Паян Чӑваш Республикин Министрсен Кабинечӗн Председателӗн ҫумне — строительство, архитектура тата ҫурт-йӗрпе коммуналлӑ хуҫалӑх министрне ҫирӗплетнӗ. Ку должноҫре пулма Павел Данилова шаннӑ.
Павел Владимирович Шупашкарта 1974 ҫулхи утӑ уйӑхен 25-мӗшӗнче ҫуралнӑ. Ҫемьеллӗ. Мӑшӑрпе виҫӗ ача ӳстереҫҫӗ.
Павел Данилов Г.В. Плеханов ячӗллӗ Раҫҫей экономика университетӗнче «Финанс тата кредит» специальноҫа алла илнӗ. 2011-2013 ҫулсенче иккӗмӗш аслӑ пӗлӳ илнӗ. Экономика наукисен кандидачӗ.
Павел Данилов юлашки ҫулсенче «Раҫҫей Стройминӗн проект дирекцийӗ» автономи учрежденине ертсе пынӑ. Мускавран килнӗ пулин те Чӑваш Еншӗн ют мар. Вӑл кунта ҫуралнӑ, 2000-мӗш ҫулсенче Шупашкар хула администрацийӗн пуҫлӑхӗн Анатолий Емельяновӑн финанспа экономика енӗпе ҫумӗ пулса ӗҫленӗ.
Шупашкрати Гагарин урамӗнчи ача-пӑча поликлиники малашне пациентсене ҫӗнӗ адреспа йышӑнма пуҫлӗ. Кун пирки Хулан 2-мӗш пульници пӗлтерет.
ЧР Сывлӑх сыхлавӗн хушӑвӗпе килӗшӳллӗн, Гагарин урамӗнчи ача-пӑча поликлиники Хулан 2-мӗш пульницин йышӗнчен тухӗ. Ҫу уйӑхӗн 1-мӗшӗнчен вӑл Хулари ача-пӑча клиника пульницин «5-мӗш ача-пӑча пульници» пулӗ.
Пӗчӗк пациентсен тепӗр уйӑхран Ленин проспектӗнчи 12-мӗш ҫурта пымалла. Специалистсем вӗсене унчченхи графикпех йышӑнӗҫ. Ҫу уйӑхне ҫырӑннӑ ачасене те ҫавӑн пекех йышӑнӗҫ.
Шупашкарта пурӑнакан, унччен судпа айӑпланман 21 ҫулти каччӑна йӗрке хуралҫисем тытса чарнӑ. Унран 200 грамм ытла наркотик туртса илнӗ.
Каччӑ Кӗремечке станцийӗ ҫывӑхӗнче вӑрттӑн вырӑна наркотик хума хӑтланнӑ. Ҫав вӑхӑтра ӑна полицейскисем тытса чарнӑ. Ун ҫумӗнче пулнӑ полимерлӑ хутаҫра 3,75 грамм ытла наркотик пулнӑ. Ку – пысӑк виҫе.
Кинолог пулӑшнипе унӑн хваттерӗнче те ухтарнӑ. Унта та тӗркесем тупнӑ. Унта метилэфедрон – 228,96 грамм, кокаин 0,43 грамм пулнӑ. Ҫакӑ паллӑ: каччӑ вӑрттӑн вырӑнсене наркотик хурассипе нумай вӑхӑт ӗҫленӗ.
Ҫакна каламалла: 21 ҫултискер – спорт мастерӗн кандидачӗ. Ку ӗҫшӗн ӑна тӗрмене 20 ҫул таран хупма пултараҫҫӗ.
Паян Шупашкара Ҫӗнтерӳ пуйӑсӗ ҫитнӗ. Вӑл кунта нумаях пулмӗ, паянах, 16 сехетре, тапранса малалла кайӗ.
«Ҫӗнтерӳ пуйӑсӗ» сайтра пӗлтернӗ тӑрӑх, Хусанта, Шупашкарта тата Муромра куҫса ҫӳрекен музея шкул ачисем тата студентсем ҫеҫ кӗме пултарни пирки пӗлтернӗ. Ушкӑнсене вӗренӳ тата ҫамрӑксен политикин управленийӗн органӗсен йӗркелемелле.
Паян экспозиципе ЧР Элтеперӗ Олег Николаев та паллашнӑ. Унпа пӗрле транспорт министрӗ Владимир Осипов, журналистсем пулнӑ. Паян пуйӑс патӗнче черет пулнӑ. Ушкӑнсене 12-шер ҫын кӗртнӗ.
Пуйӑса лекес тесен маларах ҫырӑнмалла пулнӑ.
«Звезда» телеканал Чӑваш Республикин тӗп хулипе паллаштаракан кӑларӑм хатӗрленӗ. Телепередачӑна эфира ҫул уйӑхӗн 1-мӗшӗнче кӑларӗҫ.
Канмалли кунсене асра юлмалла ирттерес тесен ӑҫта кайма пулать? Ик кунлӑх ҫулҫӳревпе ӑҫта ҫитсен аван? Чи кӑсӑклине кӗске вӑхӑтра курса мӗнле ӗлкӗрмелле? Ҫак ыйтусен хуравне «Круиз-Контроль» проект ертӳҫи Юлия Розенберг шыранӑ. Телекуравҫӑсене вӑл чи кӑсӑклӑ маршрутсемпе паллаштарӗ, ҫитсе курма тӑракан паллӑ вырӑн ҫинчен каласа кӑтартӗ, ӑҫта апатланма тата ҫӗр каҫма май пуррине те пӗлтерӗ.
Телеканал икӗ хулара ӳкернӗ: кӳршӗллӗ Мари Элӑн тӗп хулинче Йошкар-Олара тата пирӗн шурӑ Шупашкарӑмӑрта.
Программӑна ҫу уйӑхӗн 1-мӗшӗнче «Звезда» телеканалӑн эфирӗнче, 10 сехет те 10 минутра, кӑтартӗҫ.
Паян ҫӗрле Шупашкарти пӗр ҫурт подъездӗнче ватӑ арҫын виллине тупнӑ. Ӑна ҫынсем асӑрханӑ.
Ку инкек Пролетари урамӗнчи 4-мӗш ҫуртра, ҫӗнӗ кӑнтӑр районӗнче, пулнӑ. Подъездра арҫын хускалмасӑр выртнине ҫынсем асӑрханӑ та кун пирки полицие пӗлтернӗ. Вырӑна йӗрке хуралҫисем, следовательсем ҫитнӗ.
Ҫакӑ паллӑ: арҫын 80 ҫулта пулнӑ. Халӗ РФ Следстви комитечӗн Чӑваш Енри следстви органӗсем кун тӗлӗшпе следстви умӗнхи тӗрӗслев ирттереҫҫӗ. Ҫакӑн хыҫҫӑн тин арҫын мӗншӗн вилнине палӑртӗҫ. Ведомство ӑна пусмӑрласа вӗлернӗ йӗр пуррине палӑртман.
Мускаври артист Сӑр тата Хусан хӳтӗлев чиккисене чавнисене хисеплесе опера хатӗрлес шухӑшлӑ. Кун пирки ӑна Чӑваш Республикинчи симфони капеллин илемлӗх ертӳҫи Морис Яклашкин сӗннӗ иккен. Ҫапла пӗлтернӗ Раҫҫей халӑх артисчӗ, П.И. Чайковский ячӗллӗ Мускаври патшалӑх консерваторийӗн кафедрин заведующийӗ, Мускаври патшалӑх филармонийӗн илемлӗх ертӳҫи Александр Чайковский паян, ака уйӑхӗн 27-мӗшӗнче, Чӑваш Ен Элтеперӗпе Олег Николаевпа ЧР Правительство ҫуртӗнче тӗл пулсан.
Енсем Сӑр тата Хусан хӳтӗлев чиккисене тунисене хисеплесе опера хатӗрлес ыйтӑва сӳтсе явнӑ. «Чӑваш Енре эпӗ иккӗмӗш кун. Ҫак вӑхӑтра нумай ҫынпа тӗл пулса калаҫма, кирлӗ информацие пӗлме ма килчӗ. Хӳтӗлев чиккисене чавма хутшӑннӑ ҫынсем пирӗн хушӑмӑрта пурри уйрӑмах аван. Вӑл спектакль еплерех пуласине эпӗ ӑнланма пуҫларӑм. Унта нумай пӗчӗк эпизод, тӗрлӗ истори пултарас килет», — тенӗ вӑл.
Композитор спектакле чӑваш юррисене те кӗртме палӑртать.
Ака уйӑхӗн 26-мӗшӗнче Шупашкарти Гагарин урамӗнчи 22-мӗш ҫурт ҫывӑхӗнче «Киа Рио» машина 11 ҫулти хӗрачана ҫапса хӑварнӑ. Водитель вырӑнтан тарнӑ.
Хӗрача «зебра» патӗнче ҫул урлӑ каҫнӑ. Ҫав вӑхӑтра ун ҫине машина пырса кӗнӗ. Водитель ачан сывлӑхӗ пирки ыйтса пӗлес тесе самантлӑха чарӑннӑ. Кайран малалла кайнӑ.
Каярахпа ашшӗ-амӑшӗ хӗрачана пульницӑна илсе кайнӑ. Унӑн чӗркуҫҫи кӑштах аманнӑ. Инкек хыҫҫӑн темиҫе сехетренех ҪҪХПИ инспекторӗсем руль умӗнче ларнӑ хӗрарӑма шыраса тупнӑ. 32 ҫултискер тӗлӗшпе административлӑ протокол ҫырнӑ.
Шупашкарта 5-мӗш хутран ӳкнӗ арҫын ачана тытса ӗлкӗрнӗ Вениамин Егорова Шупашкар хула администрацийӗ чысланӑ. Аса илтерер: ака уйӑхӗн 15-мӗшӗнче Мир проспектӗнче чӳречерен ӳкнӗ 5 ҫулти арҫын ача ӑна пула чӗрӗ юлнӑ, вӑйлах суранланман.
Хула администрацийӗн пуҫлӑхӗ Алексей Ладыков тата хула пуҫлӑхӗ Алексей Кортунов арҫын паттӑр пулнине палӑртнӑ. Ӑна тав ҫырӑвӗпе, парнесемпе чысланӑ. Ҫав йышра – хула сӑнне ӳкернӗ картина.
Вениамин Егоров хӑй те ача ашшӗ, унӑн ывӑл ӳсет. Вӑл ашшӗ-амӑшне тимлӗрех пулма сӗннӗ, пӗччен хӑвармалла марри пирки асӑрхаттарнӑ.
Шупашкарти килсӗр-ҫуртсӑр арҫын, 57 ҫултискер, ача кӳмине вӑрланӑ та унпа усӑ курнӑ. Ҫук, унӑн ача пулман. Вӑл унпа ӑпӑр-тапӑр турттарнӑ.
Суд ҫак арҫын айӑплӑ тесе йышӑннӑ. Следстви уҫӑмлатнӑ, суд палӑртнӑ тӑрӑх, вӑл ӑна ҫурла уйӑхӗн 19-мӗшӗнче Сапожников урамӗнчи пӗр ҫурт тамбурӗнчен вӑрланӑ. Кӳме 20 пин тенкӗ тӑнӑскер пулнӑ.
Темиҫе кунран вӑрра тытса чарнӑ, анчах кӳмене тупайман. Арҫын йӑлтах каласа кӑтартнӑ: вӑл унпа урапа евӗр усӑ курнӑ, ҫӳп-ҫап контейнерӗнче тимӗр-тӑмӑр тупнӑ та кӳме ҫине хурса килнӗ.
Арҫыннӑн 1 ҫул патшалӑхшӑн ӗҫлеме тивӗ. Ӗҫ укҫин 10 процентне тытса юлӗҫ.
+1.3 °C