Авӑн уйӑхӗн 7-мӗшӗнче Шупашкарта пурӑнакан Валентина Андреева хӑйӗн черетлӗ ҫуралнӑ кунне уявланӑ. Юлашки вӑхӑтра ӑна хулари халӑхӑн социаллӑ ыйтӑвӗсене тивӗҫтерекен комплекслӑ центрӑн социаллӑ ӗҫченӗ Наталия Николаева пулӑшса пынӑ май хваттере тирпейлесе тӑрать.
Валентина Андреева паллӑ чӑваш ҫыравҫин, Аркадий Ӗҫхӗлӗн, хӗрӗ. Вӑл космос отраслӗнче 22 ҫул программистра ӗҫленӗ. Унӑн упӑшки, шкулта пӗрле вӗреннӗ каччӑ, лётчика вӗренсе тухнӑ. Ҫамрӑк арӑм унран юлас темен — пӗрле тухса кайнӑ. 22 ҫултан вӗсем тӑван тӑрӑха, Шупашкара, таврӑннӑ.
Мӑшӑр пӗр хӗр ҫуратса ӳстернӗ, анчах вӑл сарӑмсӑр вилнӗ. Кинемее паян юратнӑ мӑнукӗ Максим чунтан юратса пӑхать.
Раҫҫей Федерацийӗн Федерацин хӑрушсӑрлӑх службие йӗркеленӗренпе ута уйӑхӗн 20-мӗшӗнче 105 ҫул ҫитнӗ. Ҫав ятпа Чӑваш Ен Элтеперӗ Олег Николаев асӑннӑ служба ӗҫченӗсене саламланине республикӑн влаҫ органӗсен официалла порталӗнче вырнаҫтарнӑ.
«Ҫак юбилей уйрӑм пӗлтерӗшлӗ, вӗт шӑпах 105 ҫул каялла Чӑваш автономи облаҫне йӗркеленӗ. Сирӗн умӗнхи ӗҫтешӗрсем республика йӗркеленсе тата ҫирӗпленсе пынӑ ҫулсенче хӑрушсӑрлӑхпа йӗркелӗхе тивӗҫтерсе тӑнӑ.
Сирӗн служба юбилейне Аслӑ Ҫӗнтерӳ 80 ҫул тултарнӑ тапхӑрта паллӑ тӑватпӑр. Ӑна ҫывхартас ӗҫе патшалӑх хӑрушсӑрлӑхӗн органӗсен ветеранӗсем пысӑкран та пысӑк тӳпе хывнӑ. Вӗсен паттӑрлӑхӗ пирӗншӗн Тӑван ҫӗршыва чунтан парӑннине палӑртакан паха тӗслӗх шутланать.
Эсир ҫав мухтавлӑ йӑла-йӗркене тивӗҫлӗн малалла тӑсатӑр, хальхи вӑхӑт ҫуратакан йывӑрлӑхсене чыслӑн ҫӗнтерсе пыратӑр, тӑшманла ҫӗршывсем кӑларса тӑратакан хӑрушлӑхсене шанчӑклӑн сирсе яратӑр, патшалӑх ертӳлӗхӗ лартнӑ тӗллевсене кал-кал тата тухӑҫлӑн пурнӑҫлатӑр. Сирӗн служба паян та, пӗр ӗмӗр каяллахи пекех, регионӑн ҫирӗп аталанӑвӗн тата унта пурӑнакан ҫынсен ырлӑхӗн никӗсӗ пулса тӑрать.
Шупашкарта пурӑнакан Фроловсем ҫемье ҫавӑрнӑранпа 50 ҫул ҫитнине уявланӑ. Мероприяти хулари Калинин районӗнчи ЗАГС пайӗнче иртнӗ.
Екатерины Сильвестровна тата Николай Николаевич тахҫанах тивӗҫлӗ канура пулин те лара-тӑра пӗлмеҫҫӗ. Кил хуҫи «Нарспи» тата «Калинушка» ансамбльсенче юрлать, Екатерина Сильвестровна ал ӗҫӗпе аппаланать. Вал хулари халӑхӑн социаллӑ ыйтӑвӗсене тивӗҫтерекен комплекслӑ центра ҫӳрет, унта ал ӗҫӗпе аппаланать, физкультура занятийӗсене хутшӑнать.
Телейлӗ мӑшӑра саламлама хӑйсем унччен ӗҫленӗ Трактор заводӗнчен, хулари Клуб тытӑмӗнчен, Комплекслӑ центртан пырса ҫитнӗ. Унсӑр пуҫне тӑванӗсемпе тусӗсем пуҫтарӑннӑ.
Ҫак эрнере, утӑ уйӑхӗн 8-мӗшӗнче, Чӑваш Енен наци вулавӑшӗнче И. Н. Ульянов ячӗллӗ чӑваш патшалӑх университетӗнче пулас журналистсене хатӗрлес ӗҫре нумай ҫул тӑрӑшнӑ Анатолий Абрамовӑн 65 ҫулхине халалланӑ пултарулӑх каҫӗ иртнӗ.
Вулавӑш ӗҫченӗ Антонина Андреева халах тетелӗнчи хайӗн страницинче хыпарланӑ тӑрӑх, юбиляра саламлама ачисем, ҫывӑх тӑванӗсем, паллӑ артистсем, журналистсем, ҫыравҫӑсем, преподовательсем, хӑй вӗрентсе кӑларнӑ студентсем пуҫтарӑннӑ.
«Анатолий Серафимович - юратнӑ та хисеплӗ вӗрентекен ҫеҫ мар, чаплӑ фотограф, артист, ӑста строитель, сӑвӑҫ, юрӑҫӑ. Пӗр ҫын ҫакӑн чухлӗ талантлӑ пулни пурне те тӗлӗнтерчӗ. Кашни тухса калаҫакан юбиляр ҫинчен чи ӑшӑ самантсене аса илсе, иртнишӗн те хальхишӗн те тав туса чӗререн тухакан сӑмахсемпе саламларӗҫ», - пӗлтернӗ хыпарта.
Анатолий Абрамова саламлама Мускав хулинчен «Шевле» ушкӑн юрӑҫисем Валентина Попова, Григорий Вакку тата Гелий Илларионов ятарласа килнӗ.
Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн ӗҫченӗсем Тӑван ҫӗршывӑн аслӑ вӑрҫин ветеранӗсене ҫывхарса килекен Ҫӗнтерӳ кунӗпе кашни кунах саламлаҫҫӗ. Паян вӗсем Анатолий Цыганов патӗнче пулнӑ.
Анатолий Иванович 1926 ҫулхи авӑн уйӑхӗн 6-мӗшӗнче Горький облаҫӗнчи Буденово ялӗнче ҫуралнӑ. Вӑрҫӑ пуҫланнӑ чухне вӑл 13 ҫулта ҫеҫ пулнӑ. Ҫамрӑк пулин те аслисемпе танах ӗҫленӗ: ӗнесем пӑхнӑ, витере тислӗк хырнӑ, выльӑха апат панӑ. 5 класс пӗтернӗ хыҫҫӑн ҫӗвӗҫе вӗренме кайнӑ, ҫакӑ ӑна выҫлӑхран ҫӑлса хӑварнӑ.
1960 ҫулта Анатолий Иванович Шупашкара куҫса килнӗ, унта 5-мӗш ательере закройщик пулса ӗҫлеме вырнаҫнӑ. Вӑл ҫак енӗпе 30 ҫул ытла тӑрӑшнӑ.
Ҫак кунсенче пирӗн ҫӗршыв Аслӑ Ҫӗнтерӗве тунӑранпа 80 ҫул ҫитнине кӗтсе илме хатӗрленет. Шупашкарта та тӗрле шайри тӳре-шара ветерансем патне ҫитсе вӗсене уявпа саламлать, парнепе хавхалантарать.
Хӗрлӗ Чутай районӗнчи Хыркасси ялӗнче 1926 ҫулхи пуш уйӑхӗнче ҫуралнӑ, халӗ Шупашкрата пурӑнакан Иван Петрова та саламланӑ. Ун патне хулари халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем пырса ҫитнӗ.
Сӑмах май каласан, унччен Иван Афанасьевич, ытти ветеран евӗрех, Ҫӗнтерӗве халалласа республикӑра пӗр хутчен паракан 20 пин тенкӗ укҫана тивӗҫнӗ тата федераци шайӗнчи 80 пин тенке.
Чӑваш Енри чи ҫамрӑк театр – Сӑнавлӑ театр. Ака уйӑхӗн 30-мӗшӗнче вӑл хӑйӗн 30 ҫулхине уявланӑ. Коллектива ҫав ятпа саламлама асӑннӑ коллективра ӗҫленисем, ытти культура учрежденийӗнче тӑрӑшакансем пырса ҫитнӗ.
Тӳрӗ-шараран театра саламлама республикӑн Культура министрӗн ҫумӗ Татьяна Казакова пырса ҫитнӗ.
Театрӑн директорӗ – Дмитрий Капустин.
Элӗк, Красноармейски тата Пӑрачкав округӗсенче пӗлтӗр пушар чаҫӗсен виҫӗ ҫӗнӗ постне йӗркеленӗ. Кӑҫал Ҫӗрпӳ округӗнчи Чурачӑк салинче пушар чаҫӗн тата тепӗр уйрӑм посчӗ ӗҫлеме пуҫланӑ. Кун пирки Чӑваш Ен Элтеперӗ Олег Николаев пушар хуралӗн ӗҫченӗсене професси уявӗпе саламлана май палӑртса хӑварнӑ.
«Эпир ҫакӑнпа кӑна чарӑнса тӑма шутламастпӑр, ҫитес виҫӗ ҫулта пушарпа кӗрешекен службӑн тата 8 подразделенине, 42 ирӗклӗ пушар командине йӗркелеме, ҫавӑн пекех республикӑри муниципалитетсенче 7 ҫӗнӗ пушар деповӗ тума палӑртатпӑр», — хыпарланӑ Элтепер.
Муркашра нумаях пулмасть Юрий Жуковӑн концерчӗ иртнӗ. Пултаруллӑ ҫыннӑн 75 ҫулхине халалланӑ мероприятие зал тулли халӑх пуҫтарӑннӑ. Вырӑнтисем хыпарланӑ тӑрӑх, зал концерт пуҫланиччен ҫур сехет маларахах лӑк тулли пулнӑ.
Юрий Нестерович 1950 ҫулхи ака уйӑхӗн 17-мӗшӗнче ҫуралнӑ. Вӑл — композитор, баянист, педагог, Чӑваш Республикин культурӑн тава тивӗҫлӗ ӗҫченӗ, Муркаш районӗн хисеплӗ ҫынни.
Юбиляра район администрацийӗн культура тата архив ӗҫӗн пайӗн пуҫлӑхӗ Любовь Рыжкова саламланӑ.
Сумлӑ композитора саламлама пырса ҫитнисем хушшинче Чӑваш патшалӑх юрӑпа таша ансамбльне нумай ҫул ертсе пынӑ Раҫҫӗй халӑх артисчӗ Юрий Васильев та пулнӑ.
Шупашкарта пурӑнакан 100 ҫулхи Зинаида Канова патӗнчен ҫак кунсенче халӑх татӑлма пӗлмест. Ун патне журналистсем те пӗрмай пыраҫҫӗ, ӑна шкул ачисем те саламлаҫҫӗ. Паян вара кинемей патӗнче Чӑваш Ен Элтеперӗ Олег Николаев тата Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн директорӗ Светлана Милкина пулнӑ.
Зинаида Андреевна Мордва Республикинчи Смольково ялӗнче ҫуралнӑ, Улатӑрта ӳснӗ, унта нумай ҫул пурӑннӑ. Халӗ вӑл Шупашкарта пурӑнать. Тӑван ҫӗршывӑн аслӑ вӑрҫи вӑхӑтӗнче Зинаида Канова радиотелеграфист пулна, Берлина ҫитнӗ.
Зинаида Андреевна – питӗ кӑмӑллӑ ҫын. Унпа темччен калаҫма пулать. Ун патне хӑнана пыракансем кинемее пурте Ҫӗнтерӳ кунӗпе саламлаҫҫӗ.
-20.7 °C