Раштав уйӑхӗн 27-мӗшӗнче 18 сехетре ЧР Элтеперӗ Олег Николаев «тӳрӗ лини» ирттерет. Олег Алексеевич 2020 ҫултанпа 14 «тӳрӗ эфирпа» «тӳрӗ лини» ирттернӗ.

Хальхине Элтепер ҫулталӑка пӗтӗмлетӗ, республика аталанӑвӗн кӑтартӑвӗсемпе паллаштарӗ, ыйтусене хуравлӗ. Ыйтусене мӗнле ямалла? Ятарлӑ формӑна тултармалла: https://forms.yandex.ru/cloud/63a2a73a6938723750653290/.

«Тӳрӗ лини» вӑхӑтӗнче колл-центр та ӗҫлӗ, номерӗ – 56-51-00. Эфира Наци радиовӗпе тата Тӑван радиопа итлеме пулать. «Контактра» халӑх тетелӗнче те «Чувашская Республика» ушкӑнра курма май пур.

cap.ru сӑнӳкерчӗкӗ

Паян Чӑваш Енӗн экономика аталанӑвӗн тата пурлӑх хутшӑнӑвӗсен министрӗ пулма Дмитрий Бельцова ҫирӗплетнӗ.

Уҫӑ ҫӑлкуҫсене тишкерсен, ҫавӑн пек ятлӑ ҫын юридици наукисен кандидачӗ пулни палӑрать.

Вӑл 1979 ҫулхи ҫу уйӑхӗн 2-мӗшӗнче Ҫӗмӗрле районӗнчи Якуртушкӑнь ялӗнче ҫуралнӑ. РФ Шалти ӗҫсен министерствин Юридици институчӗн Шупашкарти филиалӗнче вӗреннӗ. 1996 ҫултанпа шалти ӗҫсен органӗсенче ӗҫлет. Кунсӑр пуҫне вӑл И.Н. Ульянов ячӗллӗ ЧПУра юридици факультетӗнче преподаватель пулса тӑрӑшни паллӑ.

Паянтан Вӑрмар районӗн администрацине Василий Шигильдеев ертсе пырӗ. Унччен ку должноҫре Дмитрий Иванов ӗҫленӗ.

Василий Викторович 1966 ҫулта ҫуралнӑ, Мускавра ФСБ Академине пӗтернӗ. Хальхи вӑхӑтра «НПП «Каскад-ГРУП» тӗп директорӗнче вӑй хурать. Хӑй Чупай ялӗнче пурӑнать. Унччен ҫак ял тӑрӑхӗн депутачӗ пулнӑ.

Аса илтерер: Дмитрий Иванов администрацие 2020 ҫулхи ҫурлан 21-мӗшӗнченпе ертсе пынӑ.

Республикӑн онкодиспансерӗнче тӗп тухтӑрта икӗ уйӑх ӗҫленӗ хыҫҫӑн Светлана Баландина ку должноҫре тек тар тӑкмӗ. «Ҫыхӑнура» форумра пӗлтернӗ тӑрӑх, Чулхула хӗрарӑмӗ ӗҫрен эрнекун пӑрахнӑ.

2018 ҫултанпа асӑннӑ пульницӑра тӗп врач пиллӗкмӗш хутчен ылмашнӑ. Анчах Светлана Баландинӑна ҫитекен пулман – вӑл икӗ уйӑхранах тӗп врач пуканне пушатнӑ. Хӗрарӑма ку тилхепене юпа уйӑхӗн 17-мӗшӗнче тыттарнӑ, раштав уйӑхӗн 16-мӗшӗнче вӑл ӗҫрен кайнӑ.

Онкодиспансерӑн тӗп врачӗнче унччен ӗҫленӗ Сергей Карамаликов тӗлӗшпе ҫулла пуҫиле ӗҫ пуҫарнӑ.

2023 ҫулхи кӑрлачӑн 1-мӗшӗнчен Чӑваш Енри пӗтӗм район муниципалитет округӗ пулӗ. Ҫапла йышӑннӑ ЧР Министрсен Кабинечӗн кӑҫалхи юлашки ларӑвӗнче.

Хальччен республикӑра 5 хула округӗ тата 21 муниципалитет районӗ пулнӑ. Ҫак статуса чи малтан йышӑннисем – Красноармейски тата Ҫӗмӗрле районӗсем. Кӑрлачӑн 1-мӗшӗнчен ытти 19 район муниципалитет округӗ пулӗ.

Мӗн улшӑнӗ? Ял тӑрӑхӗсенче депутат корпусӗ пулмасть, муниципалитет округӗн шайӗнчисем кӑна юлаҫҫӗ.

Тӳре-шара ӑнлантарнӑ тӑрӑх, кун пек улшӑнӑвӑн лайӑх енӗ кӑна: укҫа-тенкӗ пӗр алӑра пулӗ, ыйтусем хӑвӑртрах татӑлӗҫ. Ҫапла майпа халӑх пурнӑҫӗн пахалӑхӗ те лайӑхланӗ.

Ҫӗрпӳ районӗнчи Иккӗмӗш Вӑрманкас ял тӑрӑхӗн пуҫлӑхӗн тивӗҫӗсене вӑхӑтлӑха пурнӑҫлама 21 ҫулти Мария Ивановӑна шаннӑ.

Мария 2020 ҫулта Шупашкарти электромеханика колледжӗнчен "ЧПУ станокӗсен операторӗ" специальноҫпе вӗренсе тухнӑ. Вӑл И.Я.Яковлев ячӗллӗ Чӑваш патшалӑх педагогика университетӗнче "Физика вӗрентӗвӗн методики" специальноҫпе хатӗрленнӗ. Халӗ Мускав политехника университечӗн Шупашкарти филиалӗнче "Техника системинчи управлени" специальноҫпе 3-мӗш курсра вӗренет.

Шупашкра хула администрацийӗ сӑнӳкерчӗкӗ

Паян, раштав уйӑхӗн 5-мӗшӗнче, Чӑваш Енӗн строительство, архитектура тата ҫурт-йӗрпе коммуналлӑ хуҫалӑх министрӗн заместителӗ пулма Алёна Александринӑна ҫирӗплетнӗ.

Алёна Васильевна унччен Шупашкар хула администрацийӗн Ҫурт-йӗрпе коммуналлӑ хуҫалӑх, энергетика, транспорт тата ҫыхӑну управленийӗнче финанспа экономика пайне ертсе пынӑ. Ҫурт-йӗрпе коммуналлӑ хуҫалӑх отраслӗнче ҫав хӗрарӑм 20 ҫул ытла тӑрӑшнӑ.

ЧР цифра министрӗ Кристина Майнина ӗҫрен кайни пирки сайтра хыпарланӑччӗ. Олег Николаев Элтепер ун вырӑнне хальлӗхе урӑх ҫынна палӑртнӑ. Министр тивӗҫӗсене Екатерина Грабко пурнӑҫлӗ.

Вӑл 2019 ҫулхи пуш уйӑхӗнченпе министр ҫумӗ пулнӑ. Унччен И.Н.Ульянов ячӗллӗ Чӑваш патшалӑх университетӗнче ӗҫленӗ.

Аса илтерер: Кристина Майнина министрта 2021 ҫулхи кӑрлач уйӑхӗнченпе ӗҫленӗ. Кӑҫал чӳк уйӑхӗн 24-мӗшӗнче хӑйӗн ирӗкӗпе ӗҫрен кайнӑ.

Екатерина Кузьмина. minec.cap.ru сӑнӳкерчӗкӗ

Ҫак эрнере республикӑн экономика аталанӑвӗн тата пурлӑх хутшӑнӑвӗсен министрӗн ҫумне Екатерина Кузьминана ӗҫрен кӑларнӑ. Хушӑва республика ертӳҫи Олег Николаев чӳк уйӑхӗн 23-мӗшӗнче алӑ пуснӑ.

«Чувашинформ.рф» порталта пӗлтернӗ тӑрӑх, Екатерина Кузьмина министр заместителӗ пулса 3 ҫул ытларах ӗҫленӗ – ку должноҫре вӑл 2019 ҫулхи юпа уйӑхӗнченпе тӑрӑшнӑ.

Вӑл малашне те министерствӑрах ӗҫлӗ, анчах приватизаци пайӗн пуҫлӑхӗн пуканне йышӑннӑ.

Октябрӗн 30-мӗшӗ — политика репрессийӗсенче асап тӳснисене асӑнмалли кун

ҪАПЛА каласа, куҫҫуль юхтарса йӗнӗ Дарья Трофимова хӑйне тытса кайма килнӗ милиционерсем умӗнче. Анчах йӗни те, тархаслани те пулӑшайман: ҫуркуннехи ҫав каҫ Ҫӗнӗ Тӑрӑн ялӗнчи 5 ҫынна конвойпа Улатӑр тӗрмине илсе кайнӑ. Дарья Трофимова та — 27-ри тӗттӗм чӑваш хӗрарӑмӗ — икӗ ҫулти тата ултӑ уйӑхри ачисене куҫҫульпе йӗпетсе инҫе ҫула пуҫтарӑннӑ.

Чӑваш АССРӗн Тӗп сучӗ ҫумӗнчи ятарлӑ коллеги Ҫӗнӗ Тӑрӑн ялӗнчи граждансене айӑпласа йышӑннӑ приговортан

(1935 ҫулхи августӑн 2-4-мӗшӗсем)

1935 ҫулхи августӑн 2-4-мӗшӗсенче ЧАССР Тӗп сучӗ ҫумӗнчи ятарлӑ комиссии Шупашкар хулинче иртнӗ судӑн хупӑ ларӑвӗнче ЧАССР Патӑрьел районӗнчи (ун чух Ҫӗнӗ Тӑрӑн ялӗ ҫак района кӗнӗ — авт.) Ҫӗнӗ Тӑрӑн ялӗнчи ҫак граждансен 74-мӗш номерлӗ уголовнӑй ӗҫне пӑхса тухнӑ:

1. Гаврилов Николай Алексеевич, 1874 ҫулта ҫуралнӑ, чӑваш, хутла кӑштах пӗлет, ҫемьеллӗ, партире тӑмасть, кулак тесе судпа айӑпланнӑскер.

2. Андреев Илья Андреевич, 55 ҫулта, чӑваш, хутла пачах та пӗлмест, ҫемьеллӗ, партире тӑмасть, судпа айӑпланман, колхоза кӗмен.

Малалла...