Чӑваш Енри 17 ҫулти каччӑ ҫынсене улталаса пурӑннӑ. Ӑна нумаях пулмасть тытса чарнӑ. Кун пирки Тутарстанри ШӖМ пӗлтерет.
Кӳршӗ республикӑра Лениногорск хулинче пурӑнакан 20 ҫулти каччӑ полицие пырса хӑй ултавҫӑсен аллине ҫакланни пирки каласа кӑтартнӑ. Вӑл пӗлтернӗ тӑрӑх, укҫа ӗҫлесе илес тенӗ, мессенджерта ушкӑн та тупнӑ.
Ун патне тӳрех «консультант» ҫырнӑ. Хайхискер ӑна питӗ ӑннине, вӑл укҫа выляса илме пултарнине пӗлтернӗ.
20-ри каччӑ сумма пирки илтсен йӑлтах манса кайнӑ тейӗн, ҫав шутра -вӑл нимӗнле лотерейӑна, конкурса хутшӑнманни пирки те. Анчах ӑна 5 пин комисси тӳлемеллине пӗлтернӗ. Тӳлесен вара, паллах, нимӗнле укҫа та выляса илмен вӑл.
Ҫак ӗҫе Чӑваш Енри 17 ҫулти каччӑ тунӑ тесе шутлаҫҫӗ, ӑна тытса чарнӑ, ун тӗлӗшпе пуҫиле ӗҫ пуҫарнӑ.
Паян Росгвардин Чӑваш Енри управленийӗн ҫӗнӗ пуҫлӑхӗпе республика Элтеперне Олег Николаева паллаштарнӑ. Чӑваш Ен Правительство ҫуртӗнчи тӗлпулӑва Раҫей Федерацийӗн наци гвардийӗн пуҫлӑхӗн Атӑлҫи тӑрӑхнчи ҫарӗсен ведомствӑлла мар хурала тата лицензипе ирӗк паракан ӗҫе йӗркелесе пыракан пуҫлӑхӗн ҫумӗ Павел Дегтярёв хутшӑннӑ.
Росгвардин Чӑваш Енре управленине Дмитрий Расчетов ертсе пырӗ. Ӑна ҫак должноҫе Раҫҫей Федерацийӗн Президенчӗн ака уйӑхӗн 12-мӗшӗнчи Хушӑвӗпе ҫирӗплетнӗ.
Дмитрий Расчетов РФ Шалти ӗҫсен министерствин Барнаулти юридици институтӗнчен вӗренсе тухнӑ. Шалти ӗҫсен органӗсенче 2000 ҫулсенче ӗҫлеме тытӑннӑ. 2014 ҫулта Алтай Республикинчи ведомствӑлла мар хурал пайне ертсе пыма тытӑннӑ. 2016 ҫулхи юпа уйӑхӗнченпе Росгвардин Алтай Республикинчи упралвенине ертсе пынӑ.
Ҫу уйӑхӗн 13-мӗшӗнче Шупашкарта пурӑнакан пӗр ҫын йӗрке хуралҫисенчен пулӑшу ыйтнӑ. 50 ҫулти арҫын пакунлисене ӑнлантарнӑ тӑрӑх, нумай хваттерлӗ ҫуртри подъездри хуҫалӑх блокӗнче икӗ велосипед тата электросамокат упранӑ. Ирпе тӑрать те — подъездра хӑварнӑ пурлӑх ҫуккине асӑрхать.
Оперативлӑ шырав вӑхӑтӗнче пӗр велосипеда тупма май килнӗ. Вӑл преступлени вырӑнӗнчен инҫе мар пулнӑ.
Пакунлисем халӗ вӑрра шыраҫҫӗ. Вӗсем шухӑшланӑ тӑрӑх, велосипедпа электросамоката видеокамера тӗлне лекнӗ каччӑ йӑтса кайма пултарнӑ.
Вӑрмарта тӑватӑ хваттерлӗ ҫурт ҫунса кайнине Чӑваш халӑх сайчӗ пӗлтернӗччӗ-ха. Хыпар авторӗ пушар ҫу уйӑхӗн 12-мӗшӗнче тухнӑ тесе хыпарланӑччӗ те, Чӑваш Енӗн Шалти ӗҫсен министерствин сайтӗнче пӑтӑрмах ҫу уйӑхӗн 11-мӗшӗнче каҫхи 10 сехетре пулнине пӗлтернӗ. Аса илтерер: инкекре тӑватӑ ҫемье килсӗр-ҫуртсӑр тӑрса юлнӑ.
Асӑннӑ ҫӑлкуҫра ҫырнӑ тӑрӑх, ҫурта 37 ҫулти арҫын чӗртсе яма пултарнӑ. Ӑна йӗрке хуралҫисем тытса чарнӑ. Вӑл арҫынна административлӑ майпа темиҫе хутчен те явап тыттарнӑ иккен, анчах ҫав этем унччен судпа явап тытса курман. Хальхинче ун тӗлӗшпе РФ Пуҫиле кодексӗн 167-мӗш статйин 2-мӗш пайӗпе килӗшӳллӗн ӗҫ пуҫарнӑ.
Муркашра 71 ҫулти арҫын 5 ҫулти ачана машинӑпа таптанӑ.
Чӑваш Енӗн Шалти ӗҫсен министерствин пресс-службинче пӗлтернӗ тӑрӑх, инкек ӗнер, ҫу уйӑхӗн 11-мӗшӗнче, 17 сехетре Коммуналлӑ урам картишӗнче пулса иртнӗ.
5 ҫулхи хӗрачапа кукашшӗ (тен, аслашшӗ-тӗр. Вырӑсла «дедушка» тесе ҫырнӑ) ача пахчинчен таврӑннӑ. Ҫав вӑхӑтра ача ҫине «ГАЗ-2752» автомобиль пырса кӗнӗ. Унӑн рулӗ умӗнче 71 ҫулти арҫын пулнӑ. Суранланнӑ ачана пульницӑна илсе кайнӑ.
Микроавтобус водителӗ инкек вӑхӑтӗнче урах пулнӑ.
Шупашкарта пурӑнакан 45 ҫулти хӗрарам онлайн майпа билет туянас тесе укҫи-тенкине ултавҫӑсене куҫарса панӑ. Кун пирки ШӖМ пӗлтерет.
Ӗнер, ҫу уйӑхӗн 9-мӗшӗнче, ҫак хӗрарӑм полицие пулӑшу ыйтма пынӑ. Вӑл пӗр сайтра авиабилет туянас тенӗ те унӑн банк картти ҫинчен 35 пин тенкӗ ҫухалнӑ.
Кун тӗлӗшпе пуҫиле ӗҫ пуҫарнӑ. Халӗ полицейскисем ҫав ултавҫӑ кам пулнине палӑртас тӗллевпе ӗҫлеҫҫӗ.
Паян, ҫу уйӑхӗн 3-мӗшӗнче, ирхине 7 сехетре Етӗрне ҫулӗ ҫинче Заовражнӑй ҫул пӑрӑнӑшӗ патӗнче авари пулнӑ. ШӖМ малтанлӑха пӗлтернӗ тӑрӑх, «Нива» рулӗ умӗнче ларнӑ 69 ҫулти арҫын транспорт хирӗҫ килекен ҫул ҫине тухнӑ та «Шевролене» лектернӗ, унтан «Ниссанпа» ҫапӑннӑ. Кайран «Ниссан» ҫине «Калина» пырса кӗнӗ.
Аварире суранланнӑ 7 ҫынна пульницӑна илсе кайнӑ. Вӗсен йышӗнче – 3 ҫулти хӗрача тата 1 ҫулти арҫын ача. Ачасен, телее, сурансем пысӑках мар. Вӗсене водительсем ятарлӑ ларкӑч ҫинче илсе ҫӳренӗ.
Ака уйӑхӗн 23-мӗшӗнче пӗрисем банк офисӗнчен тухакан ҫыннӑн укҫине туртса илнӗ. Пӑтӑрмах 14 сехет те 50 минут тӗлӗнче пулса иртнӗ. Шар курнӑ арҫын йӗрке хуралҫисене ӗнентернӗ тӑрӑх, йӑлтах кӗтмен ҫӗртен пулса иртнӗ.
Перекет банкӗн Ленин проспектӗнчи 28-мӗш ҫуртӗнчи офисӗнчен (вӑл «Мир Луксор» кинотеатра хирӗҫ вырнаҫнӑ) тухакан арҫыннӑн 42 пин тенкине хӗрарӑмпа арҫын туртса илнӗ те сиккипе тарнӑ. Арҫын хыҫран хӑваланӑ-ха, анчах лешсем 44-мӗш маршрутпа ҫӳрекен транспорта кӗрсе ларса Николаев чарӑнӑвӗ енне кайнӑ.
Ака уйӑхӗн 21-мӗшӗнче, каҫ енне, тата тӗрӗсрех каласан, 17 сехет тӗлӗнче, Шупашкара хӗвеланӑҫ енчен кӗнӗ тӗлте инкек пулса иртнӗ. Халӗ ҫав тӗслӗхпе пуҫиле ӗҫ пуҫарнӑ. Кун пирки Чӑваш Енӗн Шалти ӗҫсен министерствинче пӗлтернӗ.
Малтанласа шухӑшланӑ тӑрӑх, «Порше-Кайен» автомобиль водителӗ пӑрӑннӑ чухне хирӗс килекен ҫул ҫине тухса кайнӑ. Ҫулӑн ҫав енӗпе 58 ҫулти водитель тытса пыракан «Рено-Дастер» автомобиль пынӑ . Вӑл инкек вырӑнӗнчех вилсе кайнӑ. «Порше-Кайен» автомобильти виҫӗ ҫынна – икӗ арҫынпа хӗрарӑма — пульницӑна илсе кайнӑ.
Асӑннӑ машина водительне ҫул-йӗр правилине пӑснӑшӑн административлӑ майпа пӗлтӗр 24 хутчен явап тыттарнӑ. Машинӑри ҫынсенчен пӗри те эрех ӗҫнипе ӗҫменнине тӗрӗслеттерме килӗшмен.
Шупашкарта пурӑнакан 29 ҫулти хӗрарӑм ултавҫӑсене 643 пин тенкӗ куҫарса панӑ.
Малтан ун патне пӗр арҫын шӑнкӑравланӑ, хӑйӗнпе Шалти ӗҫсен министерствин ӗҫченӗ тесе паллаштарнӑ. Ҫавскер хӗрарӑмӑн банки картти ҫинчен такамсем укҫа вӑрлама хӑтланнине ӗнентернӗ, ултавҫӑсене тытса чарма пулӑшма ыйтнӑ. Кайран тата тепӗр ҫын шӑнкӑравланӑ. Вӑл хӑйӗнпе прокуратура ӗҫченӗ тесе паллаштарнӑ. Хайхи этем хӗрарӑма мӗнпур укҫана хӑрушсӑр счет ҫине куҫарма сӗннӗ. Каланӑ — тунӑ: 29-ти хӗрарӑм 188 пин тенке куҫарса та панӑ. Ултавҫӑсем унпах ҫырлахман-ха. Хӗрарӑма 455 пин тенкӗлӗх кредит илме ыйтнӑ. Ӑна та хӗрарӑм паллӑ мар счет ҫине ӑсатнӑ.
Хӑйне шӑнман пӑр ҫине лартса янине хӗрарӑм виҫӗ кунтан ҫеҫ ӑнланса илнӗ.
+0.3 °C