И.Н. Ульянов ячӗллӗ ЧПУ студенчӗсем хӑйсен проекчӗсене пурнӑҫа кӗртме 1-шер миллион тенке тивӗҫнӗ.
Ҫак йыша 7 ҫамрӑк лекнӗ. Вӗсем Пӗтӗм Раҫҫейри «Студентсен стартапӗ» конкурсра ҫӗнтернӗ.
1 миллион тенкӗ тивӗҫнисен йышӗнче – Дарья Тихонова (экономика факультечӗ), Антон Фисунов (ИВТ факультечӗ), Марина Илларионова (управлени тата социаллӑ технологисен факультечӗ), Екатерина Иванова (экономика факультечӗ), Дмитрий Потапов (хушма математика, физика тата информаци технологийӗсен факультечӗ), Евгений Михайлов (юридици факультечӗ), Александра Кармалова (экономика факультечӗ). Вӗсем ҫитес вӑхӑтра ку укҫапа хӑйсен проекчӗсене пурнӑҫа кӗртӗҫ.
Шупашкар округӗнчи Бичурин музейне юсаса ҫӗнетнӗ. Халӗ унта вырӑн та нумайланнӑ.
Кӳкеҫри «Бичурин тата хальхи самана» музея кӑҫал ҫуркунне ҫӗнетме тытӑннӑ. Кун хыҫҫӑн унта хӑйне евӗр экспонатсене упрамалли ҫӗнӗ вырӑнсем тупӑннӑ. Сӑмах май, музейра хальхи вӑхӑтра 12 пин ытла экспонат упранать.
Палӑртса хӑварар: музея юсаса ҫӗнетме республика хыснинчен 12,7 миллион тенкӗ уйӑрнӑ.
Чӑваш Енре пурӑнакансем машина кредитпа туянаҫҫӗ. Вӑтамран 1,2 миллион тенкӗ илеҫҫӗ, ӑна 5 ҫул та 3 уйӑх хушши тӳлесе пыраҫҫӗ.
Автокредит утӑ уйӑхӗнче илнисем вӑтамран 1,18 миллион тенкӗ парӑма кӗрсе кайнӑ. Вӑл укҫана вӗсем 63,6 уйӑхра тӳлесе татасшӑн. Ку цифрӑна Кредит историйӗн наци бюровӗ пӗлтернӗ.
Чӑваш Енре пурӑнакансем 2023 ҫулхи раштав уйӑхӗнче вӑтамран 1,24 миллиион тенкӗ автокредит илнӗ пулсан 2024 ҫул вӗҫӗнче ку сумма 1,09 миллион тенкӗпе танлашнӑ.
Шупашкарти кивӗ Правительство ҫуртне юсаса ҫӗнетме тата тепӗр 4 миллион та 775 пин тенкӗ тухса кайӗ. Ку укҫана юсавпа реставраци ӗҫӗн документацине ҫӗнетме уйӑрма йышӑннӑ.
Юсав ӗҫне 2022 ҫулта пуҫӑннӑ. Пӗрремӗш контракта Хусанти «Консорциум Строительных Компаний» предприяти алӑ пуснӑ. Иккӗмӗш контракта та унпах алӑ пуснӑ. Унӑн виҫи 616,06 млн тенкӗпе танлашнӑ.
Кайран контрактпа ҫыхӑннӑ пӑтӑрмах ҫиеле тухсан контракта пӑрахӑҫланӑ.
Шупашкар районӗнче пурӑнакан 71 ҫулти хӗрарӑм ултавҫӑсен капкӑнне ҫакланса 13 миллион тенке чутах куҫарса паман.
Ун патне карас ҫыхӑнӑвӗн операторӗ текен ҫын шӑнкӑравланӑ. Вӗсем ӑна килӗшӗве тӑсма сӗннӗ. Ватӑ ҫын хӑйӗн даннӑйӗсене пӗлтермен пулин те ун патне Федерацин хӑрушсӑрлӑх службин тата Раҫҫей банкӗн ӗҫченӗсем текенсем шӑнкӑравласа ӑна укҫана декларацилемелле, ахальлӗн кӗмӗл Украинӑна куҫса кайӗ тесе хӑратма тапранса кайнӑ.
13 миллион тенке темле счёт ҫине куҫариччен хӗрарӑм Шалти ӗҫсен министертсивн дежурство чаҫӗпе ҫыхӑнма ӑс ҫитернӗ. Унтисем ӑна ултавҫӑсем шӑнман пӑрпа лартса яма хӑтланни пирки ӑнлантарса панӑ.
Шупашкарти Иван Смелов ТНТпа кӑтартакан «Погоня» экстремаллӑ шоура ҫӗнтернӗ. Вӑл пӗрремӗш вырӑна Никита Джигурдапа пайланӑ.
Иван шоуна камит каҫӗнче сцена ҫине тухнӑ хыҫҫӑн лекнӗ – кастинг-директор видеовизитка хатӗрлеме сӗннӗ. Ҫапла вӑл суйлав витӗр тухнӑ.
Иван палӑртнӑ тӑрӑх, уйрӑмах Никита Джигурдапа калаҫни унӑн асӗнче юлнӑ. Шоура вӑл 457,5 пин тенкӗ выляса илнӗ. Ку укҫапа ҫемйипе тинӗс хӗррине кайма планланӑ.
Палӑртса хӑварар: хальхи вӑхӑтра Иван Мускавра пурӑнать, Шупашкара тӑтӑшах килсе ҫӳрет.
Питӗр хулинче пурӑнакан Шупашкар каччи, студент, ултавҫӑсене 2,5 миллион тенкӗ куҫарса панӑ.
20 ҫулти каччӑ патне тавар илсе килни шӑнкӑравланӑ. Яш хӑйӗн паспорт номерне пӗлтернӗ хыҫҫӑн ун патне право хуралӗнче тата Росфинансмониторингра ӗҫлекенсем тесе хӑйсемпе паллаштаракансем шӑнкӑравлама тапранса кайнӑ. Ӑна вӗсем каччӑ хӑйӗн укҫине Украинӑна куҫарса панӑ тесе хӑратма тапранса кайнӑ, мӗнпур кӗмӗле «декларацилеме» ӳкӗте кӗртнӗ.
Каччӑ хӑйӗн 2,5 миллион тенкине ҫеҫ мар, асламӑшне те (тен, кукамӑшне-тӗр. Вырӑсла хыпарта бабушка тенӗ) ултавҫӑсене укҫа куҫарса пама ыйтма пуҫланӑ.
«Ми-ми-Мишки» мультфильма чӑвашла малалла куҫарма укҫа ҫитмест иккен. Кун пирки ҫак йӗркесен авторӗ Шупашкарти шкулта чӑваш чӗлхи учителӗнче ӗҫлекен Александр Степанов халӑх тетелӗнче хыпарлани тӑрӑх пӗлчӗ.
Спонсорсен укҫи пӗтнӗ, ҫавна май ӗҫ чарӑнса ларнӑ-мӗн. Ку мультфильма кӑна мар, право хуҫисем ирӗк парсан «Фиксики» е «Машӑпа упа» та куҫарма пулать тесе пӗлтернӗ.
Мультфильма чӑвашла куҫарма ниме майӗпе укҫа пуҫтараҫҫӗ иккен. Пухаканӗ — Владимир Андреев.
Тепӗр 10 сери куҫарма 300 000 пин пухма ятарлӑ счёт уҫнӑ.
Чӑваш Енри паллӑ спортсмен Владислав Поляшов ТНТ каналпа кӑтартакан «Титаны» спорт реалити сезонне хутшӑнать. Вӑл тӗп парнешӗн – 10 миллион тенкӗшӗн – кӗрешӗ.
Владислав 5 ҫултанпах спортпа кӑсӑкланма тытӑннӑ. Халӗ вара вӑл хӑй ҫамрӑк гимнастсене спортпа туслаштарать. Вӑл – спорт гимнастики енӗпе тӗнче чемпионӗ, тӗнче класлӑ спорт мастерӗ. Владислав 2020 ҫулта Токиора иртнӗ Олимп вӑййисене хутшӑннӑ.
Спортсмен шоуна хутшӑнма юлашки самантра заявка панӑ та суйлав витӗр тухнӑ. Шупашкар ятӗнчен унта хутшӑнакан пӗрремӗш ҫын вӑл.
Шупашкарти аграри университетӗнче вӗренекен хӗр ректора ӗненсе укҫасӑр тӑрса юлнӑ. Тӳрех палӑртар: чӑн ректор пулман, ун патне суйса ҫавӑн пек шӑнӑравланӑ.
21 ҫулти хӗр патне ҫурла уйӑхӗн ҫурринче университет ректорӗ текен ҫын шӑнкӑравланӑ, ҫывӑх вӑхӑтра Федерацин хӑрушсӑрлӑх службин ӗҫченӗсем ҫыхӑнасси пирки ҫирӗппӗн асӑрхаттарнӑ. Хӗр право хуралӗн тата Росфинансмониторинг ӗҫченӗсем текенсене ӗненсе «хӑрушсӑр» счёт ҫине 14 хутчен укса куҫарса панӑ. «Кӗмӗле» хӗре ашшӗ-амӑшӗ парнеленӗ-мӗн.
Пӑтӑрмах тӗлӗшпе пуҫиле ӗҫ пуҫарнӑ. Хӗре вара Украинӑн хӗҫпӑшаллӑ ҫарӗсене пулӑшман-ши тесе тӗрӗслӗҫ.
+6.3 °C