Шкул ачисем нарӑс уйӑхӗн 6-мӗшӗччен дистанци мелӗпе вӗренеҫҫӗ. Республикӑра кӑшӑлвирус ҫӗнӗ вӑйпа сарӑлма пуҫланӑран ҫапла йышӑннӑччӗ ЧР Элтеперӗ Олег Николаев.
Шкул ачисем ҫитес эрнере парта хушшине ларӗҫ-и? Халӗ ку ыйту пирки шухӑшлаҫҫӗ. Ыран оперштаб ларӑвӗ пулӗ. Шӑпах ҫавӑнта ку ыйтӑва татса парӗҫ. «Унта аслӑ класра вӗренекенсене дистанци мелӗпе вӗрентес ӗҫе тӑсассине сӳтсе явӑпӑр», — палӑртнӑ Олег Алексеевич Инстаграмри страницинче.
Аса илтерер: хальхи вӑхӑтра Шупашкарти тата Ҫӗнӗ Шупашкарти шкул ачисем дистанци мелӗпе вӗренеҫҫӗ.
Нумаях пулмасть, пӗр эрне каялла, Чӑваш Енре 12-17 ҫулсенчи ачасене кӑшӑлвирусран вакцинацилеме пуҫланӑ. Вакцинӑн 960 дозине республикӑна кӑрлач уйӑхӗн 22-23-мӗшӗсенче кӳрсе килнӗ. ЧР Сывлӑх сыхлавӗн министерстви «Спутник М» пульницӑсенче ҫителӗклӗ пулнине пӗлтерет.
Нарӑс уйӑхӗн 2-мӗшӗ тӗлне республикӑра 12-17 ҫулсенчи 320 ача пӗрремӗш компонентпа укол тутарнӑ. Вӗсене ача-пӑча поликлиникисенче, районти пульницӑсенче вакцинацилеҫҫӗ. Анчах аслӑ ӳсӗмри ҫынсем пек патшалӑх пулӑшӑвӗсен порталӗ урлӑ ҫырӑнма ҫук.
Аса илтерер: 15 ҫултан аслӑрах ачасем прививкӑна ашшӗ-амӑшӗнчен ирӗк ыйтмасӑр хӑйсемех хут ҫырса тутарма пултараҫҫӗ.
Паян - 956 ҫын. Сӑмах кӑшӑлвируспа чирлекенсем пирки пынине тавҫӑртӑр пуль ӗнтӗ. Ӗнерхинчен 100 яхӑн ҫын нумайрах..
179 ҫынна пульницӑна вырттарнӑ, юлашки талӑкра 406 ҫын сывалнӑ. Вилекенсем малтанхи пекех йышлӑ мар. Стопкоронавирус.рф сайт пӗлтернӗ тӑрӑх, иртнӗ талӑкра 3 ҫын чире парӑнтарайман.
Ку таранччен республикӑра 53579 ҫын инфекциленнӗ. Вӗсенчен 43488-шӗ сывалнӑ. Ку 81,1 процентпа танлашать.
Паянхи кун тӗлне республикӑра 4210 ҫын кӑшӑлвируспа чирлесе вилнӗ.
Иртнӗ талӑкра Чӑваш Енре 832 ҫын кӑшӑлвируспа чирленӗ. Куратӑр ӗнтӗ: хисеп кашни кун пысӑк хӑвӑртлӑхпа ӳссе пырать. 176 ҫынна пульницӑна вырттарнӑ. Кун пирки федераци информаци центрӗ пӗлтерет.
201 ҫын вара сывалнӑ. 5 ҫын вилнӗ. Ку таранччен кӑшӑлвирус республикӑри 4207 ҫыннӑн пурнӑҫне татнӑ.
Паянхи кун тӗлне Чӑваш Енре 52623 ҫын чирленӗ. Вӗсенчен 43082-шӗ сывалнӑ. Ку 81,8 процентпа танлашать.
Аса илтерер: чирлекенсем нумайланса пынӑран хушма ковид-койкӑсем хатӗрленӗ, тепӗр икӗ пульница ковид-госпиталь пек ӗҫлеме тытӑннӑ.
Кӑшӑлвируспа чирлекенсен йышӗ ӳссе те ӳссе пырать. Юлашки талӑкра республикӑра 724 ҫын чирленине палӑртнӑ. Ӗнерхипе танлаштарсан, 100-е яхӑн ҫын ытларах.
Кӑшӑлвируспа аптӑранӑ 86 ҫынна пульницӑна вырттарнӑ. Юлашки талӑкра 113 ҫын чире парӑнтарнӑ. Вилекенсен йышӗ унчченхи пек нумай мар. Иртнӗ талӑкра 4 ҫын кӑшӑлвируса парӑнтараймасӑр пурнӑҫран уйрӑлнӑ. Кӑрлачри 30 кунра 329 пациентӑн пурнӑҫӗ татӑлнӑ. Пӗтӗмпе 4202 ҫын кӑшӑлвирусран вилнӗ.
Ку таранччен 51791 ҫын инфекциленнӗ. Вӗсенчен 42881-шӗ сывалнӑ.
Чир-чӗр никама та тиркемест. Укҫасӑррине те, укҫаллине те; пӗчӗк вырӑнта ӗҫлекене те, пысӑк вырӑн йышӑнаканнине те.
«Вирус манран та пӑрӑнса иртмерӗ. Килтен тухмасӑр лартӑм. Иккӗмӗш хут чирлерӗм. Хальхи вӑхӑтри вакцинацие пула чире ҫӑмӑллӑн ирттертӗм», — тесе хыпарланӑ паян РФ Патшалӑх Думин депутачӗ Алла Салаева.
«Сывлӑха упрама хальхи вӑхӑтра ҫӑмӑл мар, анчах май пур. Вакцинацилеме никама та чӗнсе каламастӑп, ку — кашнин хӑйӗн ирӗкӗ. Анчах чирӗн пиллӗкмӗш тапхӑрӗнче татӑклӑ утӑма васкасарах тумалла. Хамӑршӑн, хамӑр ҫывӑх ҫыннӑмӑрсемшӗн, ковидпа чирлемесӗр ирттерекен пурнӑҫшӑн», — пӗтӗмлетнӗ депутат.
Кӑшӑлвирус ҫӗнӗ вӑйпа сарӑлма тӑтӑннӑран социаллӑ пулӑшу паракан учрежденисем изоляци режимӗпе ӗҫлеме тытӑннӑ. Унта ӗҫлекенсем икӗ эрне хупӑ режимпа ӗҫлӗҫ, ниҫта та тухса ҫӳремӗҫ.
ЧР Ӗҫлев министерстви пӗлтернӗ тӑрӑх, республикӑри 6 психоневрологи интерначӗ, 1 ача ҫурчӗ, 3 ваттисен тата сусӑрсен ҫурчӗ, социаллӑ пулӑшу паракан 7 стационар уйрӑмӗ ҫак режимпа ӗҫлӗ. Пӗтӗмпе – 17 учреждени. Унти ӗҫченсем ӗҫе кӗриччен ПЦР-тест панӑ.
Изоляци режимӗпе ӗҫлекенсене ятарлӑ тӳлев парӗҫ.
Паянтанпа, кӑрлач уйӑхӗн 31-мӗшӗнчен, Чӑваш Енри сывлӑх сыхлав учрежденийӗсем урӑхларах ӗҫлеме тытӑнӗҫ. Больницӑсем планпа пӑхнӑ амбулатори пулӑшӑвне пама пӑрахӗҫ, медицина тӗрӗслевӗ витӗр кӑлармӗҫ, диспансеризаци те тухаймӑн. Ҫавна республикӑн Сывлӑх сыхлав министерствинчи тӳре-шара тухтӑрсене кӑшӑлвируспа чирлисене пулӑшма явӑҫтарассипе сӑлтавлаҫҫӗ.
Ҫивӗч вирус респиатор инфекцийӗпе тата кӑшӑлвируспа аптӑракансене амбулатори центрӗсенче йышӑнӗҫ.
Тухтӑрсене ҫӗнӗлле ӗҫлеттерессипе ҫыхӑннӑ йышӑнӑва Роспотребнадзорӑн республикӑри управленийӗнче кӑрлач уйӑхӗн 28-мӗшӗнче кӑларнӑ.
Юлашки вӑхӑтра кӑшӑлвирусран вилекенсем сахалланнӑ. Стационара сипленме выртакансем те кӑштах чакнӑ. Анчах чирлекенсен шучӗ кунсерен ӳссе пырать.
Иртнӗ талӑкра республикӑра 630 ҫын инфекциленнӗ. Кун пекки ку таранччен пулман. 137 ҫынна пульницӑна вырттарнӑ. Сывалакансем нумаййӑн пулнӑ: 204 ҫын. 2 ҫын чире парӑнтараймасӑр пурнӑҫран уйрӑлнӑ.
Пандеми пуҫланнӑранпа республикӑра 51067 ҫын кӑшӑлвируспа чирленӗ. Вӗсенчен 42768-шӗ сывалнӑ. Ку 83,7 процентпа танлашать. Пӗтӗмпе 4198 ҫын кӑшӑлвируса пула вилнӗ.
Танлаштармашкӑн: иртнӗ эрнере 25 ҫын пурнӑҫран уйрӑлнӑ. Кӑрлач уйӑхӗн пӗрремӗш эрнинче 136 ҫын кӑшӑлвируса парӑнтарайман.
Юлашки вӑхӑтра кӑшӑлвируспа чирлекенсен йышӗ нумайланса пынине кура республикӑри икӗ пульница ковид-госпиталь пек ӗҫлеме пуҫланӑ. Кун пирки ЧР сывлӑх сыхлавӗн министрӗ Владимир Степанов оперштаб ларӑвӗнче пӗлтернӗ.
Хулари 2-мӗш пульницӑра кӑшӑлвируспа чирлисем валли 80 койка хатӗрленӗ. Республикӑри кардиологи диспансерӗнче тепӗр 30 койка пур.
Хальхи вӑхӑтра ковид-госпитальсенче пӗтӗмпе 1146 койка хатӗрленӗ. Кӑрлач уйӑхӗн 27-мӗшӗ тӗлне стационарсенче кӑшӑлвируспа чирлӗ 1011 ҫын выртнӑ. Вӗсенчен 191-шӗн сывлӑх йывӑр. 25-шӗн сывлӑхӗ пушшех те йывӑр. Вӗсем ИВЛпа сывлаҫҫӗ.
Резервра – тепӗр 2 пин койка. Кирлӗ пулсан вӗсене те хута яраҫҫӗ.
+12.5 °C