Раштавӑн 30-мӗшӗнче Чӗмпӗр чӑвашӗсен «Канаш» хаҫачӗ 20 ҫул тултарать.

Чӗмпӗрте пӗрремӗш чӑваш хаҫачӗ 1918 ҫулта тухнӑ, вӑл «Ҫӗнӗ пурнӑҫ» ятлӑ пулнӑ. Ӑна кӗпӗрнери вӗрентӳ комиссариачӗ кӑларса тӑнӑ.

«Канаш» — ҫӗршывра демократи улшӑнӑвӗсем пуҫланнӑ хыҫҫӑн ҫуралнӑ хаҫат. Пӗрремӗш редакторӗ В.Ф.Ромашкин пулнӑ.

Паян издани 1350 экземпляр тиражпа тухса тӑрать. 2002 ҫултанпа коллектива Н.Н.Ларионов ертсе пырать. Редакци Чӗмпӗр хулинчи Пушкинская урамра вырнаҫнӑ (11-мӗш ҫурт). Редакцире 5 ҫын, вӗсенчен 3 журналист. Ҫак йышран 2 ҫын Писательсен союзӗнче тӑрать. «Канаш» ҫумӗнче 13 ҫул «Шевле» литпӗрлешӳ ӗҫлет. Ҫак тапхӑрта Писательсен союзне 10 ҫын ытла кӗнӗ. Редакци пулӑшнипе вырӑнти чӑваш авторӗсем 60 кӗнеке ытла кӑларнӑ. Хаҫат ӗҫченӗсем тӑрӑшнипе, область администрацийӗ укҫа-тенкӗпе пулӑшнипе 2000 ҫулта «Шевле ҫути« литература альманахӗ тата «Атӑл юрри» журналӑн виҫҫӗмӗш номерӗ пичетленчӗҫ.

Паян Чӗмпӗр тӑрӑхӗнче 111 пин ытла чӑваш пурӑнать. Эпир тӑван чӗлхене манасшӑн мар, чӑвашла калаҫасшӑн, вуласшӑн, юрласшӑн. «Канаш» ҫак ӗҫре пӗр йӑх ҫыннисене пулӑшса пырать.

Халӗ редакцире вӑй хуракансем: Ларионов Н.Н — тӗп редактор, Ефимова В.А. — яваплӑ секретарь, Дмитриев А.Г. — ҫырусен пайӗн пуҫлӑхӗ, Еграшкина Н.Н. — культура пайӗн пуҫлӑхӗ, Мустаева Е.Н. — информаци пайӗн пуҫлӑхӗ.

2009 ҫулхи пуш уйӑхӗн 26-мӗшӗнче хаҫатӑн 1000-мӗш номерӗ кун ҫути курчӗ.

«Канаш» хаҫат облаҫри ытти изданисемпе пӗрле нацисен хушшинчи ҫыхӑнусене ҫирӗплетес, халӑхсен культура пуянлӑхне упраса хӑваракан хатӗр пулса тӑчӗ.

Хыпар ҫӑлкуҫӗ: «Канаш» хаҫат, Чӗмпӗр

#юбилейсем, #Шевле, #хаҫатсем, #Чӗмпӗр