Шупашкар хула администрацийӗн пуҫлӑхӗн Алексей Ладыковӑн икӗ ҫумӗн пуканӗсем пӗлтӗртенпех пушӑччӗ. Тинех конкурссем вӗҫленнӗ — яваплӑ должноҫсене йышӑнакансем тупӑннӑ. Кун пирки «Мой город Чебоксары» портал хыпарлать.

Хайхи ҫӑлкуҫ пӗлтернӗ тӑрӑх, ҫӗнӗ тӳре-шарапа Алексей Олегович паян, ҫу уйӑхӗн 13-мӗшӗнче, кулленхи канашлура паллаштарнӑ.

Ҫапла майпа Иван Кучерявый хула администраци пуҫлӑхӗн архитектурӑпа хула строительствин енӗпе ӗҫлекен ҫумӗ пулса тӑнӑ. Вӑл пӗлтӗрхи утӑ уйӑхӗнче ЖКХпа хула хӑтлӑхӗн управленийӗн ертӳҫин ҫумӗ пулса вӑй хума тытӑннӑ. «Связь Банк» банк филиалӗн операци офисӗн директорӗнче тимленӗ Владимир Яковлева хула администраци пуҫлӑхӗн экономика аталанӑвӗпе финанс енӗпе ӗҫлекен ҫумӗ пулма ҫирӗплетнӗ.

#конкурссем, #Шупашкар, #тӳре-шара, #политика