Ҫурла уйӑхӗн 2-мӗшӗнче Википедин чӑваш уйрӑмӗ 6 пинлӗ чикӗрен иртсе кайрӗ. 6 пинӗмӗш статья Павлов Николай Степанович (литературовед ҫинчен) пулса тӑнӑ.

Халӗ пирӗн уйрӑм 252 чӗлхе уйрӑмӗсен хушшинче 87-мӗш вырӑн йышӑнать. Тӗрӗк чӗлхисем хушшинче вара — 3-мӗш вырӑнта (10 уйрӑм хушшинче).

Кунсерен чӑваш уйрӑмӗ 5-10 ҫӗнӗ статьяпа пуянланать, пур статьясем лайӑхланса, пуянланса пыраҫҫӗ. Википедине тултарма PCode, Viktor, Chavash хутшӑнакансем самай пулӑшаҫҫӗ.

Википедин чӑваш уйрӑмӗнче эсир чӑвашсен историйӗпе, паллӑ ҫыннисемпе, ял-хулисемпе паллашма пултаратӑр. Унсӑр пуҫне ытти енлӗ информаципе те паллашма пулать — тӗнчен пур кетесри те хуласемпе, тӗрлӗ тапхӑрти историпе (чӑвашсемпе ҫыхӑнман пулсан та), ҫынсемпе.

Кӗрсе курӑр, паллашӑр! Унсӑр пуҫне сирӗн пулӑшӑва кӗтетпӗр — ҫырмалли, тултармалли тата тикӗслетмелли пайтах! Пурин валли те ӗҫ тупӑнӗ!

«Чӑваш тӗнчи» фотогаллерейинчи сӑнӳкерчӗксен шучӗ 6 пинрен иртрӗ! Юлашки хутӗнче галерейӑна Ишек муйзейӗнче тата Шупашкар районӗнче тунӑ сӑнӳкерчӗксене кӗртнӗ — вӗсен шучӗпе 6 пине яхӑн сӑнӳкерчек пулса тӑчӗ.

«Чӑваш тӗнчи» фотогалерейӑра эсир чӑвашсемпе ҫыхӑннӑ сӑнӳкерчӗксене тупма пултаратӑр: Чӑваш Ен районӗсене, ялӗсене, тавралӑхне. Ҫавӑн пекех Чӑваш Енре иртнӗ мероприятисемпе те паллашма пулать. Унсӑр пуҫсӑр фотогалерейӑра чӑвашсем пурӑнакан ытти тӑрӑхри сӑнӳкречӗксем те вырнаҫнӑ — Тутарстан, Мускав, Самар Ен.

Паян Енӗш Нӑрваш ялӗн уйрӑм сайт уҫӑлчӗ. Сайта хатӗрлекенӗ — Александр Герасимов. Сайта хатӗрлеме пуҫарнӑ ӗҫӗн сӑлтавӗ, вӑл каланӑ тӑрӑх — Интертетелте хӑйӗн ялӗ ҫинчен каласа паракан информаци сахал пулни.

Сайта вӑл Арестова Мая Дмитриевна, Ванерке Владимир Алексеевич, Егоров Петр Егорович, Ефимов Алексей Никифорович тата Петров Владимир Васильевич ҫырса кӑларнӑ «Енӗш Нӑрваш. Ял историйӗ» кӗнекене усӑ курса хатӗрленӗ.

Сайтӑн адресӗ: http://enesh.info