талӑкра 63 ҫын чирленӗ, 39 ҫын сывалнӑ, 3 ҫын вилнӗ.
Паянхи кун тӗлне республикӑра 1336 ҫын килте амбулатори мелӗпе е пульницӑра сипленет.
Раҫҫейре килте кӑшӑлвирусран амбулатори мелӗпе сипленекенсем валли резерв фондӗнчен 5 миллиард ытла тенкӗ уйӑраҫҫӗ. Ку укҫана килте сипленекен пациентсем валли тӳлевсӗр эмел пама уйӑраҫҫӗ.
Пульницӑра выртман ҫынсен чирӗ шала ан кайтӑр тесе сипленмелли схема палӑртаҫҫӗ. Тухтӑр ҫырса панӑ эмелсене тӳлевсӗрех илме май пур. Ҫапла Раҫҫейре 640500 пациент тӳлевсӗр эмелсене тивӗҫмелле.
Михаил Мишустин премьер-министр резерв фондӗнчи укҫа-тенке регионсене кӗске вӑхӑтра ҫитерме хушнӑ. Чӑваш Ене 45 миллион та 829 пин те 500 тенкӗ килмелле.
Чӑваш Енре кӑшӑлвирусран кашни кунах вилеҫҫӗ. 15 кунра 42 ҫыннӑн пурнӑҫӗ татӑлнӑ. Ӗнер ав каллех вилнӗ – 3 ҫын пурнӑҫран уйрӑлнӑ. Ҫапла ку таранччен 155 ҫын вируса парӑнтарайман.
Ҫулталӑк пуҫланнӑранпа 10074 ҫын инфекциленнӗ, вӗсенчен 8554-шӗ сывалнӑ. Чӳк уйӑхӗн 3-мӗшӗ тӗлне республикӑра 1365 пациент пульницӑра е килте амбулатори мелӗпе сипленнине шута илнӗ.
Республикӑра кӑшӑлвирус сарӑлнин индексӗ 1-пе танлашать. Сӑмах май, малашне пульницӑран кӑшӑлвирус анализӗ «минус» паллӑпа килмесӗрех киле ярӗҫ.
Ӗнер пирӗн республикӑра 65 ҫултан аслӑрах ҫынсене тата чӗрепе юн тымарӗсен, ҫавӑн пекех сывлӑш ҫулӗсен чирӗсемпе нушаланакансене килте ларма сӗнекен хушу кӑларчӗҫ. Аса илтерер: асӑннӑ категорие кӗрекенсен пульницӑна е аптекӑна каймалла, суд органӗсене е лавккана ҫитсе килмелле пулсан, йытӑ уҫӑлтарма, физкультурӑна тата зарядка тума ҫеҫ урама тухмалла. Ӗҫе каякан ватӑсене те ҫул ҫӳреме чармӗҫ.
Ҫавна май пирӗн республикӑра «Эпир пӗрле» нимеҫӗсен штабӗ ӗҫе пуҫӑнассине пӗлтернӗ. Вӗсен йышне кӗме никама та чармаҫҫӗ. Ӳрӗклӗх тата ырӑ кӑмӑл ҫеҫ кирлӗ .
Чӑваш Енре кӑшӑлвирусран вакцинацилеме пуҫланӑ. Хальлӗхе Хулари клиника центрӗн тухтӑрӗсене прививка тунӑ. Сӑмах май, халӗ центр ковид-госпиталь пек ӗҫлет.
Ку пульницӑна вакцина иртнӗ эрнерех ҫитнӗ. Анчах хальлӗхе вӑл нумай мар, тухтӑрсене кӑна прививка тӑваҫҫӗ. Хӑрушлӑх ушкӑнне кӗрекен тухтӑрсене пӗрремӗш вакцианцилеҫҫӗ. Ку йыша «Хӗрлӗ зонӑри» тата кӑшӑлвируспа чирлӗ ҫынсемпе хутшӑнакан тухтӑрсем кӗреҫҫӗ.
Прививка тунӑ тухтӑрсене халӗ сӑнаса тӑраҫҫӗ. Вӗсем хӑйсене лайӑхах туяҫҫӗ.
Кӑшӑлвируса пула вилнисен йышӗ 149 ҫынна ҫитнӗ. Юлашки талӑкра каварлӑ вируса пула 4 ҫыннӑн пурнӑҫӗ татӑлнӑ.
Паянхи кун тӗлне республикӑра 9956 ҫын инфекциленнӗ, вӗсенчен 8524-шӗ сывалнӑ. Юлашки талӑкра 58 ҫыннӑн организмӗнче кӑшӑлвирус пуррине палӑртнӑ. Паянхи кун валли тепӗр 27 ҫын сывалнӑ.
Хальхи вӑхӑтра кӑшӑлвируспа чирлекенсен йышӗ кӑштах чакнӑ. Паянхи кун тӗлне 1283 пациент килте амбулатори мелӗпе е пульницӑра сипленет.
Кӑшӑлвируспа чирлекенсем пирӗн республикӑра тупӑнсах тӑраҫҫӗ. Пандеми пуҫланнӑранпа Чӑваш Енри 9898 ҫынна ку чир ернӗ. Ҫав шутра 57 ҫын чирленине ӗнер шута илнӗ. Тӳрех палӑртар: ку вӑл – официаллӑ статистика ҫеҫ.
Мӗнпур чирлисенчен 85,8 проценчӗ, е 8497 ҫын, сывалнӑ. Иртнӗ талӑкра ҫав шутран 116 пациента сывалнисен шутне илнӗ.
COVID-19 вируса пула пирӗн республикӑри 145 ҫын пурнӑҫӗ татӑлнӑ. Ун пек пӗрремӗш тӗслӗхе ака уйӑхӗнче шута илнӗччӗ. Асӑннӑ йышран пӗрре-виҫҫӗмӗш пайӗ ытларах (52 ҫын) юпа уйӑхӗнче вилнӗ. Иртсе кайнӑ талӑкра тепӗр виҫӗ ҫын пурнӑҫӗ татӑлнӑ.
Шупашкар районӗнчи Ҫӗнӗ Тутаркассинче пурӑнакан 27 ҫулти ҫамрӑка пула икӗ ҫын шар курнӑ. Турра шӗкӗр, вӗсен пурнӑҫне тухтӑрсем ҫӑлса хӑварнӑ.
Кӑҫалхи авӑн уйӑхӗн 8-мӗшӗнче ӳсӗр ҫамрӑк арҫын Ҫӗнӗ Тутаркассинчи нумай хваттерлӗ ҫуртсенчен пӗрин картишӗнче пулнӑ. Ҫавӑнта вӑл хӑй унччен палламан 34-ри арҫынпа харкашма тытӑннӑ. Сӑмахпа ҫеҫ мар. Ҫамрӑкки аслине ҫӗҫӗпе тӑватӑ хут чикнӗ. Хырӑмран тата ытти вырӑнтан лектернӗ. 34 ҫулти арҫынна паллакан 23-ри каччӑ хушша-хуппа кӗнӗ, хӳтӗлеме тӑнӑ. 27-ри ҫамрӑка вӑл ҫӗре асфальт ҫине пусса ӳкернӗ, ӑна тӑма ирӗк паман. Апла пулин те лешӗ каччӑна 8 хутран кая мар ҫӗҫӗпе чикме ӗлкӗрнӗ.
Пӑтӑрмаха, юрать, куракансем пулнӑ. Вӗсем пулӑшнипе икӗ арҫын та сывӑ юлнӑ, йывӑр суранланнӑскерсене пульницӑна ӑсатнӑ.
Ҫынсене ҫӗҫӗпе аматнӑ ҫамрӑка йӗрке хуралҫисем тытса чарнӑ. Халӗ ун тӗлӗшпе пуҫиле ӗҫ пуҫарнӑ. 27-ри каччӑ унччен те судпа айӑпланнӑ, ҫав шутра – ҫынна вӗлернӗшӗн те.
Улатӑр хулинчи предприятисенчен пӗринче рабочисене ӗҫре хӳтӗлӗнмелли хатӗрсем паман. Ҫакна вырӑнти прокуратура тӗрӗслев вӑхӑтӗнче тупса палӑртнӑ.
Надзор органӗ «Стройгарант» тулли мар яваплӑ обществӑра пулнӑ. Унта ӗҫ саккунне самай пӑсаҫҫӗ иккен. Пӗрремӗшӗнчен, ӗҫ хӑрушсӑрлӑхӗн правилисемпе рабочисене вӑхӑтра паллаштарса инструктаж ирттермен. Иккӗмӗшӗнчен, вӗсене ӗҫре хӳтӗленмелли хатӗрсем валеҫсе паман.
Саккуна пӑхӑнман директор тӗлӗшпе прокуратура административлӑ ӗҫ пуҫарнӑ. Халӗ пуҫлӑха штрафланӑ.
Кӑшӑлвируса сарӑлма парас мар тесе ҫӗршыв тата республика шайӗнче тӗрлӗ мера йышӑнма тӑрӑшаҫҫӗ. Халӗ, сӑмахран, халӑх йышлӑ вырӑнсенче (лавккасемпе аптекӑсенче, общество транспортӗнче т.ыт.те) маска тӑхӑнса ҫӳремелле. Кунсӑр пуҫне кафесемпе ресторансене, хавасланмалли-савӑнмалли тӗрлӗ учрежденисене ҫӗрле ӗҫлеме чарнӑ.
Чӑваш Енри мӗнпур организацие ӗҫченсене килте ӗҫлеттерме сӗннӗ. Май килнӗ таран. Кӑшӑлвирус сарӑлнипе кӗрешекен оперштаб паян ларура ачасен кӗрхи каникулне епле йӗркелессине сӳтсе явнине пӗлтертӗмӗр-ха. Килте ӗҫлеттересси пирки шӑпах ҫавӑнта сӑмах хускатнӑ та.
-0.7 °C