Чӑваш Енре юлашки вӑхӑтра ҫулсерен ирттерекен кӗмӗл волонтёрсен республикӑри конкурсне пӗтӗмлетнӗ.
Конкурса заявкӑсене республикӑн Ӗҫ тата социаллӑ хӳтлӗх министерстви ҫурла уйӑхӗн 18-мӗшӗнчен пуҫласа пӗр уйӑх хушши йышӑннӑ.
«Ҫӗнтерӳ волонтёрӗ» номинацире Шупашкарти Людмила Порфирьева ҫӗнтернӗ. Ватӑ хӗрарӑм салтаксене нумай пулашать иккен.
«Наставник — волонтер» номинацире Патӑрьел районӗнчи Мидхать Шакиров ҫӗнтернӗ. Вӑл ачасене ӳнер урлӑ Тӑван ҫӗршыва юратма вӗрентет иккен.
Ҫӗмӗрле тӑрӑхӗнчи Людмила Осипова — «эко-волонтер». Вӑл «ЭкоЛогики «от А до Я» ятлӑ шкул шухӑшласа кӑларнӑ.
«Социаллӑ экспресс» номинацире ҫӗнтернӗ Улатӑрти Ирина Сидякина хастар пулса ӗмӗре вӑрӑмлатма вӗрентет.
Ҫӗнтерӳҫӗсене кӗмӗл волонтёрсен «Кӗмӗл чун» республикӑри тӑваттӑмӗш форумӗнче чыслӗҫ. Мероприяти хальхинче Ҫӗмӗрле хулинче иртӗ.
Ҫӗмӗрле хулинче модельлӗ вулавӑш уҫӑлнӑ. Унӑн дизайнне вырӑнти ӳнерҫӗ Сергей Разгудаев хатӗрленӗ.
Унта хӑтлӑ та хӑйне евӗр стильлӗ. Вуламалли зона, интернета тухмалли май туса панӑ ӗҫ вырӑнӗсем, ача-пӑча кӗтесӗ тата мероприятисем ирттермелли вырӑн пур.
Фасада росписьпе илемлетни, интерьерлӑ панносем, стенасем ҫинчи живопиҫ – ҫаксене йӑлтах Сергей Разгудаев хатӗрленӗ.
Территорисене аталанма пулӑшакан фонд Чӑваш Енӗн заявкине ырланӑ май республикӑри ишӗлекен 20 ҫуртри ҫынсене ҫӗнӗ ҫӗре куҫарма йышӑннӑ.
Ӗнер иртнӗ ларура фонд тата тепӗр 6 регионӑн заявкине ырланӑ, ҫав шутра Чӑваш Енӗнне те.
Кӑҫалхи программӑна Шупашкарти пӗр ҫурт та лекеймен. Халӗ вара Ҫӗнӗ Шупашкарти, Канашри, Ҫӗмӗрлери, Вӑрнар тата Ҫӗрпӳ районӗсенчи 20 ҫурт лекнӗ, вӗсенче 256 ҫын пурӑнать-мӗн.
Вӗсен адресӗ ҫапларах:
Ҫӗнӗ Шупашкар – Силикат урамӗнчи 12-мӗш тата 14-мӗш ҫуртсем;
Вӑрнар – Ашмаров урамӗнчи 6-мӗш тата Путевой урамри 23-мӗш ҫуртсем;
Ҫӗрпӳ – Гагарин урамӗнчи 35-мӗш, Гоголь урамӗнчи 13-мӗш, Ҫаран урамӗнчи 5-мӗш ҫуртсем;
Ҫӗрпӳ районӗнчи Хирти Тукай ялӗнчи Ҫамрӑксен урамӗнчи 13-мӗш ҫурт;
Канаш – Кабалин урамӗнчи 5-мӗш ҫурт;
Ҫӗмӗрле – Киров урамӗнчи 75-мӗш, Красноармейски урамӗнчи 1-мӗш тата 17-мӗш ҫуртсем, Мопр урамӗнчи 23-мӗш, Свердлов урамӗнчи 92-мӗш, 92а, 105-мӗш, Стройучасток урамри 9-мӗш, Тургенев урамӗнчи 17-мӗш, Угольник урамӗнчи 5-мӗш, Францев урамӗнчи 1а ҫуртсем.
Ҫӗмӗрле хулинче ҫуралса ӳснӗ хӗр ТНТ каналпа пыракан «Погоня» ятлӑ кӑларӑма хутшӑнать.
Сӑмах — Катерина Решнова пирки. Вӑл — актриса тата телеертӳҫӗ. Чылайӑшӗ ӑна «The Телки», «Девушки с Макаровым» тата ытти сериалта курма пултарнӑ. Хальхи вӑхӑтра вӑл «Утро. ТНТ» кӑларӑм ертсе пырать.
«Погоня» кӑларӑмра пирӗн ентеш ыттисемпе пӗрле экстремаллӑ условисенче укҫа ҫӗнсе илессишӗн кӗрешет. Катерина ҫак шоу ӑна самантлӑха ачалӑха таврӑнма, вӑйӑсене аса илме май пуррипе илӗртнине палӑртнӑ.
Чӑваш Ене ҫӗнӗ 39 автобус ҫитнӗ. Вӗсем авӑнӑн 1-мӗшӗнчен ачасене илсе ҫӳреме пуҫлӗҫ.
Ытларах автобуссене Канаш, Вӑрнар, Хӗрлӗ Чутай, Шупашкар округӗсене ярӗҫ. Комсомольски, Ҫӗрпӳ, Елчӗк округӗсене икшер автобус лекӗ. Элӗк, Патӑрьел, Йӗпреҫ, Куславкка, Красноармейски тата ытти округа (пӗтӗмпе 10 округа) пӗрер автобус парӗҫ.
Ҫавӑн пекех Ҫӗрпӳ агротехникумне, Ҫӗмӗрлери политеха, Шупашкарти тата Ҫӗнӗ Шупашкарти колледжсене те автобус лекӗ.
Ҫӗмӗрле хулинче урине хуҫнӑ арҫын тӑрайманнипе урайӗнче пӗр эрне выҫӑ выртнӑ. Юрать, суд приставӗ ун патне килнӗ.
Арҫын штрафсене тӳлеменнипе 300 пин ытла тенкӗ парӑма кӗнӗ, ҫавна май арҫын патне пристапв килне пынӑ. Алӑк уҫӑ пулнӑ, шалтан вара шӑппӑн йӑнӑшни илтӗннӗ.
Пристав шалалла иртсен арҫын урайӗнче выртнине курнӑ. Вӑл пӗр эрне каялла урине хуҫнине, тӑраймасӑр выртса пӗр эрне нимӗн те ҫименнине каланӑ. Пристав тӳрех васкавлӑ медпулӑшу чӗннӗ. Тухтӑрсем киличчен арҫынна ҫитерме апат-ҫимӗҫ туяннӑ.
Арҫынна больницӑра операци тунӑ, халӗ вӑл хӑйне чиперех туять, малалла сипленет.
Ҫӗмӗрлери Пӗрремӗш Петӗр юманӗ «Раҫҫейри ҫулталӑк йывӑҫӗ» сасӑлавра иккӗмӗш вырӑн йышӑннӑ. Вӑл 25,5 пин ытла сасӑ пухнӑ. Пӗрремӗш вырӑнта – Ростов облаҫӗнчи «Бабушка Ива», уншӑн 37,5 пин ытла ҫын сасӑланӑ. Виҫҫӗмӗш вырӑнта – Крымри Суворов юманӗ.
Сӑмах май, 2023 ҫулта сасӑлавра Муркаш округӗнчи Ильинкӑри 372 ҫулти юман ҫӗнтернӗ. Пӗлтӗр вара Ҫӗмӗрлери юман тӑваттӑмӗш вырӑна тухнӑ.
Ҫӗмӗрле паркӗнчи юман «Раҫҫейри ҫулталӑк йывӑҫӗ» Пӗтӗм Раҫҫейри конкурса хутшӑнни пирки пӗлтернӗччӗ.
Халӗ сасӑлавӑн юлашки эрни пырать: Чӑваш Енри юмана ҫӗнтермешкӗн пулӑшӑр. Хальхи вӑхӑтра вӑл иккӗмӗш вырӑнта пырать, Ростов облаҫӗнчи хӑва унран иртсе кайнӑ.
Пирӗн юман сасӑлавра 33-мӗш номерпе вырнаҫнӑ: rosdrevo.ru сайта кӗрсе электронлӑ почта урлӑ авторизациленмелле те юманшӑн сасӑламалла.
Ҫӗмӗрлере пурӑнакан Ирина Беккершӑн косметологи чун килӗнӗҫӗ кӑна пулнӑ, халӗ вара — юратнӑ ӗҫҫ. Соцконтракт пулӑшнипе вӑл косметологи пӳлӗмӗ уҫма пултарнӑ.
Ҫамрӑк хӗрарӑм патшалӑх пулӑшӑвне «Ҫемье» наци проекчӗпе килӗшӳллӗн ҫулталӑк пуҫламӑшӗнче тивӗҫнӗ. Хӑй каланӑ тӑрӑх, вӑл малалла аталанмаллине ӑнланнӑ та патшалӑхран пулӑшу илсе хӑйӗн ӗҫне аталантарма шутланӑ. Халӗ косметологи пӳлӗмӗнче ҫынсене йышӑнать, вӗсене илемлӗрех курӑнма пулӑшать.
Ҫӗмӗрле хулинче Владимир Ильич Ленинӑн палӑкне… ҫӳп-ҫап купи ҫинче тупнӑ. Кунашкал сӑнӳкерчӗк вырӑнти пабликсенче курӑннӑ. «Ҫӗмӗрлери декоммунизаци: унта хула лапамӗнчи Ленин палӑкне свалкӑна янӑ», - тесе ҫырнӑ унта.
Кивӗ монумента тӗп лапамран илсе пӑрахнӑ. Ун вырӑнне ҫӗннине лартнӑ, анчах вӑл калӑпӑшӗпе унчченхинчен пӗчӗкрех.
-9.7 °C