Шупашкарта пӗр кунта икӗ ачана ҫапса кайнӑ. Инкек нарӑс уйӑхӗн 9-мӗшӗнче пулса иртнӗ.
Президент бульварӗнчи инкекре 16 ҫулти хӗрача шар курнӑ. Вӑл чӗркуҫҫине ыраттарнӑ тата пуҫ мимине чӗтретнӗ. «Kia Rio» водителӗ урах пулнӑ.
Хусанкай урамӗнчи инкекре «Лада гранта» 9 ҫулти арҫын ача ҫине пырса кӗнӗ. Ача сулахай урине ыраттарнӑ. Ҫӑмӑл машина водителӗ урах пулнӑ.
Шупашкарта пурӑнакан пӗр арҫын ҫӗнӗ машинӑна ҫунӑ хыҫҫӑн водитель прависӗр юлнӑ.
Ӳсӗрле руль умне ларсан «Эп аякка кайма тухман», — тени те пулӑшаймӗ. Машинӑна эвакуацилеҫҫӗ, водитель правине туртса илеҫҫӗ. Кун пек чухне санӑн машину мӗн хак тӑни те, уншӑн уйӑхсерен миҫе пин тенкӗ кредит тӳлемелли те йӗрке хуралҫисене пачах та кӑсӑклантармасть.
Ӗнер, нарӑсӑн 9-мӗшӗнче, ирхине Канаш хулинчи Ҫамрӑксен урамӗнче пушар пулнӑ – харпӑр ҫуртра ҫулӑм тухнӑ.
Инкек вӑхӑтӗнче пӳртре 73 ҫулти арҫын тата унпа пӗрле пурӑнакан 56-ри хӗрарӑм пулнӑ. Хӗрарӑм ҫунакан пӳртрен хӑй тӗллӗнех тухса ӗлкӗрнӗ. Пиҫсе кайнӑскере пульницӑна илсе кайнӑ. Шел те, арҫын урама тухайман – пушарта вилнӗ.
Ҫӑлавҫӑсем пушара 3 сехете яхӑн сӳнтернӗ.
Шӑмӑршӑри тӳре-шарана суд тата прокуратура хистенипе шыв пӑрӑхне юсаттарӗҫ. Надзор органӗ тӗрӗслев ирттерсе палӑртнӑ тӑрӑх, шыв парӑхӗ пӗтӗмпех япӑхса ҫитнӗ, ӑна йӑлтах ҫӗнӗрен юсамалла.
Шӑмӑршӑ районӗнчи тӳре-шара ку ыйтупа чылай ҫул нимӗн те туман иккен. Япӑхса кайнӑ пӑрӑх тӑрӑх уҫлакан шыв пахалӑхӗ те начар.
Чӑваш Енре пӗр кинемей дачӑна кайма тухса кӗрт ӑшне путса ларнӑ.
Пӑтӑрмах нарӑс уйӑхӗн 8-мӗшӗнче пулса иртнӗ. 75 ҫулти кинемей Ҫӗнӗ Шупашкарти «Туслӑх» сад юлташлӑхне кайма тухнӑ. Вӑл дача ҫуртне кайса пӑхас тенӗ. Ҫула ҫил-тӑман хӳсе лартнине пӑхмасӑрах ватӑ 2 ҫухрӑм ытла утма пултарнӑ-ха, анчах кайран вӑйран кайнӑ.
Кинемее пулӑшма (хӑех телефонпа шӑнкӑравласа пулӑшу чӗннӗ-ши, хыпарта ун пирки каламан) 11-мӗш пушарпа ҫӑлав пайӗн ӗҫченӗсем пырса ҫитнӗ. Вӗсем ватӑ ҫынна наҫилкка ҫине хурса васкавлӑ пулӑшу машини патне йӑтса тухнӑ.
Шупашкарта ҫӑмӑл машина тротуар ҫинчи рабочи ҫине пырса кӗнӗ. М950УТ 21 номерӗллӗ «Туарег» хуҫи автомобиле инкек вырӑнӗнче лартса хӑварса вырӑнтан тарса ҫухалнӑ. Инкек нарӑс уйӑхӗн 7-мӗшӗнче Шупашкарти Воробьев композиторсен урамӗнче пулса иртнӗ.
Рабочи картлашка ҫинчи юра тасатнӑ, ҫӑмӑл машина ун ҫине пырса кӗнӗ. Темиҫе сехетрен водителе тытса чарнӑ. 48 ҫулти арҫын тухтӑр патӗнче тӗрӗсленме килӗшмен. Аманнӑ 47 ҫулти арҫынна вара тухтӑрсем тӗрӗсленӗ хыҫҫӑн амбулатори мелӗпе (килте) сипленме сӗннӗ.
Етӗрне округӗнчи Канаш ялӗ патӗнче паян хӑрушӑ авари пулнӑ. Унта, шел те, 2 ҫыннӑн пурнӑҫӗ татӑлнӑ.
Малтанлӑха палӑртнӑ тӑрӑх, «Лада Приора» ҫӑмӑл машина хирӗҫ ҫул ҫине тухса кайнӑ та фурӑпа ҫапӑннӑ. «Лада Приора» водителӗ тата пассажирӗ ҫавӑнтах вилнӗ.
Халӗ ӗҫ-пуҫӑ уҫӑмлатаҫҫӗ.
Шупашкарта пурӑнакан икӗ хӗрарӑм чечек парнелессе шанса улталаннӑ.
45 ҫулти хӗрарӑм патне чечек лавккинчен текен ҫын шӑнкӑравланӑ. Хайхи этем ӑна пӗри чечек пырса пама ыйтни пирки ӗнентернӗ те хӑҫан илсе пырсан меллӗрех пирки шахвӑртма пуҫланӑ, смс-ҫырупа килнӗ кода курьера пӗлтермелле тесе каланӑ.
Хӗрарӑм каланине итленӗ. Унтан патшалӑх пулӑшӑвӗн порталне ун ячӗпе такам кӗни ҫинчен хыпарланӑ, ултавҫӑсенчен «сыхланмалли» номере ярса панӑ. Хӗрарӑм ҫапла вара хӑй унччен пухса пынӑ 100 пин тенке хӑрушсӑр счет ҫине куҫаратӑп тесе укҫасӑр тӑрса юлнӑ.
18 ҫулти хӗр вара ҫавӑн йышши юмах-халапа ӗненсе 200 пин тенкӗ ытла куҫарса панӑ.
Улатӑр хулинче пӗр водитель машинӑпа ача ури ҫине пырса кӗнӗ. 69 ҫулти водитель йӗрке хуралҫисене ӗнентернӗ тӑрӑх, вӑл машина умӗнче шуҫса ӳкнӗ ачана асӑрхаман имӗш.
Инкек ӗнер, нарӑс уйӑхӗн 5-мӗшӗнче, Улатӑрта пулса иртнӗ. 15 ҫулти яш «Chevrolet» машина урапи айне пулнӑ. Ҫул хӗрринче тӑнӑ чухне ача шуҫса ӳкнӗ, машина вара ун ури урлӑ каҫса кайнӑ та чарӑнса та тӑман.
Вӑрнар округӗнчи Шӗнер Ишек ялӗнче пулнӑ пушарта 54 ҫулти арҫыннӑн пурнӑҫӗ татӑлнӑ.
Инкек нарӑс уйӑхӗн 3-мӗшӗнче каҫхине пулнӑ. Ҫамрӑксен урамӗнчи кил-хуҫалӑхӗнче ҫуллахи ҫуртра ҫулӑм алхасма пуҫланӑ. Ҫав вӑхӑтра кил хуҫи, 54-ри арҫын, унта пулнӑ. Шел те, вӑл урама тухайман, ҫавӑнтах вилнӗ.
Малтанлӑха палӑртнӑ тӑрӑх, вӑл пирус асӑрханмасӑр туртнӑ, ҫавӑнпа пушар тухнӑ.
+10.3 °C