medicin.cap.ru сӑнӳкерчӗкӗ

Вӑрнар тарӑхӗнчи пӗр ялта пурӑнакан 54-ри арҫынна пӗр кунхине япах пулса кайнӑ. Унӑн сылтам аллипе ури итлесшӗн пулман, чӗлхи ҫыхланма тытӑннӑ, пуҫӗ кӑштах ыратнӑ. Кил хушшинче ӗҫлекенскер мӗнпур вӑйне пухса килне кӗнӗ те тӑванне васкавлӑ пулӑшу чӗнме ыйтнӑ. Арҫыннӑн ун пекки темиҫе ҫул каялла пулнӑ иккен.

Вӑрнартан килсе ҫитнӗ васкавлӑ пулӑшу тухтӑрӗсем ӑна Ҫӗмӗрлери медицина центрне илсе ҫитернӗ, унти тухтӑр Шупашкара ӑсатма йышӑннӑ. Ҫавӑн валли вертолёт чӗнсе илнӗ. Инсульт пулнӑ арҫынна Республикӑри клиника пульницин тухтӑрӗсем пулӑшнӑ.

cap.ru сӑнӳкерчӗкӗ

Чӑваш Енре электрокардиограммӑна искусство интеллекчӗ тишкерме пуҫлӗ. Ҫӗнӗлӗхе ӗҫлеттерсе ярас ӗмӗтлине республикӑн вице-премьерӗ Владимир Степанов Пӗтӗм тӗнчери «ОргЗдрав – 2025» XIII конгресра тухса калаҫнӑ чухне палӑртса хаварнӑ.

Мускавра ҫӗртме уйӑхӗн 9-10-мӗшӗсенче иртекен мероприятие ҫӗршыври сывлӑх сыхлавӗн отраслӗнче тӑрӑшакансем пуҫтарӑннӑ.

Кӑҫалхи конгресӑн теми — «Тренды российского здравоохранения сквозь призму специальностей и новых технологий». Чӑваш Ен пирки каласан, пирӗн регион сывлӑх сыхлав отрасле цифровизаци енчен малта пыракан регионсен йышӗнче-мӗн.

cap.ru сӑнӳкерчӗкӗ

Раҫҫей кунӗ тӗлӗнчи канмалли кунсенче сывлӑх сыхлав учрежеднийӗсем епле ӗҫлесси паллӑ.

Ҫӗртме уйӑхӗн 11-мӗшӗ кӗске ӗҫ кунӗ пулӗ, ҫав шутра тухтӑрсен те. Ҫӗртме уйӑхӗн 12-мӗшӗнче пульницӑсем (стационарсӑр тата васкавлӑ пулӑшу паракан тухтӑрсемсӗр пуҫне) канӗҫ.

Ҫӗртме уйӑхӗн 12-мӗшӗнче шӑматкунхи графикпа ӗҫлӗҫ. Ҫӗртме уйӑхӗн 15-мӗшӗнче канӗҫ.

cap.ru сӑнӳкерчӗкӗ

Чӑваш Енри тухтӑрсем Алла Пугачевӑн пурнӑҫне ҫӑлнӑ. Вӑл чутах эндокардита пула вилмен.

41 ҫулти Аллӑна Улатӑртан санавиаципе илсе килнӗ. Малтан унӑн ӳт температури хӑпарнӑ, апат анма пӑрахнӑ, ӳчӗ кӑвакарнӑ, вӑйӗ пӗтнӗ. Ӑна вертолетпа Республикӑри кардиологи диспансерне илсе ҫитернӗ. Унти хирургсем кӑткӑс операци тунӑ.

«Ылтӑн алӑллӑ тухтӑрсене тав. Манӑн икӗ ача. Халӗ каллех вӗсемпе пулайӑп», – тенӗ Алла Пугачева.

www.cap.ru сӑнӳкерчӗкӗ

Патӑрьел районӗнчи Шӑнкӑртам ялӗнче физкультурӑпа сывлӑх комплексӗ ҫӗклеҫҫӗ. Вырӑнти администрацире пӗлтернӗ тӑрӑх, строительство графикпа килӗшӳллӗн пулса пырать. Ӗҫе пурнӑҫлаканни ­«Строитель ПЛЮС» организаци. Халӗ унта никӗс яма тытӑнасшӑн.

Физкультурӑпа сывлӑх комплексӗ 2987 тӑваткал метр лаптӑкӗш пулӗ. Проектпа пӑхса хӑварнӑ тӑрӑх, унта тренажер, фитнес, аэробика залӗсем, универсаллӑ вӑйӑ залӗ тата ытти пулӗ.

ФОКа 2026 ҫулхи чӳк уйӑхӗнче туса пӗтермелле.

medicin.cap.ru сӑнӳкерчӗкӗ

Каҫал тӑрӑхӗнче ватӑ ҫынсене ялти тухтӑр урама утма илсе тухнӑ. Комсомольски муниципаллӑ округӗнчи Кайнлӑк ялӗнчи фельдшерпа акушер пункчӗн заведующийӗ Инна Алякина «Хастар вӑрӑм ӗмӗр» шкул йӗркеленӗ. Ҫавна май вӑл ял ҫыннисене скандинави мелӗпе утма тухма хавхалантарать.

Фельдшер ҫынсене икӗ алла пӗрер туя тытса утни чӗрепе юн тымарӗсен тытӑмне лайӑхрах ӗҫлеттернине, мышцӑсене ҫирӗплетнине каласа кӑтартать.

yaltch.cap.ru сӑнӳкерчӗкӗ

Ӗҫе кайсан е профессие пула шар курнӑ ҫынсем Чӑваш Енри санаторисенче сипленейӗҫ. Кун пирки Социаллӑ фондӑн Чӑваш Енри уйрӑмӗнче пӗлтереҫҫӗ.

Асӑннӑ уйрӑм санаторипе курорта кайса сипленме путевкӑсем парать. Анчах ӑна илме медицинӑпа социаллӑ экспертиза бюровӗ хатӗрленӗ ятарлӑ программа пулмалла. Санаторире сипленме ҫыннӑн эпир маларах асӑннӑ фондӑн уйрӑмне заявлени памалла. Е патшалӑх пулӑшӑвӗсен порталӗ урлӑ, е уйрӑмӑн клиент службине ҫитсе.

Чӑваш Енре 4 санаторие кайма пулать. Вӗсем ҫаксем: «Чӑваш Ен», «Чӑваш Ен курорт», «Волжские зори» тата «Надежда».

ural.tsargrad.tv сайтри сӑн

Ҫӗмӗрлери 9-мӗш гимназире вӗренекенсене тухтӑрсен пулӑшӑвӗ кирлӗ пулнӑ. Вӗсен пыршӑлӑх инфекцийӗн симптомӗсем пулнӑ.

Пӗр ачана пульницӑна вырттарма тивнӗ. Ыттисем килте педиатр сӑнаса тӑнипе сипленеҫҫӗ. Ку ыйтӑва республикӑри Сывлӑх сыхлавӗн министерстви те куҫран вӗҫертмест.

"Контактри" сӑн

Улатӑр округӗнчи пульницӑра ҫамрӑк педиатр ӗҫлеме тытӑннӑ. Вӑл унта «Земство тухтӑрӗ» патшалӑх программипе усӑ курса кайнӑ.

Михаил Зайцев ача чухнех педиатр пулма ӗмӗтленнӗ. 5-мӗш класра пулас професси пирки сочинени ҫырма ыйтсан та вӑл кун пирки каланӑ. Ҫавӑнтанпа унӑн шухӑшӗ улшӑнман.

Сӑмах май, пӗлтӗр ку программӑпа 62 тухтӑр тата вӑтам звенори 37 медӗҫчен усӑ курнӑ.

Етӗрне тӑрӑхӗнчи арҫынна васкавлӑ медпулӑшу тухтӑрӗсем иккӗмӗш пурнӑҫ парнеленӗ теме пулать. Ака уйӑхӗн 10-мӗшӗнче вӑл ӗҫе кайма тухнӑ. Ӑнсӑртран кӑкӑрӗ тӗлӗнчен ыратма тытӑннӑ, сывлама йывӑр пулнӑ. Вӑл тӳрех машинине чарнӑ та васкавлӑ медпулӑшу чӗннӗ.

Анатолий Мурзин фельдшер, Марина Гаврилова медсестра, Алексей Ломоносов водитель вырӑна часах ҫитнӗ. Тухтӑрсем пациентӑн инфаркт пулнине ӑнланнӑ, часрах тромболезис тунӑ. Ҫак препарат юн тымарӗнчи тромба ирӗлтерет. Кун хыҫҫӑн арҫынна пульницӑна илсе ҫитернӗ.

«Инфаркт чухне пӗрремӗш сехет – чи пӗлтерӗшли. Тромболезис вӑхӑтра тусан чӗрене ҫӑлма пулать. Ҫавӑнпа кӑкӑр тӗлӗнчен ыратнине туйсанах васкавлӑ медпулӑшӑва шӑнкӑравлӑр», - теҫҫӗ тухтӑрсем.