Мария Мамаева куҫ курманнисен хушшинче иртнӗ Раҫҫей чемпионатӗнче ылтӑн медаль илнӗшӗн премие тивӗҫнӗ. Ӑна республика хыснинчен парӗҫ, хушӑва ЧР Элтеперӗ Олег Николаев алӑ пуснӑ.
Премие спортсменкӑна пӗр хутчен парӗҫ. Вӑл 12 пин тенкӗпе танлашать.
Аса илтерер: чемпионат ака уйӑхӗн 6-11-мӗшӗсенче Калугӑра иртнӗ. 17 ҫулти Мария Мамаева унта ылтӑн медальсӗр пуҫне кӗмӗл тата пӑхӑр медальсем ҫӗнсе илнӗ. Ҫӗртме уйӑхӗнче вара вӑл Раҫҫей Кубокӗнче ишессинче ӑмӑртса икӗ ылтӑн, икӗ кӗмӗл тата пӗр пӑхӑр медальсем ҫӗнсе илнӗ.
Чӑваш Республикин Патшалӑх премине, 75 пин тенке, камсем тивӗҫни паллӑ. Хушӑва ЧР Элтеперӗ Олег Николаев алӑ пуснӑ.
Литература тата ӳнер тытӑмӗнче ӑна «Сӑр чикки» опера лартнӑшӑн Питӗрти «Арт-Петербург» ыркӑмӑллӑх фончӗн президенчӗ Ирина Гаудасинская, Питӗрти патшалӑх консерваторийӗн доценчӗ Екатерина Иванова, Чӑваш патшалӑх оперӑпа балет театрӗн артисчӗ Алексей Рюмин, Карина Шебелян усламҫӑ, Питӗрти режиссер-постановщик Елисей Шепелев тивӗҫнӗ.
Гуманитари ӑслӑлӑхӗсен тытӑмӗнче премие И.Н.Ульянов ячӗллӗ ЧПУ вӗрентекенӗсем Алевтина Зыкина, Татьяна Иванова, Елена Минеева, лаборатори заведующийӗ Алексей Минеев, Урал патшалӑх университечӗн вӗрентекенӗ Алексей Старостин «Наркомнац РСФСР и реализация национальной политики в 1917-1920-е годы» монографишӗн илнӗ. Техника ӑслӑлӑхӗсен тытӑмӗнче И.Н.Ульянов ячӗллӗ ЧПУ вӗрентекенӗсем Борис Алексеев, Николай Кольцов, Владислав Федотов кинетикӑна тата хими реакцийӗсене тӗпченӗшӗн премие тивӗҫнӗ.
«Чӑваш Ен» патшалӑх телерадиокомпанийӗн журналисчӗ Алексей Енейкин 2023 ҫулшӑн ҫамрӑксен патшалӑх премине тивӗҫнӗ. Кун пирки Альбина Юрату сӑвӑҫ халӑх тетелӗнчи хӑйӗн страницинче хӑпартланса пӗлтернӗ.
Сӑмах май каласан, 2022 ҫулта Алексей Ҫемен Элкер премийӗн лауреачӗ ята тивӗҫнӗччӗ. Ун чухне журналистӑн Сӑр тата Хусан хӳтӗлев чиккисене чавма хутшӑннисене халалласа хатӗрленӗ «Военное детство» (чӑв. Ҫар ачалӑхӗ) телепрограммӑсен ярӑмне ҫавӑн пек сума суса хакланӑччӗ.
Шупашкарта «ГолосА» поэзи фестивалӗ иртӗ. Ӑна Геннадий Айхи ҫуралнӑранпа 90 ҫул ҫитнине халаллӗҫ.
Культура мероприятийӗ Чӑваш Енӗн Наци вулавӑшӗнче ҫу уйӑхӗн 23-24-мӗшӗсенче пулӗ.
Унӑн формачӗ хӑйне евӗр: музыка, вокал, тӗрлӗ хускану, живопись, сӑвӑсем, поэзире пирвайхи утӑмӗсене тӑвакансемпе тӗлпулусем.
Фестивалӗн тӗп пулӑмӗ – поэзи спектаклӗсем. Вӗсене поэтӑн хӗрӗ, актриса, режиссер, поэт, Вероника Айги хатӗрленӗ. Ӑна унӑн «Хористки» проектне (Мускав) хутшӑнакансем кӑтартӗҫ.
Ҫу уйӑхӗн 23-мӗшӗнче, 16.00–18.00 сехетсенче, «День присутствия всех и всего» музыкӑпа поэзи перформансӗ Чӑваш Енӗн Наци вулавӑшӗнче иртӗ.
19.00-20.30 сехетсенче Камера театрӗнче «Хористки» ушкӑн «Т.Ч.К.» спектакль кӑтартӗ. Режиссёрӗ – Вероника Айги.
Ҫу уйӑхӗн 24-мӗшӗнче маларах асӑннӑ вулавӑшра 14.00-15.00 сехетсенче «Поклон – пению» спектакль пулӗ. Ӑна Геннадий Айхи хайлавӗпе Вероника Айги режиссер хатӗрленӗ. Куракансем умне «Хористки» ушкӑн тухӗ. 15.00-16.00 сехетсенче «ГолосА» конкурс ҫӗнтерӳҫисене чыслӗҫ, Г. Айги ячӗллӗ преми парӗҫ.
Чӑваш Республикин литературӑпа ӳнер енӗпе патшалӑх премине илме тӑратнӑ ӗҫсенчен тӑваттӑшне конкурса хутшӑнма суйласа илнӗ.
Вӗсенчен пӗри — «Чӑваш Ен» издательствӑпа полиграфи комплексӗнчи Чӑваш Енри фотокорреспондентсен музейӗ, полиграфи музейӗ. Авторӗ — «Хыпар» издательство ҫурчӗн фотокорреспонденчӗ Сергей Журавлёв. Ӗҫе издательствӑпа полиграфи комплексӗ тӑратнӑ.
Кӗске метрлӑ «Мальчик из Шоршел» илемлӗ фильма Совет Союзӗн икӗ хут Геройне Андриян Николаева халалланӑ. Автор — Ҫӗнӗ Шупашкарти «Химик» культура ҫурчӗн директорӗн ҫумӗ Елена Еделеева. Ӗҫе конкурса «Химик» культура ҫурчӗ тӑратнӑ.
Чӑваш халӑхӗн менталитетне тӗпченине халалланӑ спектакльсен «Моя Чувашия» трилогийӗн авторӗ — Алексей Болдырев. Вӑл — Чӑваш патшалӑх культурӑпа ӳнер институтӗнче актёр ӑсталӑхӗн тата режиссура кафедрин доценчӗ. Ӗҫе конкурса ҫав институт тӑратнӑ.
Е. Иванова-Блинован «Сурский рубеж» оперине Чӑваш патшалӑх оперӑпа балет театрӗ сӗннӗ.
Нарӑсӑн 20-мӗшӗнче - синкер шӑпаллӑ Нестер Янкас поэт ҫуралнӑ кун, ӑна халалласа Трак енри (Красноармейскинчи) Тӗп вулавӑшра анлӑ уяв иртрӗ. Йӗркелекенсем ҫаксем: округ администрацийӗн социаллӑ аталану, культура тата архив ӗҫӗсен пайӗ (пуҫлӑхӗ - Снежана Гаврилова), Чӑваш наци конгресӗн вырӑнти уйрӑмӗ (ертӳҫи - Зинаида Михайлова) тата Нестер Янкас ячӗллӗ культурӑпа искусство тата культура пӗрлӗхӗ (ертӳҫи - Иван Прокопьев-Чураль).
Уявӑн пӗрремӗш пайӗнче черетлӗ саккӑрмӗш "Янкас вулавӗсем" йӗркеленчӗ, унта 15 пӗлтерни итлеме май килчӗ. Хастарсене те саламлама май тупрӗҫ янкасҫӑсем: вырӑнти ЧНКан Трак енри уйрӑмӗн ертӳҫине Зинаида Михайловӑна пӗрлӗхӗн орденӗпе чысларӗҫ, вулавра тухса калаҫакансене округ пуҫлӑхӗн Павел Семеновӑн дипломӗпе хавхалантарчӗҫ.
Форума Нестер Янкаса реабилитацилеме тӳпе хывнӑ шӑллӗн - Григорий Кирилловӑн - ывӑлӗ Александр Кириллов (республикӑмӑрти паллӑ ача-пӑча тухтӑрӗ) килни тата тухса калаҫни пысӑк сум кӳчӗ.
Уявӑн иккӗмӗш пайӗнче пӗрлӗхӗн Нестер Янкас ячӗллӗ Премин 2023-мӗш ҫулхи ҫӗнӗ лауреатсене чысларӗҫ. Вӗсем Анатолий Федоров - Чӑваш патшалӑх оперӑпа балет театрӗн режиссер управленийӗн заведующийӗ, Татьяна Степанова - Шупашкарти Трактор тӑвакансен керменӗ ҫумӗнчи "Ҫӑлкуҫ" халӑх театрӗн артистки, сӑвӑҫ-юрӑҫ тата композитор пулчӗҫ.
Вырӑс патшалӑх драма театрӗ театр ӳнерне аталантарнӑшӑн Федор Волков ячӗллӗ премие тивӗҫнӗ. Сумлӑ премие театр директорне Дмитрий Капустина Мускавра ВДНХра иртекен «Раҫҫей» курав-форумра Татьяна Голикова вице-премьер панӑ.
Федор Волков - вырӑс режиссерӗ, актер, Раҫҫейре профессионал театрне йӗркелекенсенчен (Александр Сумароков поэтпа пӗрле) пӗри. Сӑмах май, 2022 ҫулта Вырӑс патшалӑх драма театрӗ 100 ҫулхи юбилейне паллӑ тунӑ.
РФ Патшалӑх Думин депутачӗсем нумай ҫул пурӑнакан мӑшӑра, ҫавра ҫул тӗлне, преми пама сӗннӗ. Ку тӗллевпе саккун проектне хатӗрленӗ.
Документра палӑртнӑ тӑрӑх, 20 ҫул пурӑнакан мӑшӑра – 20 пин, 25 ҫул пурӑнакансене – 25 пин, 70 ҫул кун кунлакансене 70 пин тенкӗ парасшӑн. Анчах ҫак тапхӑрта мӑшӑрӑн уйрӑлмалла мар.
Юбилей ҫулӗнче мӑшӑртан пӗри вилнӗ пулсан премие пӗри илме пултарать. Заявление юбилей пулнӑ хыҫҫӑн икӗ уйӑх иртиччен памалла. Саккуна ырласан вӑл утӑ уйӑхӗн 1-мӗшӗнчен вӑйра пулӗ.
Чӑваш Енре Пичет кунӗ умӗн журналистсен премине тивӗҫ калем ӑстисене палӑртнӑ.
Ҫемен Элкер ячӗллӗ журналистсен премине «Чӑваш Ен» НТРКра тӑрӑшакан Родион Архипова пама йышӑннӑ. Радиожурналист «Присягая Родине» ҫарпа патриотизм кӑларӑмӗсен ярӑмне йӗркелесе пыать.
Леонид Ильин ячӗллӗ журналистсен премине «Хыпар» издательство ҫурчӗн «Ҫамрӑксен хаҫатӗнче» тӑрӑшакан Ирина Ивановӑна экологипе тата ял хуҫалӑхӗпе ҫыхӑннӑ ҫивӗч ыйтусене хускатнӑшӑн парас тенӗ.
Чӑваш Енре литературӑпа ӳнерти 2023 ҫулти ӗҫсемшӗн преми илме конкурса ӗҫсене малалла йышӑнаҫҫӗ.
Асӑннӑ премие пирӗн республикӑра ҫулсерен параҫҫӗ. Ӑна тивӗҫ ӗҫсен ҫӗнӗлӗхпе уйрӑлса тӑмалла, вӗсене халӑх пысӑка хурса йышӑнни тата наци культурине аталантарма пысӑк тӳпе хывни кирлӗ.
Асӑннӑ ӗҫсем музыка, ӳнер. театр, хореографи тата эстрада ӳнерӗпе, дизайнпа, кинопа тата телекуравпа, халӑх пултарулӑхӗпе ҫыхӑнма пултараҫҫӗ.
Ӗҫсене Чӑваш Енӗн Культура министерствинче нарӑс уйӑхӗн 1-мӗшӗччен йышӑнӗҫ. Ыйтса пӗлмелли телефон номерӗ 8(8352) 56-50-48.
+0.3 °C