Мускавра Чӑваш Енри 21 ҫулти хӗре пусмӑрланӑ. Пӑтӑрмах хулари пӗр-пӗр тӗттӗм кӗтесре те мар, хӑна ҫуртӗнче пулса иртнӗ.
Хӗр лаунж-отельте ҫӗр каҫнӑ. Пӳлӗм алӑкӗ уҫҫине курса ун патне ашшӗ ҫулӗнчи арҫын кӗрсе выртнӑ. 47 ҫулти арҫын Удмурт Республикинчен иккен. Саранскран ҫӗршывӑн тӗп хулине укҫа ӗҫлесе илме тухса кайнӑскер унта «муж на час» (чӑв. пӗр сехетлӗх упӑшка) пулса тӑрӑшнӑ. Ун пек арҫынсем кил-тӗрӗшри вак-тӗвеке пурнӑҫласа параҫҫӗ. Хайхи пирки каласан, вӑл сӗтел-пукан юсаса пурӑннӑ иккен.
Отельти пӗчӗк пӳлӗмӗн алӑкӗ уҫҫине курсан сӗмсӗр арҫын пике патне кӗрсе выртнӑ. Хӗр ҫав вӑхӑтра ҫывӑрнӑ.
Арҫынна йӗрке хуралҫисем часах тытса чарнӑ. Ун тӗлӗшпе Мускаври тӗпчевҫӗсем пуҫиле ӗҫ пуҫарнӑ.
Ҫурла уйӑхӗн 8-мӗшӗнче Чӑваш Енри ҫыравҫӑсем Йошкар-Олара иртнӗ темиҫе литература мероприятине хутшӑннӑ.
«Патша Кокшайскӗн Кремлӗ» культурӑпа истори комплексӗнче кӗнеке уявӗ иртнӗ. Ҫармӑссен II кӗнеке фестивальне кӗнеке кӑларакансемпе кӗнеке вулама юратакансем пуҫтарӑннӑ. Кӑҫалхи мероприятие «Пӗрле вулатпӑр — пӗрлӗхре пурӑнатпӑр» девизпа йӗркеленӗ. Унта Чӑваш Ен делегацийӗн йышӗнче Чӑваш кӗнеке издательствин редакторӗ Ольга Федорова хутшӑннӑ.
Кӗнеке уявне кайнисем Мускаври Игорь Караулов поэтпа тата Севастопольти Платон Беседин писательпе тӗлпулӑва хутшӑннӑ. Унта Чӑваш Енри вырӑсла ҫыракан авторсем: Александр Шпаннагель тата Светлана Гордеева поэтсем — пулнӑ. Йошкар-Оларан вӗсем хавхаланса таврӑннӑ.
Пирӗн ентеш, ультрамарафон чупакан Екатерина Руссина, Мускав хулинче иртнӗ ӑмӑртура финиша чи пӗрремӗш ҫитнӗ.
Пирӗн спортсменка «Самопреодоление» ультрамарафона хутшӑннӑ. Спортсменсем Вороновское поселокӗнчи пӗве тавра чупнӑ, ун тӑршшӗ – 1 ҫухрӑм. Атлетсем валли унта апатланмалли, канмалли, сывлӑха тӗрӗслеттермелли вырӑн йӗркеленӗ. Палӑртмалла: вӑл Раҫҫейре пӗрремӗш хут иртнӗ. Унта пирӗн ҫӗршыври кӑна мар, чикӗ леш енчи спортсменсем те старта тухнӑ.
Екатерина Руссина 3 талӑк чупса 278 километра парӑнтарнӑ. Палӑртмалла: вӑл кунашкал ультрамарафонсене унччен те хутшӑннӑ.
Саламлатпӑр ентеше!
К.В. Иванов ячӗллӗ Чӑваш патшалӑх академи драма театрӗн коллективӗ Мускава тухса каять. Пӗр кунлӑха.
Ҫурла уйӑхӗн 9-мӗшӗнче чӑваш артисчӗсем унта спектакль кӑтартӗҫ. Тӗрӗссипе, спектаклех мар-ха. Спектакль сыпӑкне. Унта вӗсем К. Иванов пьеси тӑрӑх лартнӑ «Нарспи» спектакле кӑтартасшӑн. Спектакль сыпӑкне курас тесен ҫӗршывӑмӑрӑн тӗп хулинчи «Зарядье» парка пымалла. Унта «Территория будущего» форум-фестиваль иртӗ.
Сӑмах май каласан, маларах театрта спектакль сыпӑкне ҫурла уйӑхӗн 5 тата 9-мӗшӗсенче кӑтартассине пӗлтернӗччӗ, халӗ вара пӗр кун ҫеҫ тесе кӑтартнӑ.
Театрта ҫӗнӗ сезона та ку спектакльпе уҫма палӑртса хунӑ. Унччен «Ялта» спектакльпе уҫаканччӗ, халӗ вара куракансене «Нарспи» спектакльпе кӗтсе илӗҫ.
Елчӗк округӗнчи Аслӑ Таяпа ялӗнче ҫуралса ӳснӗ Владимир Тяптушкин черетлӗ сериалта ӳкерӗннӗ. Вӑл «Коп-звезда» ятлӑ.
Камитлӗ сериала ТНТ телеканалпа ҫурла уйӑхӗн 3-мӗшӗнче кӑтартма тытӑнӗҫ. Ку Владимир Тяптушкиншӑн – камит жанрӗнчи пӗрремӗш опыт. Вӑл унта Мудров рольне вылять. Хӑй каланӑ тӑрӑх, унӑн сӑнарӗ чее, пултаруллӑ, ҫав вӑхӑтрах хӑйне юратакан ҫын.
Сӑмах май, Владимир Мускавра питӗ ӗҫлӗ пулсан та тӑван тӑрӑхӗ пирки манмасть, килсех ҫӳрет. Вӑл Чӑваш Ене икӗ уйӑхра пӗрре те пулин килме тӑрӑшать. Уншӑн тӑван ялӗ – чи хитре вырӑн. Ҫавӑн пекех вӑл Шупашкар хулинчи тӗп урамсенче уҫӑлса ҫӳреме юратать.
Николай Селиванова Чӑваш Республикин Хисеп грамотипе чыслама йышӑннӑ. 84 ҫулти хисеплӗ ватта сума сӑвасси ҫинчен калакан Хушӑва Чӑваш Ен Элтеперӗ ӗнер алӑ пуснӑ.
Николай Васильевич — Чӑваш Енӗн агропромышленность комплексӗн ветерансен канашӗн Патӑрьел районӗнчи организаци членӗ.
Николай Селиванов 1942 ҫулхи утӑ уйӑхӗн 1-мӗшӗнче Патӑрьел районӗнчи Кӗҫӗн Арапуҫ ялӗнче ҫуралнӑ. Ҫӗрпӳри ял хуҫалӑх техникумӗнчен тата Мускаври Профсоюз юхӑмӗн аслӑ шкулӗнчен экономиста вӗренсе тухнӑ.
Ӗҫ биографине «Герой» колхозри кӗтӳҫрен пуҫланӑ, унтан Юхмара транспорт бригадин бригадирӗ пулнӑ. 1982-1983 ҫулсенче «Герой» колхозра профком председателӗнче ӗҫленӗ. Унтан ӑна КПСС райкомӗнче пропагандӑпа агитаци пайӗнче инструкторта тӑрӑшма шаннӑ. 1985 ҫултанпа вӑл ял хуҫалӑх ӗҫченӗсен профсоюзӗн райкомне ертсе пынӑ. 1996-2000 ҫулсенче Патӑрьел районӗн администрацийӗн пуҫлӑхӗ пулнӑ, кайран Чӑваш патшалӑх университетӗнче преподавательте тӑрӑшнӑ. 2005 ҫултанпа Мускаври «ВИА-Строй» строительство организацийӗн гендиректорӗнче тӑрӑшнӑ.
«Чебоксарские новости» (чӑв. «Шупашкар хыпарӗсем») хаҫата 21 ҫул ертсе пынӑ Лариса Буланкина пурнӑҫран уйрӑлнӑ. Кун пирки «Ҫыхӑнура» форум пӗлтерет.
Чӑваш Енри паллӑ журналист 73 ҫулта пулнӑ. Лариса Алексеевна 1954 ҫулхи нарӑсӑн 24-мӗшӗнче Тула облаҫӗнчи Донской хулинче ҫуралнӑ. Мускаври Ломоносов ячӗллӗ патшалӑх университечӗн журналистика факультетӗнчен вӗренсе тухсан «Советская Чувашия» хаҫатра ӗҫлеме пуҫланӑ, тӗп редактор ҫумне ҫитнӗ. 2002 ҫулта «Чебоксарские новости» хаҫат редакторӗ пулнӑ. Тепӗр тӑватӑ ҫултан директор-тӗп редактор пуканне йышӑннӑ. Унта 2023 ҫулхи ҫӗртме уйӑхӗн 1-мӗшӗнче ӗҫлеме пӑрахнӑ.
Лариса Буланкина – ЧР тава тивӗҫлӗ культура ӗҫченӗ, РФ тава тивӗҫлӗ культура ӗҫченӗ, Ҫемен Элкер ячӗллӗ преми лауреачӗ.
Канаш округӗнчи Усман Эскеровпа Дарья Садовская Мускав хулинче пӗрлешнӗ.
Ӗнер, Ҫемье тата юратупа шанчӑклӑх куненче, тӗп хуламӑрти Наци центрӗнче «Раҫҫей. Чӗресене пӗрлештерсе» форум иртнӗ, унта тӗрлӗ регионти мӑшӑрсем пӗрлешнӗ. Пирӗн Чӑваш Енрен Усман Эскеровпа Дарья Садовская кайнӑ.
Усманпа Дарья — юристсем, вӗссем чӑваш культурине упрама тӑрӑшаҫҫӗ: чӑвашла юрлаҫҫӗ, ҫулсерен Акатуя хутшӑнаҫҫӗ, тетрсемпе музейсене ҫӳреҫҫӗ.
Сӑмах май, иртнӗ ҫулсенче Мускавра иртнӗ «Раҫҫей. Чӗресене пӗрлештерсе» форума Шупашкар хулинчи Максим тата Анастасия Горскисем, Елчӗк округӗнчи Александр тата Анна Кривововсем, Тӑвай округӗнчи Анна тата Алексей Андреевсем, Шупашкар хулинчи Алексей тата Юлия Комлевсем хутшӑннӑ.
Ҫу уйӑхӗн 21-мӗшӗнче К.В.Иванов ячӗллӗ Чӑваш патшалӑх академи драма театрӗнче Борис Щукин ячӗллӗ театр институчӗ итлев ирттерессине эпир унччен пӗлтернӗччӗ-ха.
Аса илтерер: институтра тӑватӑ ҫул вӗренмелле. Чӑваш Ен студентсене стипенди тӳлесе тӑрӗ, общежитире вырӑнпа тивӗҫтерӗ. Диплом илсен артистсем Чӑваш патшалӑх драма театрне ӗҫлеме таврӑнӗҫ.
Чӑвашла лайӑх пӗлекен, артист пулас ӗмӗтлӗ ҫамрӑксем юрласа, сӑвӑ, монолог тата юптару каласа тупӑшнӑ.
Халӗ вара театр халӑх тетелӗнчи хӑйӗн пабликӗнче ҫапларах хыпарланӑ: «Туссем! Питӗ савӑнӑҫлӑ хыпар пӗлтерме васкатпӑр!
4 пултаруллӑ ҫамрӑк Борис Щукин ячӗллӗ Театр институтне кӗмелли тӗрӗслевсен юлашки турне ӑнӑҫлӑ иртнӗ!».
Шупашкар хулинче пурӑнакан 55 ҫулти Ивета Орендеева Мускавран харӑсах виҫӗ титулпа таврӑннӑ.
Вӑл «Раҫҫей Ҫут тӗнче мисӗ» коронӑна ҫӗнсе илнӗ. Жюри пайташӗсем унӑн ӑсне, пултарулӑхне те хакланӑ, «Интеллект мисӗ» тата «Ӗлккенлӗх мисӗ» ятарлӑ парнесемпе те чысланӑ.
Конкурс финалӗ ҫӗртме уйӑхӗн 14-мӗшӗнче Мускавра иртнӗ. Пирӗн ентеш 50 ҫултан аслӑрах хӗрарӑмсен хушшинче тӗп коронӑна ҫӗнсе илнӗ.
Иветӑшӑн ку – пиллӗкмӗш конкурс. Унччен вӑл Чӑваш Ене федераци тата регион шайӗнчи подиумсенче хӳтӗленӗ. Вӗсенче туслӑха кӑтартнӑшӑн тата хутшӑнма пӗлнӗшӗн ятсем ҫӗнсе илнӗ. Халӗ ав унӑн коллекцийӗнче тепӗр корона пур.
Палӑртса хӑварар: Ивета виҫӗ хӗр ӳстернӗ, халӗ икӗ мӑнукне пӑхма пулӑшать. Вӑл илем сферинче ӗҫлет, саккассем паракан пунктпа ҫыхӑннӑ услама аталантарать.
+14.3 °C