Ҫу уйӑхӗн 2-мӗшӗнче Шупашкарти Трактор историйӗн ӑслӑлӑхпа техника музейӗнче Екатеринбургри ачасем пулнӑ. Вӗсем — арҫын ачасемпе яшсен «Созведие» ансамбльне ҫӳрекенскерсем. Асӑннӑ ушкӑн – пӗтӗм Раҫҫейри тата тӗнчери конкурссен лауреачӗ тата дипломанчӗ пулнӑ. Вӗсем Чӑваш Ен тӗп хулинчи ҫак хӑйне евӗр музейпа кӑмӑлтан тата кӑсӑклансах паллашнӑ.

Пирӗншӗн, чӑвашсемшӗн, чи кӑмӑлли тата хавасланмалли вара урӑххи. Арҫын ачасемпе яшсем чӑвашла юрласа савӑнтарни. Кун пирки Чӑваш Республикин культура тава тивӗҫлӗ ӗҫченӗ, музей директорӗ Альберт Сергеев «Контактра» халӑх ушкӑнӗнче хыпарланӑ, ҫавна ҫирӗплетсе видкео вырнаҫтарнӑ.

Ачасем «Кӗрекере ларса савӑнар» юрра шӑрантарнӑ.

«Чӳречине яри те уҫса ярар

Итлемешкӗн сарӑ кайӑк, ай, юррине,

Итлемешкӗн сарӑ кайӑк, ай, юррине.

Атя уҫса яр, умне пырса лар,

Сарӑ кайӑк юрланине илтсе йӑпанар,

Сарӑ кайӑк юрланине илтсе йӑпанар» — янӑратнӑ Екатеринбургри арҫын ачасемпе яшсем.

#Екатеринбург, #пултарулӑх, #ушкӑнсем, #ачасем, #чӑвашлӑх, #чӑваш чӗлхи, #культура, #музейсем, #Шупашкар