Чӑваш Енре пурӑнакан арҫын телее хӳринчен тытасса шанса виҫӗ ҫул патшалӑх лотерейисене хутшӑннӑ. Тинех ӑна ӑннӑ! Пӗртен-пӗр туяннӑ билет ӑна 600 пин тенкӗ выляса илме пулӑшнӑ.
Андрей укҫа выляса илни пирки кӗтмен ҫӗртен пӗлнӗ: ун патне СМС-ҫыру килнӗ. «Ку пысӑк ҫӗнтерӳ пулнине тӳрех ӑнлантӑм», — тенӗ арҫын.
Андрей – строительствӑпа монтаж ӗҫӗсен мастерӗ. Килте те ӗҫлеме ӗлкӗрет: мӑшӑрӗпе пӗрле сыр пӗҫереҫҫӗ, ҫу, тӑпӑрчӑ тӑваҫҫӗ. Лотерейӑра выляса илнӗ укҫапа вӑл кӗҫӗн хӗрӗн хваттерӗнче юсав ӗҫӗсем тӑвасшӑн.
Юпа уйӑхӗнче Шупашкарта пурӑнакан, 15 ҫулти Дария Перевезенева лотерейӑра 857 пин тенкӗ выляса илнӗ. Вӗсем ҫак билета ҫемйипе пӗрле туяннӑ. Лотерея выляттарнӑ кун ҫемье пуҫӗ телевизор умӗнче ларнӑ, тухнӑ хисепсене чӗрсе пынӑ. Ыттисем хӑйсен ӗҫӗсемпе кайнӑ.
Ҫемье пуҫӗн мӑшӑрӗ чи малтанах ӗненмен. Тӗнче тетелне кӗрсе хисепсене тӗрӗсленӗ хыҫҫӑн ҫеҫ ӗненме тивнӗ. Унччен ҫемье 50-200 тенкӗ ҫеҫ выляса илме пултарнӑ.
Дария киле таврӑнсан ашшӗпе амӑшӗ хӗрне тӗлӗнтермеллипех тӗлӗнтернӗ. Ара, билета вӑл туяннӑ та. Укҫана ашшӗпе амӑшӗ Мускава кайса илнӗ. Перевезенцевсем выляса илнӗ тупӑшпа хваттере лайӑхлатнӑ.
+11.3 °C