Чӑвашла фантастика хайлавӗсем пичетленме пуҫланӑранпа 60 ҫул ҫитнине халалланӑ конкурс вӗҫленчӗ — ҫӗнтерӳҫӗсене палӑртрӑмӑр. Тӳрех калам, Вӗрентӳ министерстви сайтӗнче пелтернӗ хыпарта тӗрӗс марри пур — чи лайӑх фантастсем Штанаш шкулӗнче вӗренмеҫҫӗ. Унти вӗренекенсем те чаплӑ, анчах та Вӑрмар районне кӗрекен Чупайри тӗп шкулпа Пучинкери пӗтӗмӗшле пӗлӳ паракан вӑтам шкула (Йӗпреҫ районӗ) ҫӳрекен ачасен хайлавӗсем пирӗн шутпа чаплӑрах. Штанаш шкул ачисен хайлавӗ вара вулавҫӑсене ытларах килӗшнӗ. Хайлавӗ интереслӗ пулнӑран пулӗ — унпа чылайӑшӗ паллашрӗҫ. Сире те интереслӗ пулсан вӑл «Иртнӗ ӗмӗрте пулса куртӑмӑр» ятлӑ. Ҫырасса ӑна ушкӑнпа ҫырнӑ — ҫак ачасем тӑрмашнӑ: Андреев Александр, Лобова Ирина, Ильина Екатерина, Коннова Алевтина, Семенова Ксения, Соловьева Наталия, Сатлайкина Ирина, Софронов Николай.

Ку вӑл вулавҫӑсене ытларах килӗшнӗ хайлав пулчӗ. Пурӗ вара 115 ӗҫ килчӗ. Вӗсене ултӑ ушкӑна пайларӑмӑр. 1-5, 6-8, 9-11 классенче вӗренекенсем тата ҫамрӑксем. Кашни ушкӑна тата икӗ пая пайласа — сӑвӑсене уйрӑм тата калав-юмах-пьесӑсене уйрӑм хакласа. Ҫиччӗмӗш ушкӑн — фантастика темипе ӳкернӗ ӳкерчӗксем. Ачасен вӗсене компьютерпа усӑ курса тумалла пулчӗ.

Хӑшӗ мала тухнӑ-ши тесе чӑтӑмсӑр вулатар пулӗ? Эпӗ пур... каламастӑп та каламастӑп. Итлӗр вара.

1-5 классенчи ачасен сӑввисем

* 1 вырӑн. Пурӗ те икӗ сӑвӑ килнӗрен хальлехе пӗрремеш вырӑна никама та парас мар терӗмер.

* 2 вырӑн. Даниил Кириллов ҫырнӑ «Хӑнара» сӑвӑ. Тӑвай районӗ, Вӑрманти Тӑрӑн пӗтӗмӗшле пӗлӳ паракан вӑтам шкул.

* 3 вырӑн. Комарова Любовь Дмитриевна ҫырнӑ «Уйӑх ҫинчи хӗр » сӑвӑ. Сӗнтӗрвӑрри районӗ, Атӑлҫумри пӗтӗмӗшле пӗлӳ паракан вӑтам шкул.

1-5 классенчи ачасен калавӗсемпе юмахӗсем

Ку ушкӑнра пурӗ 25 ӗҫ хутшӑнчӗ. Вӗсенчен 5-ӗшне вырӑн парас терӗмӗр:

* 1 вырӑн. Яковлева Александра ҫырнӑ «Кичемлӗх» планетӑна инкекрен ҫӑлни» калав. Красноармейски ялӗнчи иккӗмӗш шкул.

* 2 вырӑн. Коннова Алевтина ҫырнӑ «Нарспи» авторӗпе паллашрӑм» калав. Хӗрлӗ Чутай районӗ, Штанаш шкулӗ.

* 2 вырӑн. Куликова Татьяна ҫырнӑ «Уйӑх ҫинче пулса курни» калав. Елчӗк районӗ, Чӑваш Тӑрӑмри пӗтӗмӗшле пӗлӳ паракан шкул.

* 3 вырӑн. Иванова Юлия ҫырнӑ «Пыл туса илме тытӑнни» калав. Вӑрмар районӗ, Пысӑк Енкассинчи тӗп пӗлӳ паракан вӑтам шкул.

* 3 вырӑн. Ксения Семёнова ҫырнӑ «Океана кӗрсе ӳкрӗм» юмах. Хӗрлӗ Чутай районӗ, Штанаш шкулӗ.

6-8 классенчи ачасен cӑввисем

Ку ушкӑнра пурӗ 15 ӗҫ хутшӑнчӗ. Вӗсенчен 4-ӗшӗ ҫак вырӑна йышӑнчӗ:

* 1 вырӑн. Андреева Елена ҫырнӑ «Тӗлӗнтермӗш ҫӗршывра» сӑвӑ. Элӗк районӗ, Вутланти пӗтӗмӗшле пӗлӳ паракан тӗп шкул.

* 2 вырӑн. Васильев Денисӑн «Тӗлӗк» сӑвви. Елчӗкри пӗтӗмӗшле пӗлӳ паракан вӑтам шкул. Сӑмах май, Елчӗк районӗнчи нумай ӗҫ вырӑн йышӑнчӗ — чӑнах та пултаруллӑ ачасем нумай.

* 3 вырӑн. Осипов Григорий ҫырнӑ «Ҫиҫтӗр пурнӑҫ телейпе...» сӑвӑ. Хӗрлӗ Чутай районӗ, Хусанушкӑнчи пӗтӗмӗшле пӗлӳ паракан тӗп шкул.

* 3 вырӑн. Андрей Фёдоров ҫырнӑ «Тӗлӗнтермӗш япала » сӑвӑ. Комсомольски районӗ, Шурутри пӗтӗмӗшле пӗлӳ паракан вӑтам шкул.

6-8 классенчи ачасен калавӗ, юмахӗ тата пьесисем

Ку ушкӑнра пурӗ 60 ӗҫ килчӗ. Шутлӑр-ха! Лайӑх ӗҫсем питӗ нумай пулнӑран вырӑнсене те пама питӗ йывӑр пулчӗ. Хӑш-пӗр лайӑх хайлав вырӑнсӑр та тӑрса юлчӗ. Пите шел ҫав. Мӗнех, телейлисем ҫаксем:

* 1 вырӑн. Никифорова Жаннета ҫырнӑ «Севентей кӳллин вӑрттӑнлӑхӗ» калав. Вӑрмар районӗнчи Чупайри тӗп шкул.

* 2 вырӑн. Егорова Елена Андреевнӑн «Успенди» пьеси. Елчӗк районӗ, Энтепери пӗтӗмӗшле пӗлӳ паракан вӑтам шкул.

* 2 вырӑн. Ольга Васильевӑн «Тавӑрпи» калавӗ. Сӗнтӗрвӑрри районӗ, Урхас Кушкӑри вӑтам пӗлӳ паракан пӗтӗмӗшле шкул.

* 3 вырӑн. Николай Абанниковӑн «Атте ҫӗҫҫи» калавӗ. Элӗк районӗ, Ехремкасси шкулӗ.

* 3 вырӑн. Русскова Галина ҫырнӑ «Алёшкӑн вилӗмсӗрлӗхӗ» калав. Вӑрмар районӗ, Пысӑк Енкассинчи тӗп пӗлӳ паракан вӑтам шкул.

* 3 вырӑн. Степанова Иринӑн «Ҫӑра тыткӑнӗнче» калавӗ. Ҫӗрпӳ районӗ, Михайловкӑри тӗп шкул.

9-11 классенчи ачасен cӑввисем

Ку ушкӑнра пурӗ 4 ӗҫ ярса пачӗҫ. Вырӑнсем ҫаксене лекрӗҫ:

* 1 вырӑн. Семёнова Екатерина ҫырнӑ «Телейлӗ мӑшӑр» сӑвӑ (поэма та теме пулать). Тӑвай районӗ, Йӑнтӑрччӑ тӗп пӗлӳ паракан вӑтам шкулӗ.

* 2 вырӑн. Васильева Аннӑн «Ҫӑткӑн кӑмпасем» сӑвви. Канаш районӗ,

Энтриялӗнчи пӗтӗмӗшле пӗлӳ паракан вӑтам шкул.

* 3 вырӑн. Шляпин Александр ҫырнӑ «Аякри хӑна» сӑвӑ. Елчӗкри пӗтӗмӗшле пӗлӳ паракан вӑтам шкул.

9-11 классенчи ачасемпе ҫамрӑксен калавӗ-юмахӗ

Ку ушкӑнра пурӗ 9 ӗҫ килчӗ. Ку ушкӑнра вара вырӑнсене палӑртма питӗ ҫӑмӑл пулчӗ, виҫҫӗмӗшӗ пирки ҫеҫ кашт шухӑшлама тиврӗ. Вырӑнсем ҫак хайлавсене лекрӗҫ:

* 1 вырӑн. Шибаев Михаил ҫырнӑ «Ҫылӑхсӑр чун» калав. Йӗпреҫ районӗ, Пучинкери пӗтӗмӗшле пӗлӳ паракан вӑтам шкул.

* 2 вырӑн. Иванова Марийӑн «Пуласлӑхри хӑнасем» калавӗ. Йӗпреҫ районӗ, Хурамалти пӗтӗмӗшле пӗлӳ паракан вӑтам шкул.

* 3 вырӑн. Марина Афанасьевӑн «Ӗҫчен Ҫтаппан» юмахӗ. Красноармейскинчи иккӗмӗш шкул.

Ӳкерчӗксем

Ӳкерчӗксем пирки нумай чарӑнса тӑмас. Пӗр япала ҫеҫ каласа хӑварам: хӑш-пӗр ӗҫсене йышӑнман. Сӑлтавӗ — ӗҫе ача хӑй тунине палӑртма йывӑр пулни е ӗҫе алӑпа ӳкерменни (сӑмахран, пӗри ахаль сӑнӳкерчӗксене илне те Photoshop'ра тӗрлӗ фильтрсене усӑ курса хитрелетнӗ). Паллах, фантастика кӑшт та пулин палӑрман ӗҫсене те йышӑнман.

Вырӑнсем ҫапла лекрӗҫ:

* 1 вырӑн. Красильникова А., «Океан тӗпчевӗ». Канашри 11-мӗш шкул.

* 2 вырӑн. Тямин Константин, «Ман ҫурт — ман хӳтлӗх». Шупашкарти 37-мӗш шкул.

* 3 вырӑн. Галкина Елена, «Сӑртри Йетти». Сӗнтӗрвӑрри районӗ, Шӗнерпуҫри пӗтӗмӗшле тӗп пӗлӳ паракан шкул.

Тупӑшӑва хутшӑннӑ пур ачана та, пур ҫамрӑка та мухтас килет! Вырӑнӗ пурне те лекмерӗ пулсан та эсир маттур! Уйрӑмах, чапла хайлав ҫыракансене — эсир пур пулсан чӑвашлӑх пӗтмӗ! Тӑрӑшса вӗренӗр — вӗренни вӑл хӑвсамӑра кайран кирлех пулӗ. Лайӑх вӗренсен сирӗн вӗрентевҫӗсем те савӑнӗҫ.

Ан манӑр, лайӑх хайлавсем «Тантӑшра» пичетленӗҫ. Ку хаҫата ҫырӑнман пулсан — ҫырӑнма ан манса кайӑр — хаҫат алӑра чухне хайлава вулама лайӑхрах!

Хамӑр енчен ҫӗнтурӳҫӗсене пурне те парнесем парӑпӑр. 1-мӗш вырӑн йышӑнакансене 60х40 см пысӑкӑш карттин, ыттисене 30х20 пысӑкӑш рамкӑри сӑнӳкерчӗк. Асӑнмаллӑх юлаҫҫех пулӗ тесе шутлатпӑр.

Ку конкурсра ҫӗнтереймерӗр пулсан — тепринче вӑй хурса пӑхӑр. Тепер ҫул, чипер пулсан, конкурса тепре те ирттерӗпӗр. Кунхинче вара ял темине палӑртса. Енчен те вырӑн йышӑнас килет пулсан — хальтерех пуҫлӑр, ҫулталӑк хушшинче ҫырна хайлава якатса ҫитереттӗрех.

Пур хутшӑнакана та тепӗр хут ӑнӑҫу сунар!

#Канаш районӗ, #Канаш, #Шупашкар, #Элчӗк районӗ, #Красноармейски, #Хӗрлӗ Чутай районӗ, #Элӗк районӗ, #Сӗнтӗрвӑрри районӗ, #Вӑрмар районӗ, #конкурссем, #литература, #шкулсем, #Комсомольски районӗ, #Йӗпреҫ районӗ, #Ҫӗрпӳ районӗ