Юпан 11-мӗшӗнче Красноармейски ялӗнчи Ленин урамӗнчи 89-мӗш ҫуртра (финн поселокӗн микрорайонӗнче) халӑх апатланӑвӗн ҫӗнӗ предприятийӗ — «Трак ен» кафе — уҫӑлчӗ.

Ҫав ятпа кунта иртнӗ савӑнӑҫлӑ мероприятине район администрацийӗн пуҫлӑхӗ В. В. Александров, ытти хӑнасем, «Уяв» фольклор ансамблӗ хутшӑнчӗҫ.

«Ӑнӑҫлӑ ӗҫлемелле пултӑр сирӗн», — терӗ Владимир Валерьянович хӗрлӗ хӑйӑва каснӑ май.

Кафе директорӗ Л. М. Петрова ӑна, ытти хӑнасене ӑшшӑн тав турӗ, «Трак ен» алӑкӗ пурин валли те уҫӑ пулнине палӑртрӗ.

Пӗлме. Людмила Михайловна Петрова — Красноармейски районӗнченех, Васнар ялӗнчен. Халӑх апатланӑвӗн тытӑмӗнче нумай ҫул вӑй хурать. 2001 ҫулта ӑна «Раҫҫей Федерацийӗн мастер-поварӗ» ят панӑ.

Кафере 2 зал: пӗри 80 ҫын вырнаҫмалӑх, тепри (банкетсем ирттермелли пӗчӗк зал) — 12 ҫын валли. Вӗсенче таса та ҫутӑ, хӑнасене тарават йышӑнма пӗтӗм майсем пур. Пысӑк зал стени ҫине хальхи йышши телевизор вырнаҫтарнӑ: спорт тата вӑйӑ, ытти передачӑсем пӑхма меллӗ. Кӗҫех тата тепӗр зал уҫма палӑртаҫҫӗ.

1-2-мӗш апатсен ассортименчӗ пысӑк, хакӗсем те пурне те тивӗҫтермелле. Кунта юбилей, корпоратив каҫӗсем, банкетсем ирттерме те, кукӑль-икерчӗ пӗҫерме те заявкӑсем йышӑнаҫҫӗ. Кафе ӗҫченӗсем (сӑмах май, кунта 9-ӑн вӑй хураҫҫӗ) тутлӑ апат-ҫимӗҫпе вырӑна тухса та тивӗҫтерме хатӗр.

«Трак ен» кафе 10 сехетрен тытӑнса 23 сехетчен канмалли кунсемсӗр ӗҫлет. Сире кунта яланах хапӑл туса кӗтсе илӗҫ, тутлӑ апат-ҫимӗҫпе хӑналӗҫ. Красноармейски урлӑ иртсе каймалли ӗҫсем пулсан керсе тухма ан манӑр — техӗмлӗ апатпа сӑйлӗҫ.

#Красноармейски районӗ, #апатлану, #Красноармейски