Ҫӗнӗ Шупашкарта пурӑнакан Козлов Евгений Владимирович пулла кайсан ҫухалнӑ. Вӑл унта кӑрлач уйӑхӗн 7-мӗшӗнче ирхи 4 сехетре тухса кайнӑ.
1983 ҫулта ҫуралнӑ арҫынна "Лиза Алерт" ушкӑн хастарӗсем шыраҫҫӗ. Вӑл ӑҫталла пулӑ тытма кайни паллӑ мар. Килтен кайнӑ чухне сӑрӑ костюм, сӑрӑ тӗслӗ атӑ, хура ҫӗлӗк тӑхӑннӑ пулнӑ.
Шырав ӗҫӗнче хастарсем кирлӗ.
Информацие пӗлтермелли телефон номерӗ: 8 (800) 700-54-52 е 112.
Атӑл пӑрӗ ҫинче пулӑҫсен сезонӗ пуҫланнӑ. Паян чутах 33 арҫын пӑр катӑкӗ ҫинче ларса кайман.
Пулӑҫсем Ҫӗнӗ Шупашкар ҫывӑхӗнче, ГЭС патӗнче, пулӑ тытса ларнӑ. Тӑрук пӑр катӑлнӑ та шыва май юхма пуҫланӑ. Ҫав пӑр катӑкӗн серепине 30 пулӑҫ лекнӗ.
Ҫалавҫӑсем патне 10 сехетре хыпар ҫитнӗ. Пулӑҫсене ҫӑлма Ҫӗнӗ Шупашкарти, Сӗнтӗрвӑрринчи тата Шупашкарти ҫӑлавҫӑсем ҫитнӗ.
11 сехетре 33 пулӑҫа ҫыран хӗррине кӑларнӑ.
Юпа уйӑхӗн 16-мӗшӗнче Чӑваш Енре пулӑ тытма юратакансем ӑмартӗҫ. Вӗсем катушкӑллӑ вӑлтапа пулӑ тытассинче тупӑшӗҫ.
Кӑҫал унта чи вӑйлӑ спортсменсем хутшӑнассине пӗлтереҫҫӗ. Вӗсем Атӑл юханшывӗнче пулӑ тытӗҫ. Пӗр кунра икӗ тур иртӗ, кашни 4 сехете тӑсӑлӗ. Апла пӗтӗмпе – 8 сехет.
Ӑмӑртӑва 18 ҫултан аслӑраххисен хутшӑнма ирӗк пур. Регистраци ирхи 5 сехетре пуҫланӗ. Ҫур сехетрен ӑмӑрту савӑнӑҫлӑ лару-тӑрура уҫӑлӗ. Пӗрремӗш тур 6-ра пуҫланать, 10-ра ӑна пӗтӗмлетӗҫ. Иккӗмӗш тур 11-те пуҫланать. 15 сехетре ҫӗнтерӳҫӗсене чыслӗҫ.
Шупашкарти 59-мӗш шкулта вӗренекен 12 ҫулти Игнат Михайлов пулла ҫӳреме юратать. Вӑл 5-ренпех вӑлта тытма пӗлет.
Ҫурлан 9-мӗшӗнче вӑл Етӗрне районӗнче пурӑнакан аслашшӗпе /е кукашшӗпе/ Сӑр юханшывне пулла кайнӑ. Вӗсен вӑлтине пысӑк ҫуйӑн ҫакланнӑ. Арҫын ача аслашшӗпе пӗрле ӑна туртса кӑларнах. Унпа вӗсем 1 сехет кӗрешнӗ.
Пулӑ 52 килограмм таять, 1,93 метр тӑршшӗ. Вӑл 12 ҫулти Игнатран та пысӑкрах. Ача унпа юнашар выртса сӑн ӳкерӗннӗ.
Ҫӗртме уйӑхӗн 23-мӗшӗнче Куславкка хулинче пулӑ тытас енӗпе пӗрремӗш хут фестиваль иртӗ. Ӑна Республика кунӗпе килӗшӳллӗн йӗркелеҫҫӗ.
Фестивале хутшӑнакансем вӑлтапа пулӑ тытӗҫ. Ӑманпа-и, ҫӑкӑрпа-и - чару ҫук, хӑть те мӗнле ҫимӗҫпе илӗртме юрать. Чи пысӑк пулӑ тытаканни фестиваль ҫӗнтерӳҫи пулӗ.
Мероприяти Атӑл хӗрринче иртӗ. Пулӑҫсене ирхи 7 сехетре "Октябрь" кинотеатр патӗнче регистрацилеме пуҫлӗҫ. Фестиваль 9 сехетре пуҫланать.
Ака уйӑхӗн 11-мӗшӗнче Улатӑр районӗнчи Иваньково-Ленино ялӗ ҫывӑхӗнче Сӑр юханшывӗнче, 21 ҫулти арҫын путнӑ. Унӑн виллине халь тин тупнӑ.
Ҫамрӑкскер унта пулла кайнӑ пулнӑ. Пулӑ тытнӑ вӑхӑтра хайхискер пӑр айне анса кайса вилнӗ. Ӑна ҫӑлавҫӑсем шыранӑ. Паян тин унӑн виллине тупнӑ. Арҫын ҫӳлерех асӑннӑ ялта пурӑннӑ.
Аса илтерер: ака уйӑхӗн 8-мӗшӗнче Шупашкар районӗнчи пӗвере 68 ҫулти арҫын путса вилнӗ.
Ака уйӑхӗн 10-мӗшӗнче каччӑ Атӑл ҫине, Шупашкарти Волжский-3 микрорайон ҫывӑхне, пулӑ тытма кайнӑ. Ларсан-ларсан хайхискер пӑр ҫурӑлнӑ сасӑ илтнӗ. Каччӑ ҫыран хӗррине утса тухма шикленнӗ, ҫавӑнпа ҫӑлавпа шырав службине шӑнкӑравланӑ.
Ҫалавҫӑсем ун патне аэрокимӗпе ҫула тухнӑ. Ун патне кайнӑ чухне вӗсем те пӑр ҫурӑлкаланине туйнӑ. Ҫӑлавҫӑсем каччӑна ҫыран хӗррине илсе тухнӑ.
Аса илтерер: нумаях пулмасть Шупашкар районӗнчи Ертукассинче арҫын пулла кайсан путса вилнӗ.
Муркаш районӗнче пурӑнакан пӗр арҫын тӗлӗшпе пуҫиле ӗҫ пуҫарнӑ. Вӑл Атӑлта рак тытнӑ. Ӑна Чӑваш Енри транспорт полицийӗ тытса чарнӑ.
Муркаш районӗнче пурӑнакан 42 ҫулти арҫын Атӑлта пӑр шӑтарса унта 50 метр сарлакӑш тетӗл янӑ. Пулӑҫ аллине ҫапла майпа 15 рак тата темиҫе пулӑ ҫакланса ӗлкӗрнӗ. Транспорт полицийӗнче пӗлтернӗ тӑрӑх, рака кӑрлач уйӑхӗн 1-мӗшӗнчен тытӑнса утӑ уйӑхӗн 15-мӗшӗччен тытма юрамасть.
Ҫутҫанталӑк ресурсӗсене ҫав арҫын 10 пин тенкӗ ытлалӑх шар кӑтартнӑ. Халӗ ун тӗлӗшпе пуҫиле ӗҫ пуҫарнӑ.
Чӑваш Енри браконьер Тутарстанра ҫакланнӑ.
Тутар Республикинчи биоресурссен патшалӑх комитечӗн тата РФ Шалти ӗҫсен министерствин Тутарстанри лини управленийӗ пӗлтернӗ тӑрӑх, Сӗве юханшывӗ ҫинче Чӑваш Енри ҫынна тытса чарнӑ. Вӑл Бритвино ялӗнчен 3 километрта пулӑ тытнӑ. Арҫын усӑ курма юраман вӑлтасемпе, ытти хатӗрпе усӑ курнӑ.
Хальхи вӑхӑтра Тутарстанри йӗрке хуралҫисем Чӑваш Енри арҫын тӗлӗшпе РФ Пуҫиле кодексӗн 256-мӗш статйипе килӗшӳллӗн ӗҫ пуҫарас ыйтӑва тата параҫҫӗ.
Ҫанталӑк самай ӑшӑтрӗ, ҫавна май пӑр ҫине тухма та хӑрушӑ. Анчах пулӑҫсене ку хӑратмасть.
Нарӑс уйӑхӗн 24-мӗшӗнче арҫынсем пулӑ тытса ларнӑ хушӑрах Атӑл ҫинчи пӑр катӑлма тытӑннӑ. Пӗр пайӗ катӑлса шалаллах юхма пуҫланӑ. Пулӑҫсем пурте тенӗ пек ҫыран хӗрринче чупса тухма ӗлкӗрнӗ. Пӗри ҫеҫ, ватӑраххи йывӑр тум тӑхӑннӑскер, ӗлкӗреймен.
Тусӗсем ҫӑлавҫӑсем патне шӑнкӑравланӑ. Вӗсем часах ҫитнӗ. Пулӑҫа пӑр ҫинчен ҫыран хӗррине илсе тухнӑ. Юрать-ха, унӑн сывлӑхӗ йӗркеллех.
Пулӑҫсене асӑрхаттараҫҫӗ: пӑр ҫине тухма халӗ хӑрушӑ!
+9.3 °C