Чӑваш патшалӑх оперӑпа балет театрӗнче ҫӗнӗ директор пулӗ.
Чӑваш Республикин тава тивӗҫлӗ артисчӗ, Чӑваш Республикин культурӑн тава тивӗҫлӗ ӗҫченӗ Валерий Клементьев асӑннӑ учреждени пуҫлӑхӗн тивӗҫне пурнӑҫлама пӑрахнӑ. Мӗншӗн тесен ӑна нумаях пулмасть Чӑваш наци конгресӗн президентне суйланӑччӗ.
Пукан пушаннине кура Чӑваш Ен Культура, национальноҫсен ӗҫӗсен тата архив ӗҫӗн министерстви директор пулас кӑмӑллисен кадр резервӗ валли конкурс ирттерессине пӗлтернӗ. Конкурса хутшӑнас текенсен докуменчӗсене чӳк уйӑхӗн 8-мӗшӗнче йышӑнма пуҫланӑ, хутсене асӑннӑ ведомствӑна чӳк уйӑхӗн 21-мӗшӗччен ҫитерсе ӗлкӗрмелле.
Чӑваш Енӗн промышленноҫпа энергетика министрӗн ҫумне Ольга Чилибинӑна ӗҫрен кӑларнӑ.
Ольга Петровнӑна ведомствӑри пысӑк вырӑна шанса парасси ҫинчен калакан 588-мӗш номерлӗ йышӑнӑва республика Элтеперӗ Олег Николаев кӑҫалхи утӑ уйӑхӗн 12-мӗшӗнче алӑ пуснӑччӗ.
Аса илтерер: Ольга Чилибина — сертификаци специалисчӗ. Вӑл унччен «Эксперт ГРУПП» тулли мар яваплӑ обществӑн коммерци директорӗнче ӗҫленӗ, менеджмент тытӑмне сертификацилекен орган ертӳҫи пулнӑ.
Кӑшӑлвирусан хӳтӗлекен антитела титрӗ организмра пысӑк пулсан вӗсене кьюркод тытӑмӗ витӗр кӑларма тытӑнмалла. Ҫак ӗҫе пурнӑҫлакан регионти тытӑма республика Элтеперӗ пӗр эрнере йӗркелесе пӗтерме хушса каланӑ. «Ҫитес эрнере механизма пурнӑҫа кӗртмелле тата ӗҫлеттерсе ямалла»,— тенӗ Олег Николаев.
Чӑваш Енӗн цифра аталанӑвӗн министрӗ Кристина Майнина каланӑ тӑрӑх, ҫав тӗллевпе регион шайӗнче ятарлӑ ресурс йӗркелеме пулать. Унта кӗрсе ҫын хӑйӗн идентификаторне кӑтартӗ, вара кьюаркод илейӗ. Антителасен пысӑк титрӗллӗ ҫынсен реестрне врачсен комиссийӗ аккредитаци пур лабораторисен тӗрӗслевӗ тӑрӑх хатӗрлӗ. Чӑваш Енре вӑйра тӑракан ҫав кьюаркод Патшалӑх пулӑшӑвӗсен порталӗнче курӑнмӗ.
Раҫҫейре транспорта тата лавккасене QR-кодпа кӗртме тытӑнасшӑн. Ҫавна май саккун проекчӗ хатӗрлеҫҫӗ.
Тӳре-шара общество транспортне тата кафесемпе лавккасене ҫак кодпа кӗртме тытӑнасси пирки шутлать. Саккун проектне Патшалӑх Думине пӑхса тухма пани пирки кайран пӗлтерӗҫ.
Хальлӗхе палӑртнӑ тӑрӑх, кунашкал йӗрке 2022 ҫулхи ҫӗртме уйӑхӗччен пулма пултарать. Мӗн тӗллевпе тӑвасшӑн ҫак йӗркене? Паллах, ҫынсем ытларах вакцинациленччӗр тесе. Аса илтерер: хальлӗхе Раҫҫейре аслӑ ӳсӗмри ҫынсен 48,4 проценчӗ кӑшӑлвирусран прививка тутарнӑ.
Раҫҫей правительствинче халӑхӑн 90-95 процентне вакцинацилесси пирки калаҫма тытӑннӑ. Ҫапла пӗлтернӗ Татьяна Голикова ӗнер.
Вӑл каланӑ тарӑх, коллективлӑ иммунитет пултӑр тесе ҫӗршывра тепӗр 22 миллион ҫынна вакцинацилемелле, 9 миллион ҫыннӑн ревакцинациленмелле.
Хальлӗхе Раҫҫейре коллективлӑ иммунитет 48,4 процентпа танлашать, Чӑваш Енре – 36,5 процентпа. Татьяна Голикова коллективлӑ иммунитет 80 процентпа танлашни те ҫителӗксер пулнине каланӑ. Ҫакна экспертсем палӑртнӑ-мӗн.
Ӗнер, чӳк уйӑхӗн 10-мӗшӗнче, Чӑваш Енӗн Промышленность тата энергетика министерствинче кадр улшӑнӑвӗ пулса иртнӗ. Министр ҫумӗ пулма Борис Марковцова шаннӑ. Ӗҫлӗ хута республикӑн влаҫ органӗсен официаллӑ порталне вырнаҫтарнӑ.
ЧР промышленность тата энергетика министрӗн тивӗҫӗсене хальхи вӑхӑтра Александр Кондартьев пурнӑҫлать. Министр ҫумӗсем иккӗн. Вӗсем — Ольга Чилибина тата маларах эпир асӑннӑ Борис Марковцов. Кунсӑр пуҫне министрӑн пулӑшуҫи пур. Вӑл — Светлана Кузьмина.
Паян республикӑн Строительство, архитектура тата ҫурт-йӗрпе коммуналлӑ хуҫалӑх министерствин автономи учрежденийӗн директорӗн тивӗҫӗсене вӑхӑтлӑха пурнӑҫлама Ольга Ахмеевӑна шаннӑ. Кунта сӑмахӑмӑр «Чӑваш Республикин строительствӑри экспертиза тата хаксене йӗркелекен центрӗ» автономи учрежденийӗ пирки пырать.
Ольга Валерьевнӑна должноҫ шанса парасси ҫинчен калакан йышӑнӑва республика ертӳҫи Олег Николаев паян, чӳк уйӑхӗн 8-мӗшӗнче, алӑ пуснӑ. Документа республикӑн влаҫ органӗсен официаллӑ порталӗнче вырнаҫтарнӑ.
«Чӑваш Республикин строительствӑри экспертиза тата хаксене йӗркелекен центр» автономи учрежденийӗн ертӳҫине Алексей Иванова паян ӗҫрен кӑларнӑ. Йышӑнӑва республика ертӳҫи Олег Николаев алӑ пуснӑ. Документа республикӑн влаҫ органӗсен официаллӑ порталӗнче вырнаҫтарнӑ.
Алексей Игоревича ӗҫрен мӗн сӑлтавпа кӑларни паллӑ мар. Ӗҫлӗ документра ӑна-кӑна ӑнлантарса тӑман.
Автономи учрежденийӗн сайтӗнчи структурӑра ҫак самант тӗлне Алексей Игоревича директор тесе кӑтартнине хуратса ӗлкӗрейменччӗ-ха.
Ӗнер, чӳк 1-мӗшӗнче, республикӑри хысна учрежденийӗсенчен пӗринче ҫӗнӗ пуҫлӑх ӗҫе кӳлӗннӗ. Сӑмахӑмӑр – «Чӑваш Республикин закупкӑсен регионти центрӗ» хысна учрежденийӗ пирки. Асӑннӑ организацин ҫӗнӗ ертӳҫипе Чӑваш Республикин Конкурентлӑ политика тата тарифсен службин ертӳҫи Надежда Колебанова (сӑнӳкерчӗкре – сулахайри) коллектива паллаштарнӑ. Асӑннӑ службӑна пӑхӑнакан учрежденин директорӗ пулса Вероника Константинова (сӑнӳкерчӗкре – сылтӑмри) тӑрӑшӗ. Чӑваш Енӗн Конкурентлӑ политика тата тариф служби пӗлтернӗ тӑрӑх, пуҫлӑха конкурс ирттерсех палӑртнӑ. Унта Вероника Александровна кандидатурине ырланӑ. Ҫамрӑк хӗрарӑм унччен ӑҫта тата кам пулса ӗҫленине ведомствӑн Инстаграмри страницинчи хыпарта пӗлтермен.
Чӑваш Енӗн вӗренӳ тата ҫамрӑксен политикин министрӗн тивӗҫӗсене пурнӑҫлама Дмитрий Захарова шаннине Чӑваш халӑх сайчӗ унччен пӗлтернӗччӗ-ха. Аса илтерер: ку вырӑн Алла Салаевӑна министр пуканӗсӗр хӑварнӑ хыҫҫӑн пушаннӑччӗ. Паян вара Дмитрий Захарова министр дрлжноҫӗнче ҫирӗплетнӗ. Хушӑва республика Элтеперӗ Олег Николаев алӑ пуснӑ. Документа влаҫ органӗсен официаллӑ порталӗнче вырнаҫтарнӑ.
Дмитрий Анатольевич унччен Шупашкар хула администрацийӗнче вӗренӳ управленийӗн пуҫлӑхӗнче ӗҫленӗ. Вӑл 1979 ҫулта Шупашкарта ҫуралнӑ. 2001 ҫулта И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. Истори наукисен кандидачӗ. Хӑйӗн пӗлӗвне вӑл РФ Президенчӗ ҫумӗнчи Халӑх хуҫалӑхӗн тата патшалӑх службин Раҫҫей академийӗнче икӗ хутчен те ӳстернӗ. Ӗҫ биографине хула шкулӗсенчен пӗринчи истори учителӗнчен пуҫланӑ.
+18.3 °C