Тӳре-шара М-7 федераци ҫулне кӑҫалах анлӑлатма тытӑнасшӑн. Ку Шупашкар ҫывӑхӗнчи 12 ҫухрӑм тӑршшӗ ҫула пырса тивет.
ЧР Транспорт министерстви пӗлтернӗ тӑрӑх, ку чылай ыйтӑва татса пама пулӑшӗ. Хальхи вӑхӑтра ҫак ҫул ҫинче пӗрмай «пӑкӑ» пухӑнать.
Сӑмах май, пӗлтӗр ҫулла ведомство Явӑшпа Кӳкеҫ хушшинчи ҫула реконструкци тума сахалтан та 18 млрд тенкӗ кирлине пӗлтернӗ. Унти ҫул ҫинче 4 полоса, 4 развязка, ҫӗр ҫийӗн каҫмалли 8 каҫӑ пулмалла.
Кӳкеҫри ҫуртсенчен пӗринчен юр йӑтӑнса аннӑ та вӑл ҫутӑ пӑралукне татса пӑрахнӑ.
Пӑтӑрмаха пула район центрӗнчи темиҫе ҫурт ҫутӑсӑр юлнӑ. Ҫавсен шутӗнче — Шоссе урамӗнчи темиҫе объект: Шупашкар муниципаллӑ округӗн администрацийӗ, нумай ӗҫ тӑвакан центр (МФЦ), «Тӑван Ен» хаҫат вырнаҫнӑ ҫурт.
Муниципалитетӑн пӗрлехи диспетчер службинче ҫутта вӑрах тӑхтамасӑр пама шантарнӑ.
«Чеб.ру» форум сайт пӗлтернӗ тӑрӑх, Чӑваш Енри ҫынсен прависене хӳтӗлекен уполномоченный Сергей Романов пурнӑҫран уйрӑлнӑ. Вӑл 46 ҫулта пулнӑ.
Сергей Романов 1978 ҫулта Кӳкеҫре ҫуралнӑ. Аслӑ шкултан вӗренсе тухсан, салтакран таврӑнсан вӑл ЧР шалти органӗсенче тата Юстици министерствин управленийӗнче ӗҫленӗ. Унтан прокуратура органӗсенче те вӑй хунӑ.2020 ҫулта вӑд тивӗҫлӗ канӑва тухнӑ. Ҫав ҫулах ӑна ҫынсен прависене хӳтелекен уполномоченнӑй пулма шаннӑ.
Кӳкеҫре пурӑнакан Валентина Васильева балетмейстер нарӑс уйӑхӗн 1-мӗшӗнче 90 ҫул тултарнӑ.
«Тӑван Ен» хаҫат пӗлтернӗ тӑрӑх, Валентина Евлампьевна ача чухне тухтӑр пулма ӗмӗтленнӗ. Чӑваш патшалӑх педагогика институчӗн биологипе хими факультетӗнче вӗренсе тухсан Кӳкеҫ шкулӗнче ачасене биологипе хими вӗрентнӗ.
Мӗн пӗчӗкренех музыкӑна кӑмӑлланӑскер, ташлама юратнӑскер К. Иванов ячӗллӗ Чӑваш музыкӑпа драма театрӗн балет студине вӗренме кӗнӗ.
«Эпӗ ташлама яланах юратнӑ. Манӑн сӑн-питре вӗренес туртӑм ялкӑшнӑ пулас, мана суйлав витӗр тухнӑ хыҫҫӑн тӳрех балет студине илчӗ», – аса илсе каласа кӑтартнӑ Валентина Васильева район хаҫачӗн корреспондентне.
«М-7» автоҫулӑн Горьки ҫул пӑрӑнчӑкӗнчен пуҫласа Кӳкеҫе ҫитичченхи участокне килес ҫул юсас шанчӑк пур. Кун пирки республика Элтеперӗ Олег Николаев палӑртса хӑварнӑ.
Асӑннӑ лаптӑка юсаса ҫӗнетессипе ҫыхӑннӑ проект пур иккен. Объекта пилӗк ҫулхи плана кӗртнӗ.
«Ҫул-йӗрҫӗсемпе кашни тӗл пулмассеренех юсав ӗҫне пуҫӑнма ыйтса вӗсене васкататӑп. Унти пӑкӑ ҫынсене самай кансӗрлеҫҫӗ. Ку ыйтупа кӑҫал мар пулсан килес ҫул ӗҫлеме тытӑнатпӑрах тесе шухӑшлатӑп», — тенӗ республика ертӳҫи.
Ӗнер Кӳкеҫре полицейскисем машина ҫапса хӑварнӑ йытта курсан чарӑннӑ. Чӗрчун ҫул айккинелле упаленнӗ.
Артем Петров аслӑ инспектор тата унӑн ӗҫтешӗ Виталий Кириллов йытта пулӑшма тӑнӑ. Чӗрчуна ҫапса хӑварнӑ «Рено» водителӗ те чарӑннӑ. Вӗсем пурте йытта ҫывӑхри ветеринари клиникине леҫнӗ.
Тепӗр кунхине ҫӑлнӑ йытӑ пирки ШӖМ сайтӗнче хыпар тухнӑ. Вара йытӑ хуҫи те тупӑннӑ, ӑна илме килнӗ.
Шупашкартан Кӳкеҫе пассажирсене илсе ҫӳрекен 162-мӗш маршруткӑра билет хакӗ ӳснӗ. Анчах каҫхи 21 сехет хыҫҫӑн кӑна.
«Каҫхи тариф» 10 тенкӗ хӑпарнӑ. ЕТКпа тӳлесен - 40 тенкӗ, чӗрӗ укҫапа - 42 тенкӗ. Ахаль чухне билет ЕТКпа 30 тенкӗ тӑрать, чӗре укҫапа - 32 тенкӗ.
Расписанипе килӗшуллӗн, 162-мӗш маршрутӑн пӗрремӗш рейсӗ ирхи 5 сехетре ҫула тухать. Каҫхине юлашки рейс 23 сехет те 20 минутра каять.
Кӳкеҫри организацисенчен пӗринче ӗҫ хӑрушсӑрлӑхӗн правилисене пӑхӑнманран пӗр рабочи алюмини профилӗ айне пулнӑ. Халӗ ҫак пӑтӑрмах тӗлӗшпе РФ Пуҫиле кодексӗн 143-мӗш статйин 1-мӗш пайӗпе килӗшӳллӗн пуҫиле ӗҫ пуҫарнӑ.
Пӑтӑрмах юпа уйӑхӗн 23-мӗшӗнче пулса иртнӗ. Предприятире алюмини профильне пушатнӑ чухне пӗр ҫыхӑ грузчик ҫине персе аннӑ. Арҫын йывӑр суранланнӑ.
Шупашкар округӗнчи тӗп вулавӑшра «Чӑваш туйӗн йӑли-йӗрки» курав экспозицийӗ уҫӑлнӑ. Унта - наци тумӗ тӑхӑнтартнӑ пуканесем. Вӗсем чӑваш туйӗн йӑлисене кӑтартаҫҫӗ. Пуканесен ҫи-пуҫне Наталия Никонорова (Зиновьева) хатӗрленӗ. Экспонатсен йышӗнче ҫураҫнӑ хӗр, хӗр ҫумӗ, туй арӑмӗсем, вӑйӑҫӑ пур.
Наталия Никонорова Кӳкеҫре ҫуралса ӳснӗ. Хӑй каланӑ тӑрӑх, уншӑн амӑшӗ Лидия Николаевна Зиновьева тӗслӗх вырӑнӗнче пулнӑ. Вӑл нумай ҫул «Паха тӗрӗ» фабрикӑра кавир тӗртекен цехра ӗҫленӗ. Килӗнче вӗсен яланах тӗрленӗ япала нумай пулнӑ.
Наталия ача чухне фабрикӑна амӑшӗ патне час-часах кайнӑ, тӗрӗҫӗсене сӑнанӑ. Алӑ ӗҫне юратасси ҫакӑнтан пуҫланнӑ та ӗнтӗ. Халӗ Наталия Канаш округӗнчи Кӑшнаруй клубне ертсе пырать, вӑл - «Хӗлхем» вокал ансамблӗн солистки те. Наталия Никонорова пуканесене тумлантарнисӗр пуҫне капӑрлӑхсем – умҫакки, хушпу, сурпан – ӑсталать.
Палӑртмалла: куравра чӑваш тӗрри, туйӗ ҫинчен каласа кӑтартакан кӗнекесем те пур.
Чӑваш Енӗн ӗҫ тата социаллӑ хӳтлӗх министрне Алёна Елизаровӑна пӗр ача хӑйӗн «Нарспи» картинине парнеленӗ.
«Вӗсем пирки «хӑйне евӗр» ачасем теҫҫӗ. Ытти ача пекех вӗсем те ачашлӑха, юратӑва туясшӑн, хӑйсемшӗн тӑрӑшнине курасшӑн», — тесе ҫырнӑ министр Телеграмри хӑйӗн страницинче.
Министр Кӳкеҫри ачасен интернат-ҫуртӗнче пулнӑ. Ӑна унта ӑсталӑх лаҫҫине чӗннӗ. Ылтӑн алӑллӑ ачасем тем те пӗр ӑсталаҫҫӗ.
Владислав Разводов вӗтӗ шӑрҫапа чӑваш ялавне тӗрлет. Александр Митрофанов вара хӑйӗн «Нарспи» картинине министра парнеленӗ. Вӑл ӑна йывӑҫа ҫунтарса хатӗрленӗ.
+6.3 °C