«Хуйхӑрсан та — юрӑпа, савӑнсан та — ташӑпа», — ҫак сӑмахсене ват кинемейсенчен пӗр хутчен мар илтнӗччӗ. Чӑвашсен мӗн авалтанпа юрӑ шӑрантарас, ташӑ ҫапас йӑла ҫирӗпленнӗ. Пирӗн, хальхи ӗмӗрен ҫыннисен вара ҫак халӑх юрӑ-ташшисене, йӑли-йӗркисене манӑҫмалла мар, мӗншӗн тесен вӗсем халӑх культурине палӑртаҫҫӗ.

Ҫак кунсенче «Истоки Цивиля» (чӑв. «Ҫавал ҫӑлкуҫӗ») регионсем хушшинчи туслӑх фестивалӗ Чӑваш Енри чи кӑсӑклӑ коллективсене пуҫтарнӑ. Фестивальӗн тӗп тӗллевӗ — халӑх йӑли-йӗркине чӗртсе тӑратасси тата юрӑ-ташӑ ушкӑнӗсем хушшинчи пултаруллӑх ҫыхӑнӑвне йӗркелесси. Иртнӗ кану кунӗсенче Ҫӗрпӳ районӗнчи Виҫҫӗмӗш Вӑрманкасси ҫывӑхӗнчи улӑха Сӗнтӗрвӑрри, Ҫӗмӗрлӗ, Вӑрнар, Элӗк тата Ҫӗрпӳ районӗсен фольклор ушкӑнӗсем пухӑннӑ.

Ку ҫулччен фестиваль икӗ хутчен Ҫӗмӗрле районӗнчи Тӑванкасси ялӗнче иртнӗ, ара унта Мӑн Ҫавал юханшывӗ пуҫланать-ҫке. Кӑҫал вара фестивале Ҫӗрпӳ районӗнче ирттерме чӗрет ҫитнӗ.

Кӑҫал юрӑ-ташӑ уяв программи хӑйӗн пуянлӑхӗпе тата кӑсӑклӑхӗпе асра юлнӑ. Ку хутӗнче, сӑмахран, фестивальте юрӑпа ташӑ ушкӑнӗсем пӗрремӗш хут алла аллӑн тытса юрӑ карти йӗркеленӗ.

Тепӗр ҫул ҫак фестивале Вӑрнар районӗнче иртермелле теҫҫӗ.

#фестивальсем, #Истоки Цивиля, #Ҫӗрпӳ районӗ, #Виҫҫӗмӗш Вӑрманкасси, #Сӗнтӗрвӑрри районӗ, #Ҫӗмӗрле районӗ, #Вӑрнар районӗ, #Элӗк районӗ, #Тӑванкасси