Ҫитес ҫуркунне Константин Иванов ҫырнӑ «Нарспи» поэма «Сказки и предания чуваш» - «Чӑваш халапӗсем» кӗнекере пичетленсе тухнӑранпа 100 ҫул ҫитет. Пӗлтерӗшлӗ ҫак саманта Чӑваш хӑлах, Раҫҫей тава тивӗҫлӗ художникӗ Праски Витти (В.П.Петров) нумайлӑха асра хӑварма шухӑш тытнӑ. Сӑмах акӑ мӗн пирки: Виталий Петрович «Нарспи0 поэмӑна пӑхмасӑр калакансен конкурсне ирттересшӗн. «Чӑваш, ку поэма сан ҫинчен, — тет паллӑ ӳнерҫӗ. — Эсӗ кил-ҫуртунта ӗҫлетӗн-и, чухӑн-и е ҫав тери пуян-и — вула, поэмӑра хӑвна куран; хӗр-упраҫ — ӗҫлеме, юрлама, ташлама вӗренсе пыратӑн, юрату килет... Мӗнле шӑпаллӑ пулӑн Эсӗ, телейлӗ е хуйхӑллӑ... вула, хӑвна курӑн. Чӑваш, таран шухӑшлӑ ку произведенире хӑвӑн пурнӑҫна — пулни-иртнине, паянхине, пулассине — пӗтӗмпех курма май пур, вула».

Тӑван халӑхӑн гениллӗ поэтне хисеплесе, вилӗмсӗр «Нарспи» поэмӑна чӑваш хушшинче тата вӑйлӑрах пропагандӑлас тӗлӗшпе «Хыпар» хаҫат Праски Виттине пулӑшма тӗв тытрӗ, асӑннӑ конкурсӑн информаци спонсорӗ пулма килӗшрӗ. Пирӗн пӗрлӗх те ҫак енчен пулӑшӗ — сире конкурс епле пыни ҫинчн пӗлтерсех тӑрӗ.

Праски Витти «Нарспи» поэмӑна пӗтӗмпех пӑхмасӑр калакансен ҫӗнтерӳҫисене хӑйӗн ӗҫӗсене парнелеме тата «Нарспи» поэма тӑрӑх ӳкерчӗксем тума вӗрӗнтме шантарать. «Хыпар» хаҫат та парнесемпе хавхалантарӗ.

«Нарспие» пӑхмасӑр пӗлекенсем, конкурса хутшӑнас текенсем Виталий Петровича ҫак телефонсемпе шӑнкӑравласа тупма пултараҫҫӗ: (8352) 42-69-44; 89051995587; электронлӑ почти: praskiwitti@yandex.ru. Е «Хыпар» хаҫата кӗрсе тухӑр, ҫыру ҫырса пӗлтерӗр.

Хыпар ҫӑлкуҫӗ

#Конкурссем, #культура