Етӗрне районӗнче ватӑ ҫын шыва путса вилнӗ. Инкек ӗнер, утӑ уйӑхӗн 15-мӗшӗнче, пулса иртнӗ. Вилене водолазсем Сӑр юханшывӗнчен туртса кӑларнӑ.
75 ҫулти арҫын тусӗпе Сӑр хӗрринче, Етӗрнерен инҫех мар вырӑнта, каннӑ. Ҫавӑн чухне вӑл шыва кӗме шутланӑ. Анчах ишнӗ вӑхӑтра вӑл путнӑ.
Малтанласа палӑртнӑ тӑрӑх, арҫын ӳсӗр пулнӑ. Те ал-ури туртса лартнӑ ӗнтӗ унӑн, анчах шыва кӗрес тени синкерпе вӗҫленнӗ.
Шупашкарти тухтӑрсем 6-мӗш хутран ӳкнӗ 16 ҫулти хӗрӗн пурнӑҫне ҫӑлса хӑварнӑ.
Хальхи вӑхӑтра вӑл Республикӑри ача-пӑча клиника больницинче реабилитаци витӗр тухать. Сиплев вӑраха тӑсӑлӗ, анчах тухтӑрсем лайӑххине кӑна шантараҫҫӗ: реабилитаци витӗр тухсан хӗр утма кӑна мар, ташлама та пултарӗ.
Нумаях пулмасть пульницӑра катастрофа медицинин тата васкавлӑ медпулӑшу центрӗн тӗп тухтӑрӗ Ольга Краузе пулнӑ. Вӑл анестезиологи тата реанимаци уйрӑмӗнче выртакан 16-ри хӗр патне те кӗрсе тухнӑ. Пациентка ун чухне тухтӑр пулма ӗмӗтленнине пӗлтернӗ. Ольга Краузе унпа пӗрле Шупашкарти медицина колледжне экскурсие кайса килме калаҫса татӑлнӑ.
Сӑмах май, кӑҫал Республикӑри ача-пӑча клиника пульницине ҫӳллӗшӗнчен ӳкнӗ 6 ачана илсе ҫитернӗ.
Паян пирӗн республикӑна каллех ракетӑпа тапӑнчӗҫ. Вӑл вӗҫсе килсен Шупашкарта виҫӗ ҫын аманнӑ.
Республикӑн Сывлӑх сыхлав министерствинче пӗлтернӗ тӑрӑх, аманнисенчен иккӗшӗн сывлӑхне вӑтам сиен кӳнӗ, вӗсене тухтӑрсем сиплеҫҫӗ. Шар курнӑ тепӗр ҫынна тӗрӗсленӗ хыҫҫӑн килте сипленме янӑ.
Аманнисене тухтӑрсем пулӑшнине республика Элтеперӗ Олег Николаев хӑй тӗрӗслесе тӑрӗ. Кун пирки роеспубликӑн Сывлӑх сыхлав министерствинче пӗлтернӗ.
Ӗнер, ҫӗртме уйӑхӗн 8-мӗшӗнче, М-7 автоҫул ҫинче пӗр водитель вилмеллех аманнӑ. Инкек 18 сехет те 40 минутра Муркаш районӗнчи Хыркассинчен инҫех мар вырӑнта пулса иртнӗ.
Ҫулпа пыракан Мускав облаҫӗнчи 58 ҫулти водитель йывӑр тиевлӗ «Скания» автомобильпе хирӗҫ килекен ҫул ҫине тухса кайнӑ. Унта вӑл «Вольво» фургонпа айккинчен ҫапӑнса иртсе кайнӑ.
Инкеке пула фургонӑн хӑмисенчен пӗри «Скания» автомобиль кабинине ватнӑ, Мускав облаҫӗнчи водитель вилмеллех аманнӑ. Фургон водителӗ, Псков облаҫӗнчи 64 ҫулти арҫын, урах пулнӑ, вӑл аманман.
Шупашкарта пурӑнакан 39 ҫулти хӗрарӑм лавккаран туяннӑ пахча ҫимӗҫ ҫисе А гепатитпа чирленӗ.
Вӑл вӗсенчен салат тунӑ, анчах лайӑх ҫуман ахӑртнех. Темиҫе эрнерен унӑн ӳт температури хӑпарнӑ, вӑйӗ чакнӑ, хӑстарма тытӑннӑ, сылтӑм аякӗ патӗнчен ыратма пуҫланӑ. Васкавлӑ медпулӑшупа ӑна пульницӑна илсе ҫитернӗ.
Тухтӑрсем тӗрӗсленӗ те унӑн А гепатит пулнине палӑртнӑ. Вӑл – пыршӑлӑх инфекцийӗ, таса мар алӑ урлӑ ерме пултарать. Ытларах чухне лайӑх ҫуман пахча ҫимӗҫ, улма-ҫырла, ешӗл ҫимӗҫ урлӑ лекет.
Сипленӗ хыҫҫӑн пациенткӑна малалла мӗн тумалли пирки сӗнӳсем парса киле кӑларнӑ.
Ҫӗртме уйӑхӗн 4-мӗшӗнче Ҫӗрпӳ округне «Кардиопуйӑс» ҫитӗ. Ку — «Сывлӑх патне утӑм» проектпа килӗшӳллӗн.
Ҫӗрпӳ округӗнчи ҫынсем патне Шупашкарти тухтӑрсем килӗҫ: кардиолог тата невролог. Районти поликлиника умӗнче шатер лартӗҫ, унта регистраци тухма, тухтӑрсенчен канаш илме май пулӗ.
Пульницӑра вара ЭКГ тума, холестерин тата глюкоза шайне тӗрӗслемешкӗн анализ пама пулӗ. Кӑлтӑксем тупӑнсан тухтӑрсем пациента кардиолог е невролог патне ярӗҫ.
Пӗрле паспорт, ОМС полисӗ илмелле. Анализсем памашкӑн выҫӑ хырӑмла килсен лайӑхрах.
БПЛАна пула шар курнӑ Шупашкарти арҫынна Чулхулана куҫарни пирки эпир пӗлтернӗччӗ-ха. Аса илтерер: ӑна малтан реанимаци уйрӑмне вырттарнӑ, искусствӑлла мелпе ҫывӑратса янӑ, искусствӑлла аппаратпа сывлаттарнӑ. Кайран, унӑн сывлӑхне пӗр пек тытса тӑма май килсен, Чулхулана куҫарма йышӑннӑ.
39 ҫулти арҫынна халӗ Чулхулари пиҫсе кайнисен центрӗнчен кӑларнӑ.
Шар курнӑ Ринат каласа кӑтартнӑ тӑрӑх, ун патне кашни кун тӗп тухтӑр, реанимаци тата пиҫсе кайнисен уйрӑмӗсен заведующийӗсем пырса пӑхса тӑнӑ. «Вӗсем мана: «Кунтан эсӗ урупа утса тухӑн», — тесе хавхалантарса тӑчӗҫ», — каласа кӑтартнӑ арҫын.
Халӗ арҫын Шупашкарта, Республикӑн клиника больницинче, малалла сипленӗ. Ӑна кунта вертолетпа илсе килнӗ.
Паян, ҫу уйӑхӗн 27-мӗшӗнче, Сӗнтӗрвӑрри районӗнче автобуспа ҫӑмӑл машина ҫапӑннӑ.
Малтанласа палӑртнӑ тӑрӑх, инкекре 1 ҫын вилнӗ, 10-ӑн аманнӑ. Вӗсене пурне те пульницӑна илсе кайнӑ, тӗрӗсленӗ хыҫҫӑн пӗрне килте сипленме янӑ. Инкекре аманнисем хушшинче ачасем ҫук тесе пӗлтернӗ республикӑн Сывлӑх сыхлав министерстви.
«За рулем» (чӑв. Руль умӗнче) форумра хыпарланӑ тӑрӑх,
«Гранта» ҫӑмӑл машина водителӗ хирӗҫ килекен ҫул ҫине тухса кайса ПАЗ автобуспа ҫапӑннӑ. Ҫӑмӑл автомашина водителӗ инкекре вилмеллех аманнӑ.
Кӳкеҫри шкул-интернатра пӑтӑрмах пулса иртнӗ. Унта ҫивитти тӑррине пусмапа хӑпарма тӑнӑ арҫын персе анса аманнӑ. Кун пирки Атӑлҫи тӑрӑхӗнчи регионсем хушшинчи патшалӑх инспекцийӗ пӗлтернӗ.
Инкек ҫу уйӑхӗн 19-мӗшӗнче пулса иртнӗ. Рабочи стена ҫумне тӑратнӑ пусмапа ҫивитти ҫине хӑпарма тӑнӑ. Шкулта, сӑмах май каласан, юсав ӗҫӗ пырать.
Яваплӑ органсем пӑтӑрмах тӗлӗшпе пуҫиле ӗҫ пуҫарнӑ ӗнтӗ. Юсав ӗҫӗпе аппаланаканни — «Империя» ТМЯП.
Патшалӑхӑн ӗҫ инспекцийӗн ӗҫченӗсем тӗрӗслев материалӗсене Следстви комитечӗн республикӑри управленине ярса парӗҫ.
Паян ирхине Шупашкарта маршрутка ҫул ҫинчи инкеке лекнӗ. Инкеке пассажирсене турттаракан транспортсӑр пуҫне тепӗр икӗ ҫӑмӑл машина ҫакланнӑ. Ун вӑхӑтӗнче 3 ҫын шар курнӑ.
Пӑтӑрмах ирхи 9 сехетре Айхи проспектӗнче пулса иртнӗ. Малтанласа палӑртнӑ тӑрӑх, БМВ машина тӗп ҫул ҫине тухнӑ чухне маршруткӑна ирттерсе яман. Ҫӑмӑл машина рулӗ умӗнче 36 ҫулти арҫын пулнӑ. Кайран маршрутка хирӗҫ килекен Renault Logan автомобильпе пырса ҫапӑннӑ.
Инкекре виҫҫӗн аманнӑ: Renault машинӑн 30 ҫулти водителӗ, общество транспортӗнчи 20 тата 24 ҫулсенчи икӗ ҫамрӑк. Вӗсене тухтӑрсен пулӑшӑвӗ кирлӗ пулса тухнӑ.
+24.3 °C