Етӗрне районӗнчи Кӑкшӑмри Культура ҫуртӗнче Кӑкшӑм ял тӑрӑхӗнчи сӑвӑҫсем Литература ҫулталӑкне уҫма пухӑннӑ. Культура керменӗн ертӳҫи Шарова Е.А. Кӑкшӑм ял тӑрӑхӗнчи сӑвӑ ҫыракансен ӑсталӑхӗпе паллаштарчӗ.

Ҫуткассинчи Ефимова Людмила Исаевна ҫамрӑк мар, 75 ҫулта. Хӑй вӑхӑтӗнче «Заветы Ильича» колхозра ӗҫленӗ. Пушӑ вӑхӑтра сӑвӑсем ҫырма юратнӑ. Алексеев Валерий Петрович, Бежанидзе Фаина Николаевна, Артемьева Римма Зиновьевна, Афанасьев Александр Афанасьевич, Кркалевская Елизавета Борисовна Кӑкшӑм ялӗнчен. Пурте хальхи вӑхӑтра тивӗҫлӗ канура. Артемьева Р.З. медсестра пулса хӑй вӑхӑтӗнче чылай ҫынна сыватассишӗн тӑрӑшса ӗҫленӗ. Бежанидзе Ф.Н. Пӑчанарта ҫуралса ӳснӗ, чылай вӑхӑт хушши тӑван ялтан инҫетре пурӑннӑ, хӑйӗн темиҫе сӑввинче вӑл хӑйӗн тӑван ялӗнчен сӑвӑсене вырӑсла ҫырнӑшӑн, ялтан тухса кайнӑшӑн каҫару ыйтрӗ.

Афанасьев А.А. тата Алексеев В.П. чирленӗ пирки тӗлпулӑва килеймен. Вӗсен сӑввисемпе Шарова Е.А. паллаштарчӗ. Афанасьев А.А. хӑйӗн сӑввисене пухса тӑватӑ кӗнеке пичетлесе кӑларнӑ. Унӑн сӑввисем районта тухса тӑракан «Ӗҫ ялавӗ» хаҫатра та час-часах кун ҫути кураҫҫӗ.

Шаров Александр Витальевич ҫавӑн пекех Кӑкшӑмри артистсене хӑй вӑхӑтӗнче акатуйсене хатӗрленме пулӑшнӑ композиторӑн, Карлин Николай Сергеевичӑн сӑввисемпе паллаштарчӗ.

Кркалевская Е.Б. Кӑкшӑмри шкулта 25 ҫул хушши шкул ачисене вырӑс чӗлхи вӗрентнӗ, халӗ тивӗҫлӗ канура. Вӑл сӑвӑ ҫырас ӑсталӑх пирки каласа пачӗ, А.Дементьевпа Л.Татьяничевӑн тата хӑй ҫырнӑ сӑвӑсемпе паллаштарчӗ. Хӑйӗн иккӗмӗш сыпӑкри тӑванӗ Машинин Геннадий пирки вӑл:

«Эс ӗҫчен, маттур,пуян,

Хӗл ҫитсен тытан куян.

Курма кӗрсен-апат лартан,

Укҫа ыйтсан-ялан паран», — тет.

Кӑкшӑм ял тӑрӑхӗн ертӳҫи Константин Михайлов та сӑвӑ ҫыркалать-мӗн. Вӑл та, Кӑкшӑмри шкулта чӑваш чӗлхи литературине вӗрентекен Людмила Иосифовна Александрова та, хӑйсен сӑввисене чуна парса ҫырнӑ. Юлашкинчен Константин Михайлов поэзи каҫне пухӑннисене тав турӗ, Литература ҫулталӑкӗнче татах та тухӑҫлӑрах ӗҫлеме чӗнсе каларӗ.

#Литература ҫулталӑкӗ, #Кӑкшӑм, #Кӑкшӑм ял тӑрӑхӗ, #Етӗрне районӗ, #Пӑчанар, #Ҫуткасси, #литература