Сидорова Людмила Николаевна

Пушӑн 31-мӗшӗнче республикӑри ют чӗлхесене вӗрентекенсем педуниверситетра «Most dedicated teacher» — «Чи шанчӑклӑ вӗрентекен» конкурсӑн виҫҫӗмӗш тапхӑрне пухӑнчӗҫ. Ку ӑмӑртӑва республикӑри хальхи вӑхӑтри гуманитари вӗрентӳ центрӗ Лингва йӗркеленӗ. Кӑҫал вӑл 3-мӗш хут иртрӗ. Малтанхи тапхӑрта конкурсантсем эссе хайланӑ, унтан - методикӑпа тата грамматикӑпа тест витӗр тухнӑ. Виҫҫӗмӗш тура республикӑри тӗрлӗ районта ӗҫлекен 22 акӑлчан чӗлхи вӗрентекенӗ тивӗҫ пулнӑ.

Пухӑннисене ют чӗлхесен факультечӗн деканӗ Никитинская Лариса Владимировна саламларӗ. Алла Петровна Макарова пухӑннисене центр пирки каласа пачӗ, пурне те ӑнӑҫу сунчӗ. Пӑлхануллӑ самант. Кашни черет хутне туртса илет, черетпе билет туртса кӑларса ҫийӗнчех билет ыйтӑвӗсем ҫине тулли ответ пама тӑрӑшать. Калӑпӑр, Ирина Анатольевна Мареевӑн: «Енчен те сирӗн юратнӑ ҫынпа пӗрле урӑх нихӑҫан та хӑвӑн тӑванусене курмассине пӗле тӑрах аякри ҫӗршыва тухса каяс килет-и?» Наталия Михайловна Матвеевӑн — «Эсир мулпа ытларах хитререх тумланма е хваттере илемлетме усӑ курӑтӑр?». Александр Николаевич Николаевӑн — «Енчен те тепӗр эрнерен ядерлӑ вӑрҫӑ тухасса пӗлсен эсир вӑхӑта еплерех ирттернӗ пулӑттӑр?» — «Ҫамрӑк вӑхӑта таврӑнас килет-и сирӗн? Эсир шкулта ӗҫлемесӗр килте кӑна ларма хатӗр-и?...»

Жюрире США ҫынни Ферроу Честон Лин та пулчӗ. Тӳрех калас пулать, васкаса каланӑ ыйтӑва ӑнланма йывӑртарах тапхӑрсем пулчӗҫ пулин те кашни конкурсант экзамена ӑнӑҫлӑ тытрӗ. Лауреат ятне Е.П. Светопольская (Елчӗк районӗ), Н.В.Коростелева (Шупашкар), С.А. Николаева (Вӑрмар районӗ), Т.Н. Толстова (Шупашкар), 3-мӗш вырӑнта — В.В. Дмитриева (Муркаш районӗ), 2-мӗш — Л.А. Леванова (Ҫӗмӗрле хули), пӗрремӗш вырӑна вара Етӗрне районӗнчи Пӑчанар ялӗнче кун ҫути курнӑ, Кӑкшӑмри 8 ҫул вӗренмелли шкул директорӗнче ӗҫленӗ Пчелкин Николай Ивановичпа Валентина Викторовнӑн хӗрӗ (халӗ Шуршӑлти__ вӑтам шкулта 30-мӗш ҫул ачасене акӑлчан чӗлхи вӗрентекен) тӗрлӗ конкурссен ҫӗнтерӳҫи Сидорова Людмила Николаевна тивӗҫрӗ.

Людмила Николаевна 2007 ҫулта «Раҫҫейри чи лайӑх вӗрентекен» гранта илме тивӗҫлӗ пулнӑ, «Ҫулталӑк вӗрентекенӗ» конкурсра та «За творческое дерзание» (чӑв. «Пултаруллӑ хавхаланушӑн») номинацире лауреат ятне тивӗҫнӗ, Кембридж экзамӗсене ӑнӑҫлӑ тытнӑ.

Ют чӗлхеҫӗсем конкурса тӑратнӑ ӗҫсенчен брошюра кӑларма сӗнчӗҫ.

#ӑмӑртусем, #акӑлчан чӗлхи, #вӗрентекенсем, #Елчӗк районӗ, #Шупашкар, #Ҫӗмӗрле, #Вӑрмар районӗ, #Муркаш районӗ, #Етӗрне районӗ, #Пӑчанар