Нумай хваттерлӗ ҫуртсенче пурнӑкансенчен 2014 ҫултанпа тӗплӗ юсавшӑн укҫа пуҫтарма тытӑнчӗҫ. Унӑн виҫи хваттер лаптӑкӗнчен килет. Чи малтанах, саккун вӑя кӗрсенех, пӗр тӑваткал метршӑн 5 тенкӗ те 20 пус кӑларса хумаллаччӗ. Кайран хак 6 тенкӗ те 30 пуса ҫитрӗ. Ҫитес ҫул хака 3,7 процент ӳстерсе 6 тенкӗ те 53 пуса ҫитересшӗн.
Паян Чӑваш Ен Министрсен Кабинечӗн ларӑвӗ иртнӗ. Унта тухса калаҫнӑ строительство, архитектура тата ҫурт-йӗрпе коммуналлӑ хуҫалӑх министрӗн тивӗҫӗсене пурнӑҫлакан Александр Героев сӗннипе Правительство пайташӗсем килӗшнӗ, вӗсем хака ӳстерес тенӗ. Тӗплӗ юсав укҫине юлашки икӗ ҫулта ӳстерменнине те палӑртмалла.
Паян Чӑваш Ен Правительствине отставкӑна янӑ. Ҫакӑн пек хушӑва республикӑн Элтеперӗ Олег Николаев должноҫе йышӑннӑ хыҫҫӑн алӑ пуснӑ. Ӗҫлӗ хута республикӑн влаҫ органӗсен официаллӑ порталӗнче вырнаҫтарнӑ.
Тӳрех палӑртар: асӑннӑ йышӑнӑва Чӑваш Ен Конституцийӗн 72-мӗш тата 91-мӗш статийӗсемпе килӗшӳллӗн тунӑ. Тепӗр майлӑ каласан, Элтепер должноҫне йышӑнсан Правительствӑна отставкӑна ямалла. Ӑна ҫӗнӗрен йӗркеличчен унчченхи йышӑн малтанхиллех ӗҫлемелле.
Паянах Олег Николаев тепӗр хушӑва та алӑ пуснӑ. ЧР Министрсен Кабинечӗн Ертӳҫи пулма вӑл хӑйне ҫирӗплетнӗ.
Паян Чӑваш Ен сывлӑх министрӗн ҫумӗ пулма ҫӗнӗ ҫынна ҫирӗплетнӗ. Аса илтерер: унччен ҫав должноҫе йышӑннисенчен пӗрне, Владимир Дубова, авӑн уйӑхӗн 9-мӗшӗнче ӗҫрен хӑтарнӑччӗ. Хыҫҫӑнах ӑна Республикин психатри пульницине ертсе пыма шанчӗҫ.
Паян министрӑн ҫумӗ пулма Ирина Лисенковӑна ҫирӗплетнӗ. 2004 ҫулхи ҫӗртме уйӑхӗнчен пуҫласа 2009 ҫулхи юпа уйӑхӗччен вӑл Правительство ҫуртӗнче ӗҫленӗ-ха. Ун чухне сывлӑх сыхлав тата социаллӑ аталану министрӗн ҫумӗ пулнӑ. Кайран Республикӑн стоматологи поликлиникинче йӗркелӳпе методика пӳлӗмӗн заведующийӗнче тӑрӑшнӑ. Аслӑ категориллӗ врач. Чӑваш Республикин тава тивӗҫлӗ врачӗ вӑл ята 2010 ҫулта тивӗҫнӗ.
Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев суйлава пӗтӗмлетме журналистсене брифинга пухсан Правительство тытӑмӗнче улшӑнусем кӑштах пулма пултарассине пӗлтернӗччӗ.
Ӗнер ун пек пӗр йышӑну пулчӗ те. Промышленность тата энергетика министрӗ пулма Олег Николаев Евгений Герасимова шанчӗ. Вӑл Воронежри «Масловский» индустри паркӗн коммерци директорӗнче ӗҫленӗ. Унччен вӑл «Четра-Промышленные машины» акционерсен уҫӑ обществинче суту-илӳ пайӗн пуҫлӑхӗнче тӑрӑшнӑ, Ҫӗнӗ Шупашкарти «Дехим» обществӑн учредителӗ тата директорӑн ҫумӗ пулнӑ.
Министр тивӗҫне пӗр вӑхӑт пурнӑҫланӑ Сергей Лекарева министр ҫумӗ пулма куҫарнӑ. Паян асӑннӑ министертсвӑра тата тепӗр кадр улшӑнӑвӗ пулса иртнӗ. Министр ҫумӗ пулса ӗҫленӗ Николай Голубцова ӗҫрен кӑларнӑ.
Паян Чӑваш Ен Правительствинче кадрсемпе ҫыхӑннӑ темиҫе йышӑну пулса иртнӗ.
Пӗрремӗшӗнчен, республикӑн промышленность тата энергетика министрӗн тивӗҫӗсене пурнӑҫланӑ Сергей Лекарева ӗҫрен хӑтарнӑ.
Министр пулма республика Элтеперӗн тивӗҫӗсене вӑхӑтлӑх пурнӑҫлакан Олег Николаев министр пулма Евгений Герасимова шаннӑ. Хушӑва республикӑн влаҫ органӗсен официаллӑ порталӗнче вырнаҫтарнӑ.
Тепӗр йышӑну та пур унта. Маларах асӑннӑ Сергей Лекаревпах ҫыхӑннӑ вӑл. Ӑна промышленность тата энергетика министрӗн ҫумӗ пулма шаннӑ.
Пурӑнан пурнӑҫра тӗрлӗ ыйтӑва татса пама тивет. Куҫман пурлӑха регистрацилес тесен те вун-вун япала пӗлмелле. Кун пек ыйтусене Росреестрӑн Чӑваш Енри управленийӗнче уҫӑмлатма май пур.
Авӑн уйӑхӗн 17-мӗшӗнче Росреестрӑн Чӑваш Енри управленийӗ РФ Президенчӗн Шупашкарти Ленинград урамӗнчи 36-мӗш ҫуртри йышӑну пӳлӗмӗнче, 2-мӗш хутра, граждансене йышӑнӗ. Асӑннӑ ҫуртра нумай пулӑшу кӳрекен центр (вырӑсла унӑн аббревиатури МФЦ) вырнаҫнипе те тупма ҫӑмӑл.
Хваттерпе пӳрте, ҫӗрпе гаража регистрацилес тата ытти ҫавӑн йышши самантсене Росреестрӑн Чӑваш Енри управленийӗн ертӳҫин ҫумӗӗ Татьяна Васильева уҫӑмлатӗ. Ҫынсене вӑл 15 сехетрен пуҫласа 17 сехетчен пулӑшӗ. Йышӑнӑва кайиччен 8 (8352) 62-22-33 тата 39-36-83 телефон номерӗсемпе
ҫырӑнмалла.
Чӑваш Республикин Конкурентлӑ политика тата тариф службин ертӳҫин ҫумне ҫирӗплетнӗ. Ҫакӑн ҫинчен калакан йышӑнӑва Чӑваш Ен Министрсен Кабинечӗн Ертӳҫи паян алӑ пуснӑ.
Чӑваш Республикин конкурентлӑ политика тата тариф службин ертӳҫин ҫумӗ пулма Надежда Евлампиевӑна шаннӑ.
Асӑннӑ службӑн ертӳҫи пулма кӑҫалхи пуш уйӑхӗнче Надежда Колебановӑна ҫирӗплетнӗ. Маларах Шупашкар хула администрацийӗн пуҫлӑхӗн ҫумӗ пулса ӗҫленӗ. Халӗ унӑн икӗ ҫум: Алина Елисеева тата Надежда Евлампиева.
Чӑваш Ен Сывлӑх сыхлав министрӗн ҫумне Владимир Дубова ӗҫрен кӑларнӑ. Хушӑва республикӑн влаҫ органӗсен официаллӑ порталӗнче вырнаҫтарнӑ. Документа Олег Николаев паян алӑ пуснӑ.
Владимир Дубов Чӑваш патшалӑх университетӗнчи медицина факультетӗнче вӗреннӗ. Аслӑ шкула вӑл хӗрлӗ дипломпа пӗтернӗ. Унтах ординатурӑра ӑс пухнӑ. Медицина наукисен кандидачӗ.
Владимир Дубов ЧПУра та, тӗрлӗ пульницӑра та тӑрӑшнӑ. 2018 ҫулхи утӑ уйӑхӗн 27-мӗшӗнче ӑна республикӑн ун чухнехи премьер-министрӗ Иван Моторин сывлӑх сыхлав министрӗн ҫумӗ пулма шаннӑччӗ.
Авӑн уйӑхӗн 1-мӗшӗнче, Пӗлӳ кунӗнче, пирӗн республикӑра эрех суттармӗҫ.
Ача-пӑчапа ҫыхӑннӑ уяв кунӗсенче эрех-сӑрана ваккӑн сутма чарасси ҫинчен калакан йвшӑнӑва республикӑн Министрсен Кабинечӗ 2012 ҫулхи чӳк уйӑхӗн 12-мӗшӗнчех кӑларнӑ. Вӑл паян та хӑйӗн вӑйне ҫухатман.
Юлашки шӑнкӑрав, Ҫамрӑксен кунӗ йышши уявсенче лавккасенче эрех сутмаҫҫӗ. Район центрӗсемпе хуласенче ҫеҫ мар, ялтисем ие ҫав кун тытӑнса тӑраҫҫӗ.
Пӗлӳ кунӗ пулин те эрех-сӑрана кафе-ресторанта ирӗклӗнех туянма пулать. Тепӗр майлӑ каласан, общество апатланӑвӗн предприятийӗсенче эрех-сӑра туянма май килӗ.
Чӑваш Енри АПК ветеранӗсен канашӗн пайташне Валентин Агафонова «Чӑваш Республики умӗнчи тава тивӗҫлӗ ӗҫсемшӗн» орденпа наградӑлама йышӑннӑ. Хушӑва паян, ҫурла уйӑхӗн 20-мӗшӗнче, Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев алӑ пуснӑ.
Валентин Агафонов 1935 ҫулхи ҫурла уйӑхӗн 24-мӗшӗнче Пӑрачкав районӗнчи Выползово ялӗнче ҫуралнӑ. Чӑваш ял хуҫалӑх академийӗнче, Общество ӑслӑлӑхӗсен академийӗнче вӗреннӗ. Малтан Ҫӗрпӳри опытлӑ ял хуҫалӑх станцийӗнче ӗҫленӗ, парткомпа райком тытӑмӗсенче тӑрӑшнӑ. Чӑваш Енӗн ял хуҫалӑх министрӗн ҫумӗ тата министрӗ пулса ӗҫленӗ. ЧР Министрсен Кабинечӗ Ертӳҫин пӗрремӗш ҫумӗ пулнӑ. РСФСР Верховнӑй Совечӗн депутатне суйланнӑ. Унта вӑл Верховнӑй Совет ертӳҫин ҫумӗ те пулнӑ. Патшалӑх Думин депутатне те суйланӑ.
+0.3 °C