Миграци сферинче йӗрке тумалли юлашки вӑхӑтра пӗрмаях калаҫаҫҫӗ. Ҫапла тума мигрантсем тунӑ преступленисен шучӗ ӳсни те хистет.
Пуш уйӑхӗн 26-мӗшӗнче Шалти ӗҫсен министерствин Миграци ыйтӑвӗсемпе ӗҫлекен управлени ӗҫченӗсем Ҫӗнӗ Шупашкарти строительство объектӗнче тӗрӗслев ирттернӗ. Унта ют ҫӗршыв ҫыннисем ӗҫленӗ. Вӗсен ятарлӑ документсем пулман. Вӗсене административлӑ майпа явап тыттарнӑ. Ҫавӑн пек майпа саккуна тата тепре пӑссан вӗсене тӑван тӑрӑхне ӑсатасси пирки пӗлтереҫҫӗ.
Миграци саккунне пӑсакансем пирки ҫынсене йӗрке хуралҫисене систерме ыйтаҫҫӗ.
Паян 14 сехетре Шупашкартан Шупашкар округӗнчи Ҫӗньяла ҫӳрекен 15-мӗш автобус водителӗ руле итлеттереймен – кювета чӑмнӑ. Ку аэропортран инҫех мар пулса иртнӗ.
Юрать-ха, салонра 2 пассажир кӑна пулнӑ. Вӗсем те, водитель те аманман.
Паян республикӑра юр ҫӑвӑть. Унччен вара асфальт тухнӑччӗ. Ахӑртнех, ҫул-йӗре тасатса тӑракансем пуш уйӑхӗн вӗҫӗнче кунашкаллине кӗтмен – авари пулнӑ ҫӗрте ҫул тасах курӑнмасть. Ҫынсем каланӑ тӑрӑх, унччен маларах унта ҫӑмӑл машина кювета чӑмнӑ.
Паян кӑнтӑрла М-7 ҫул ҫинче тырӑ турттаракан машина икӗ автомобильпе ҫапӑннӑ. Тырӑ сапаланса пӗтнӗ.
Ку пӑтӑрмах Ҫӗрпӳ хулинче, М-7 ҫулӑн 679-мӗш ҫухрӑмӗнче, пулнӑ. КамАЗ «Тойотӑпа» тата «Лада Калинӑпа» ҫапӑннӑ. КамАЗри тырӑ ҫул тӑрӑх сапаланса пӗтнӗ.
Телее, аварире никам та аманман.
Чӑваш Енри хӗрарӑм кутамккара бомба тесе хӑратнӑ. Мускавран Санкт-Петербурга вӗҫсе кайма хатӗрленнӗ самолётра пӑтӑрмах сиксе тухнӑ. Бортпроводниксем ӑна кӗтмен ҫӗтен тӗрӗслеме йышӑннӑ. Ҫапла тума вӗсене пассажирсенчен пӗри хӑйӗн рюкзакӗнче бомба тесе калани хистенӗ.
Хӗрарӑма часах самолётран илсе тухнӑ. Ҫула кайма пуҫтарӑннӑ ҫав этем: «Шӳтлерӗм», — тесе тӳрре тухма хӑтланнӑ.
«Смартавиа» авиакомпанин Мурманскран Мускава килме тухнӑ рейсӗнче те ун пек «шӳтлекен тупӑннӑ». Вӑл ҫын Чӑваш Ен арҫынни пунӑ. 34 ҫулти пассажир тӗлӗшпе пуҫиле ӗҫ пуҫарнӑ.
Паян 10 сехетсенче Шупашкарти «Ҫӗнӗ хула» микрорайонта общество чарӑнӑвӗнче арҫын виллине асӑрханӑ. Вӑл «Иван Прокопьев урмӗ» чарӑнура выртнӑ.
Ҫакна курнӑ ҫынсем каланӑ тарӑх, вырӑна васкавлӑ медпулӑшу ҫитнӗ. Анчах арҫынна пулӑшу кирлӗ пулман – вӑл вилнӗ.
Каярахпа арҫын виллине ритуаллӑ служба ӗҫченӗсем илсе кайнӑ.
Улатӑрти районсем хушшинчи прокуратура вырӑнти 7-мӗш строительство организацийӗ ҫурт-йӗрпе коммуналлӑ хуҫалӑх сферинчи саккуна епле пӑхӑннине тӗрӗсленӗ.
Улатӑрти Мускав урамӗнчи нумай хваттерлӗ ҫуртсенчен пӗрне йӗркеллӗ тытса тӑманни палӑрнӑ. Подъездри хутсенче тирпейсӗр пулнӑ. Отделка, штукатурка, сӑрланӑ сийсем сӗвӗнсе пӗтнӗ, электропӑралуксем яхӑхса кайнӑ.
Йӗркеллӗ ӗҫлеменшӗн 7-мӗш строительство организацине тата пуҫлӑхне явап тыттарӗҫ.
Ӗнер 22 сехет ҫурӑра М-12 ҫул ҫинче, Ҫӗмӗрле районӗнче, «Тойота» машина водителӗ ҫул крлӑ каҫакан арҫын ҫине пырса кӗнӗ. Вӑл 44 ҫулта пулнӑ, Ҫӗмӗрлере пурӑннӑ.
Руль умӗнче Эренпур облаҫӗнчи 30 ҫулти арҫын пулнӑ. Вӑл ӳсӗр пулманни паллӑ.
Халӗ ӗҫ-пуҫа уҫӑмлатаҫҫӗ.
Шупашкарта пурӑнакан ҫамрӑк хӗрарӑм 4 миллион тенкӗсӗр тӑрса юлнӑ. Пӗр самантрах темелле. Ҫав укҫана вӑл кивҫен илсе тултарнӑ.
Маларах хӗрарӑм тӳлевсӗр пӗлтерӳсен сайтӗнче ӗҫ шырани пирки пӗлтерӳ вырнаҫтарнӑ. Кӗҫех шӑнкӑравлакан та тупӑннӑ. Унпа мессенджерсенче пӗринче ҫыхӑну тытнӑ. Ют ҫын хӗрарӑма интернет-магазинсенчен пӗринче укҫа ӗҫлесе илме май пур, тавар туянма укҫа хывмалла, ӑна пысӑк процентпа тавӑрса парӗҫ тесе ӗнентернӗ.
Хӗрарӑм темиҫе банкра кредит илнӗ, пӗлӗшӗнчен укҫа ыйтнӑ, ҫывӑх тусне кивҫен илме ӳкӗте кӗртнӗ. Ют ҫынсене ҫапла майпа 4 миллион тенкӗ ытла куҫарса панӑ.
.
Канаш муниципаллӑ округӗнчи пёр хӗрарӑм ултавҫӑсен аллине икӗ хутчен ҫакланнӑ. Пӗрремӗшӗнче, кӑрлач уйӑхӗнче, вӑл 9 пин те 500 тенкӗсӗр тӑрса юлнӑ, хальхинче – 850 пин тенкӗсӗр.
Ултавҫӑсен аллине 49 ҫулти хӗрарӑм ҫакланнӑ. Хальхинче ӑна такамсем кредит илесшӗн, операцие пӑрахӑҫлас тесен кивҫен илсе шанчӑклӑ счёт ҫине куҫарса пама сӗннӗ. Хӗрарӑм итленӗ. 850 пин тенке ют ҫынсене самантрах куҫарса панӑ.
«Крокус ситипе» юнашар ҫуртра спорт ташши енӗпе Раҫҫей чемпионачӗ иртнӗ. Унта Чӑваш Енрен 5 мӑшӑр хутшӑнма палӑртнӑ.
Террористсем тапӑннӑ вӑхӑтра ӑмӑртура Чӑваш Енри пӗр мӑшӑр тата тренер пулнӑ. Пенӗ сасӑсем илтӗнме пуҫласанах спортсменсем спорт тумӗпех урама эвакуациленнӗ. Тӗп алӑк хупӑ пулнӑран вӗсем отель урлӑ тухнӑ. Хывӑнса тӑхӑнмалли пӳлӗмре вӗсен харпӑр япалисем юлнӑ. Телефонӗсем ҫине шӑнкӑрав каять - апла вӗсем пушарта сиенленмен.
Тепӗр 4 мӑшӑрӑн ӑмӑртӑва паян каймалла пулнӑ, вӗсем билетсем те илсе хунӑ. Раҫҫейри спорт ташшин федерацийӗ ӑмӑрту иртмессине пӗлтернӗ.
+3.3 °C