Чӑваш Енре «Халӑх участковӑйне» суйланӑ. Кӑҫал ку ята Вӑрмар поселокӗнчи Александр Сотников тивӗҫнӗ.
Вӑрмарта участковӑйӗнче вӑл виҫҫӗмӗш ҫул ӗҫлет. Ҫапах кунти икӗ участока кӑна мар, пӗтӗм поселока пӗлет вӑл. Халӗ вӑл пӑхса тӑракан территорире 10 пин ҫын пурӑнать.
Александр Сотников мӗн ачаран полицире ӗҫлеме ӗмӗтленнӗ. Халӗ унӑн аслӑ ывӑлӗ полицейски пуласшӑн, ҫынсене пулӑшасшӑн.
Чӑваш Енре «Пурӑн, чӑваш тӗрри» конкурс малалла пырать. Унӑн теми – «Ачаран пӗлекен эреш».
Пултарулӑх ӑмӑртӑвне Чӑваш наци музейӗ тата Чӑваш Енри хӗрарӑмсен канашӗ ирттереҫҫӗ. Вӗсем ӑстасене, художниксене тата дизайнерсене чӑваш тӗррине тӗпе хурса ача-пӑча валли хальхи вӑхӑтри тум хатӗрлеме сӗнеҫҫӗ.
Паянхи кун тӗлне конкурса Шупашкарти, Элӗк, Йӗпреҫ, Хӗрлӗ Чутай, Сӗнтӗрвӑрри, Етӗрне муниципаллӑ округӗсенчи. Иркутск облаҫӗнчи ӑстасем 17 ӗҫ сӗннӗ. Конкурса пӗр ача пахчи тата 5 шкул хутшӑнма кӑмӑл тунӑ.
Ӗҫсене чӳк уйӑхӗн 15-мӗшӗччен йышӑнӗҫ.
Шӑматкун, юпа уйӑхӗн 14-мӗшӗнче, Муркаш муниципаллӑ округӗнчи Кашмашри культура ҫуртӗнче «Хӗрарӑм, сан умӑнта таятӑп пуҫӑма» республика конкурсӗн финалӗ иртнӗ.
Ун пек конкурс кӑҫалхипе пиллӗкмӗш хут иртет.
Финала 8 муниципаллӑ округри хӗрарӑмсем тухнӑ. Вӗсем — Ҫӗрпӳ, Канаш, Шупашкар, Муркаш, Хӗрлӗ Чутай, Сӗнтӗрвӑрри, Ҫӗмӗрле, Йӗпреҫ тӑрӑхӗсенчен.
Конкурса хутшӑннисем хӑйсен пултарулӑхне тӗрлӗ енӗпе кӑтартнӑ. Муркаш тӑрӑхӗнчи Галина Голубева (вӑл Москакассинчи культура ҫурчӗн заведующийӗ) чӑваш апатне хатӗрлемелли конкурсра хуран кукли тата ҫӳхӳ пӗҫернӗ.
Конкурса хутшӑннӑ кашни хӗрарӑмах тӗрлӗ номинацире чысланӑ.
Шупашкарта нумаях пулмасть «Чӑваш романӗн» ҫӗнтерӳҫине палӑртнӑ. Чӑваш кӗнеке издательстви «Чӑваш романӗ» конкурс ирттерессине, ал ҫырусене ҫӗртме уйӑхӗн 1-мӗшӗччен йышӑнассине эпр унччен пӗлтернӗччӗ-ха. Аса илтерер: унӑн тӗллевӗ – хальхи чӑваш литературине тата пысӑк калӑпӑшлӑ хайлавсене аталантарасси.
«Чӑваш романӗ» литература конкурсӗ ҫулталӑк ытла пынӑ. Конкурса тӑратнӑ ӗҫсемпе жюри членӗсем тимлӗ паллашнӑ хыҫҫӑн Аркадий Русаковӑн «Турхан сӑмахӗ» ал ҫырӑвне пысӑка хурса хакланӑ. Ҫитес ҫул вӑл Чӑваш кӗнеке издательствинче уйрӑм кӗнекен кун ҫути курӗ.
Шупашкар хулинче ҫуралнӑ хӗрарӑм Питӗрти илем конкурсне хутшӑнӗ.
Анастасия Степанова тӑван республикӑра пӗлӳ илнӗ хыҫҫӑн Питӗр хулине тухса кайнӑ. Хӗрарӑм тахҫанах ҫемьеллӗ ӗнтӗ. Вӑл мӑшӑрӗпе тата йышлӑ ачипе савӑнса пурӑнать.
Телейлӗ хӗрарӑм юратнӑ ӗҫӗнче тӑрӑшнипех ҫырлахмасть. Унӑн чун канӑҫӗ шутӗнче — илем конкурсӗсене хутшӑнни те. Кӑҫал вӑл Хӗрлӗ гварди районӗнче иртнӗ илем конкурсӗнче иккӗмӗш «Вице миссис» ята ҫӗнсе илнӗ.
37 ҫути хӗрарӑм хальхинче Питӗр хулинчи илем конкурсне хутшӑнӗ.
Чӑваг патшалӑх университечӗн виҫӗ студенчӗ «Студентсен стартапӗ» пӗтӗм ҫӗршыври конкурсра ҫӗнтернӗ. Вӗсенчен кашниех пӗрер миллион тенке тивӗҫӗ. Унпа вӗсем хӑйсен бизнес-проектне пурнӑҫа кӗртӗҫ.
Вырӑс тата чӑваш филологийӗпе журналистикин факультетӗнче вӗренекен Юлия Данилова «МЧСӑн интерактивлӑ музейӗ» интерактивлӑ проектшӑн гранта тивӗҫнӗ.
Медицина факультетӗнче пӗлӳ илекен Владислав Малыгин кариес профилактикипе ҫӗнӗлле ӗҫлеме ӗмӗтленет. Вӑл усӑллӑ канихвет шухӑшласа кӑларнӑ. Ҫав ҫимӗҫ шӑла сиен кӳмест, кариес пуҫланасран вара хӳтӗлет.
Химипе фармакологи факультечӗн студентки Александра Трофимова вара пӑрҫа йышши пӗр курӑкран герпесран хӳтӗлемелли мазь хатӗрлесшӗн.
Чӑваш Енре «Халӑх дружинникӗ» конкурс иртнӗ. Унта муниципалитет тата хула шайӗнче ҫӗнтернӗ 20 ҫын хутшӑннӑ. Конкурса Юстици ӗҫӗсен патшалӑх служби ШӖМпе пӗрле ирттернӗ.
Пӗрремӗш вырӑна Елчӗк районӗнчи Алексей Тихонов йышӑннӑ. Иккӗмӗш вырӑна Канаш районӗнчи Вячеслав Шпаков тухнӑ. Виҫҫӗмӗш вырӑна вара Элӗк районӗнчи халӑх дружинникӗ Эльвира Иванова йышӑннӑ.
Малти вырӑнсене тухнисене дипломпа тата парнесемпе хавхалантарнӑ.
Чӑваш Енре «Мастер коммуникаций» (чӑв. Коммуникаци ӑсти) конкурс иртӗ. Унта халӑхпа ҫыхӑну тытакан специалистсем хутшӑнӗҫ.
Конкурса Чӑваш Ен Элтеперӗн Администрацийӗ республикӑри тата федераци шайӗнчи ӗҫ тӑвакан органсемпе тата вырӑнти хӑй тытӑмлӑхра тӑрӑшакансемпе пӗрле ирттерет. Унта тӗрлӗ харпӑрлӑхлӑ организацисен специалисчӗсем те хутшӑнма пултараҫҫӗ.
Чӑваш Енре чи лайӑх муниципалитетсене палӑртнӑ. Республикӑн влаҫ органӗсен порталӗнчи хыпар тӑрӑх хакласан, маттуррисене 2022 ҫулхи ӗҫ тухӑҫлӑхӗшӗн палӑртнӑ.
Хула округӗсенчен пӗрремӗш вырӑна Шупашкар хули тухнӑ. Ӑна 2,7 миллион тенкӗ грант парса хавхалантарӗҫ.
Муниципалитет округӗсенчен Ҫӗрпӳ тӑрӑхӗ пӗрремӗш вырӑн йышӑннӑ, Красноармейски — иккӗмӗш. Пӗрремӗшне ӑна 4 миллион тенкӗ тивӗҫӗ, иккӗмӗшне — 3,2 млн тенкӗ.
Шупашкарти 165-мӗш ача пахчи ҫӗршыври чи лайӑх 100 ача пахчи шутне кӗнӗ. Ӑна «Тӗслӗх ача пахчи» пек федераци реестрне те кӗртнӗ.
Чи лайӑххисене суйланӑ чухне мӗн шута илнӗ-ха? Вӗренӳ пахалӑхне, инфратытӑма, педагогсен профессионаллӑхне, канӑва мӗнле йӗркеленине тата ачасен сывлӑхне упрама пулӑшакан мероприятисене ирттернине шута илнӗ.
-10.7 °C