Хӗвелтухӑҫ спортсменӗсен ҫулҫӳревӗ 30 сехете тӑсӑлнӑ. «Спорт» хӑна ҫуртне вырнаҫнӑ, канса илнӗ хыҫҫӑн вӗсем тӳрех ҫывӑхри лавккана васканӑ. Мӗн туяннӑ тетӗр-и? Пилӗк литр кӗрекен 15 савӑт «Архыз» минерал шывӗ. Ку 14 спортсмена виҫӗ куна анчах ҫитет. Пӗрле килнӗ врач валли аптекӑра шурӑ халат та туяннӑ. Унӑн багажӗ ҫул ҫинче ҫухалнӑ иккен. Ун пекки авиарейссенче час-часах пулать. Акӑ Шупашкара пӗр колумбиец та чӑматансӑр ҫитнӗ.

Китаецсенчен ушкӑн менеджерӗ Колин анчах акӑлчанла пӗлет. Вӑл тата Юлия студентка пулӑшнипе ҫеҫ пӗр-пӗрне ӑнлантӑмӑр. Техӗмлӗ апат ҫиме юратакан китаецсем хӑйсемпе пӗрле специсем те илсе килнӗ.

Китаецсем иккӗмӗш кунне тӳрех «Олимпийский» тӗп стадиона тухнӑ. Кашни спортсменӑн хӑйӗн тренировкӑсен йӗрки иккен. Хӑшӗсемшӗн кунне - виҫшер, икшер е пӗрре утни те ҫителӗклӗ. Китаецсем тренировка хыҫҫӑн тӳрех тӗп трассӑпа паллашма васкарӗҫ.

- Ӑмӑрту ирттермелли вырӑна тӗрӗсех суйласа илнӗ-ши? - ыйтрӑм команда тренерӗнчен Ю.Вэй Лиран.

- Шӑрӑх та, сивӗ те мар. Сывлӑш температури шӑпах Кубок ирттерме юрӑхлӑ. Килсе ҫитнӗ спортсменсене климата хӑнӑхма та ҫӑмӑл. Трасса йӗри тавра симӗс тӗс - ешерекен йывӑҫ-курӑк тата шыв пулни лайӑх витӗм кӳрӗ ӑмӑртакансене.

- Сирӗн йышра Испанире иртнӗ Кубокӑн призерӗсем те пур-и?

- Ҫирӗм ҫухрӑм утакан Хань Юсень.

- Олимпиадӑна хутшӑнакан команда йышӗ паллӑ-и?

- Ҫӗртме уйӑхӗнче анчах паллӑ пулӗ. Хальхи Кубокӑн кӑтартӑвӗсемпе суйласа илӗҫ. Пирӗн спортсменсем ака уйӑхӗнче иртнӗ ӑмӑрту хыҫҫӑн канса ӗлкӗреймен-ха. Хальхинче те лайӑх утасса шанатӑп.

Китаецсем Раҫҫей спортсменӗсене чи вӑйлисен шутне кӗртеҫҫӗ. Хӑйсен йышӗнчи вӑйлӑрах спортсменсемпе ҫывӑхрах паллаштарма ыйтсассӑн сӑпайланчӗҫ: «Кайран, ӑмӑрту хыҫҫӑн».

Хыпар ҫӑлкуҫӗ

#Шупашкар, #Тӗнче кубокӗ-2008, #хӑнасем