Канашра шкул тума Туркменистанран килнӗ ҫынна явӑҫтарнӑ. Вӑл ҫын пирӗн ҫӗршыва турист евӗр килсе ҫитнӗ, анчах вӑхӑт иртсен тӑван тӑрӑхне таврӑнма шутламан та. Асӑннӑ ҫынна 5 пин тенкӗ штраф тӳлеттерӗҫ.
Асӑнна хулара нумай хваттерлӗ ҫурт тунӑ ҫӗрте Туркменистанран килнӗ, Шупашкарти аслӑ шкулсенчен пӗринче пӗрремӗш курсра вӗренекен студента ӗҫлеттернӗ. Ӑна та 5 пин тенкӗлӗх штрафланӑ.
Саккуна пӑсса ют ҫӗршыв ҫыннисене ӗҫе явӑҫтарнӑ организаци пуҫлӑхӗсене те явап тыттарӗҫ.
Муркаш районӗнчи Москакасси ялӗнче ача пахчине вӑхӑтра туса пӗтереймесен те пултараҫҫӗ.
Шупашкарти «ГлавИнвестСтроя» организацин директорне строительство вӑхӑтне тӑҫҫа янӑран прокуратура асӑрхаттару хучӗ ҫырса панӑ.
«ГлавИнвестСтрой» общество малтанласа 2024 ҫулхи юпа уйӑхӗн 31-мӗшӗччен туса пӗтермелле пулнӑ, анчах кайран вӑхӑта пуш уйӑхӗн 20-мӗшӗччен тӑсса панӑ. Анчах подрядчик ку вӑхӑта та ӗҫлесе ӗлкереймесен те пултарать. Хальхи вӑхӑтра ӗҫӗн 80 процент таран пурнӑҫланӑ.
Контракт хакӗ — 219,3 млн тенкӗ.
Пуш уйӑхӗнче строительство таварӗн хакӗ ӳсӗ. Строительствӑн хӑй хаклӑхӗнче самай вырӑн йышӑнакан тавар 15-20 процент хакланма пултарӗ. Кун пирки «Вектор Проект» архитектурӑпа проект компанийӗн генеральнӑй директорӗ Антон Баксараев пӗлтернӗ.
Эксперт шухӑшланӑ тӑрӑх, пуринчен ытла бетон, пӳрт тата ытти хуралтӑ витмелли хатӗр, кирпич, бетонтан туса кӑларна блок, минерал ватин мачӗ, шӑвӑҫ, тимӗр пӑрӑх, щебень, хӑйӑр, кабель, арматура хакланӗ.
Шупашкарта юр ирӗлтермелли станци тума пуҫланӑ. Хула администрацийӗнче пӗлтернӗ тӑрӑх, ку вӑл питех те пӗлтерӗшлӗ объект.
Станци Трактор тӑвакансен проспектӗнче пулӗ. Ӑна 2026-2027 ҫулсенчи хӗллехи тапхӑр валли хута ямалла. Объект 2026 ҫулхи юпа уйӑхӗн 30-мӗшӗнче ӗҫлеме тытӑнӗ.
Бункер пӗр харӑсах 600 кубла метр юра йышӑнӗ, вӑл пӗр сехетре ирӗлсе пӗтӗ. Талӑкра вара 2860 кубла метр юр ирӗлтермен пултарӗ.
Раҫҫей Президенчӗ Владимир Путин Шупашкарти Андриян Николаев ячӗллӗ юсаса ҫӗнетнӗ аэропорта уҫнӑ. Республика тӗп хулине вӑл хӑй килмен-ха, анчах пӗлтерӗшлӗ ҫак пулӑма вӑл видеоҫыхӑну мелӗпе хутшӑннӑ.
Аэропорта уҫма ҫавӑн пекех Раҫҫейӗн транспорт министрӗ Роман Старовойт тата Чӑваш Ен Элтеперӗ Олег Николаев хутшӑннӑ.
Хальхи вӑхӑтри терминала уҫни республикӑшӑн питех те пӗлтерӗшлӗ. Туристсем те республикӑна хаклама вокзалсенчен пуҫлаҫҫӗ.
Уҫӑлнӑ ҫӗнӗ терминал — вӗҫсе каякан пассажирсем валли. Самолётпа республикӑна килекен пассажирсем валли те зала юсаса ҫӗнетӗҫ. Ку вӑл строительствӑн виҫҫӗмӗш тапхӑрӗ пулӗ. 2025 ҫулта перрона тата руль ҫулне юсамалла.
Чӑваш Енри Патӑрьелте агротехнопарк тунӑ чухне хамӑр тӑрӑхра туса кӑларакан оборудованипе тата материалпа усӑ кураҫҫӗ.
Кун пирки республикӑн вице-премьерӗ — экономика аталанӑвӗн тата пурлӑх хутшӑнӑвӗсен министрӗ Дмитрий Краснов агротехнопарк строительстви епле пынипе паллашма кайнӑ хыҫҫӑн хӑйӗн Телеграм-каналӗнче пӗлтернӗ.
Дмитрий Краснов хыпарланӑ тӑрӑх, инженери инфраструктурине тунӑ чухне республикӑри предприятисен продукцийӗпе май килнӗ таран ытларах усӑ курма тӑрӑшаҫҫӗ. Подрядчикӗ — ПМК-8.
Ҫурла уйӑхӗн 28-мӗшӗнче Куславкка муниципаллӑ округӗнчи Илепар ялӗнче культура ҫурчӗ уҫӑлнӑ. Чӑваш Енӗн Культура министерствинче ӑна «Культура» наци проекчӗпе килӗшӳллӗн хӑпартса лартнине пӗлтереҫҫӗ.
Культура ҫуртне пӗлтӗр тума пуҫланӑ. Ӑна хальхи вӑхӑтри обрудованипе тивӗҫтернӗ май фильмсем кӑтартӗҫ, концертсем лартӗҫ. Кульутра ҫуртӗнче ачасем валли спорт тата пултарулӑх кружокӗсем ӗҫлессине ӗнентереҫҫӗ.
Кӑҫал пирӗн республикӑри муниципалитетсенче 14 клуб тӑваҫҫӗ. Вӗсенчен иккӗшне — вырӑнти хысна укҫипе, ҫиччӗшне — пуҫаруллӑ бюджет шучӗпе, пӗрне — «Культура» нацпроектпа, тӑваттӑшне — «Культурӑна аталантарасси» патшалӑх программипе.
Чӑваш Ен прокуратури республикӑра тума пуҫланӑ шкулсен строительстви епле пынине тӗрӗсленӗ.
Вӗренӳ объекчӗсенчен чылайӑшне графикпа килӗшӳллӗн хӑпартаҫҫӗ-мӗн, апла пулин те хӑш-пӗр ҫӗрте ӗҫ кая юлса пырать.
Сӑмахран, Шупашкарти Хӗвеллӗ микрорайонта шкул строительствине 50 процента яхӑн пурнӑҫланӑ, шучӗпе ҫак цифра 70 процент пулмалла-мӗн. Ку вӑл — ҫӗртме уйӑхӗн 14-мӗшӗ илсен.
Ҫӗнӗ Шупашкарти Воин интернационалистсен урамӗнче те шкул строительстви кая юлса пырать.
Кӳкеҫри шкула Чӑваш Республикин ипотека корпорацийӗ хӑпартать. Ӗҫе кӑҫалхи чӳк уйӑхӗн 29-мӗшӗ тӗлне вӗҫлемелле. Ҫӗртме уйӑхӗн 14-мӗшӗ тӗлне илсен ӗҫе 60 процент чухлӗ пурнӑҫланӑ, шучӗпе 69 процент таран пулмалла.
Муркаш муниципаллӑ округӗнчи Москакассинче ача пахчи тӑваҫҫӗ.
Ӗҫсем епле пынипе вырӑнти тӳре-шара паллашнӑ. Муниципаллӑ округӑн территорисене хӑтлӑх кӗртессипе тата аталантарассипе ӗҫлекен управлени пуҫлӑхӗ Андрей Мясников хӑй куҫӗпе курса хакланӑ. Унта вӑл планерка та ирттернӗ. Унта подряд организацийӗн пуҫлӑхӗсем хутшӑннӑ.
Рабочисем хальхи вӑхӑтра ача пахчин никӗсне хураҫҫӗ. Ҫак ӗҫе строительсем ҫитес эрнере вӗҫлесшӗн.
Миграци сферинче йӗрке тумалли юлашки вӑхӑтра пӗрмаях калаҫаҫҫӗ. Ҫапла тума мигрантсем тунӑ преступленисен шучӗ ӳсни те хистет.
Пуш уйӑхӗн 26-мӗшӗнче Шалти ӗҫсен министерствин Миграци ыйтӑвӗсемпе ӗҫлекен управлени ӗҫченӗсем Ҫӗнӗ Шупашкарти строительство объектӗнче тӗрӗслев ирттернӗ. Унта ют ҫӗршыв ҫыннисем ӗҫленӗ. Вӗсен ятарлӑ документсем пулман. Вӗсене административлӑ майпа явап тыттарнӑ. Ҫавӑн пек майпа саккуна тата тепре пӑссан вӗсене тӑван тӑрӑхне ӑсатасси пирки пӗлтереҫҫӗ.
Миграци саккунне пӑсакансем пирки ҫынсене йӗрке хуралҫисене систерме ыйтаҫҫӗ.
+9.8 °C