«Шевлере» канакасем

Ҫурлан 14-мӗшпе 27-мӗшӗнче Етӗрне районӗнчи «Детский отдых» (чӑв. Ачасен канӑвӗ) ТМЯП кану базинче республикӑн тӗрлӗ кӗтесӗнчи пултаруллӑ шкул ачисем «Шевле» уйлӑхра канаҫҫӗ. Кунта Шупашкар хулинчи, Муркаш, Йӗпреҫ, Тӑвай, Хӗрлӗ Чутай, Элӗк тата Етӗрне район ачисем лекнӗ.

Ачасен канӑвӗ кӑсӑклӑ иртет. Вӗсене тӗрлеме, ташлама, чӑваш апат-ҫимӗҫне пӗҫерме вӗрентеҫҫӗ. Ҫавӑн пекех ҫак маттур ачасемпе «Тантӑш» хаҫат редакцийӗн журналисчӗсем, К.В. Иванов ячӗллӗ Чӑваш патшалӑх академи драма театрӗн актёрӗсем тӗлпулусем ирттерӗҫ. Паллах, кӑсӑклӑ экскурсисемсӗр ачасен канӑвӗ иртмӗ.

Уйлӑха ҫурлан 15-мӗшӗнче савӑнӑҫлӑн уҫрӗҫ: «Несӗлсен ҫӗрӗ ҫинче» паллашу саманчӗ иртрӗ, ачасем уйлӑх йӗркипе паллашрӗҫ, отрядсене ятсем пачӗҫ, уйлӑх логотипне суйларӗҫ, стена ҫинчи хаҫатсем кӑларма шантарчӗҫ.

Пӗрремӗш кунхине ачасем валли ятарлӑ концерт йӗркелерӗҫ. Чӑвашла сӑвӑсем, юптарусем, юрӑсем янрарӗҫ. Ачасене уйрӑмах Етӗрнери ача-пӑча пултарулӑх ҫурчӗ ҫумӗнчи «Путене» фольклор ансамблӗн юррисем кӑмӑла кайнӑ.

Сӑнсем (13)

#Шевле, #Етӗрне районӗ, #уйлӑхсем, #ачасем, #Шупашкар, #Муркаш районӗ, #Йӗпреҫ районӗ, #Тӑвай районӗ, #Хӗрлӗ Чутай районӗ, #Элӗк районӗ, #Етӗрне районӗ