ЧР Элтеперӗ Олег Николаев саппасри подполковникӑн, ятарлӑ ҫар операцийӗн ветеранӗн Руслан Валиуллинӑн наставникӗ пулӗ. Ку – «Время СВОих» регионти проектпа килӗшӳллӗн.
Ҫавӑн пекех Элтепер ӑна хӑйӗн пулӑшуҫи пулма сӗннӗ. Валиуллин ятарлӑ ҫар операцийӗпе ҫыхӑннӑ общество организацийӗсемпе тата ҫар ӗҫӗн ветеранӗсемпе ҫыхӑну тытӗ.
Палӑртмалла: Руслан Валиуллин 1986 ҫулта Патӑрьел районӗнчи Тутар Тимеш ялӗнче ҫуралнӑ. 2020 ҫулхи чӳкре ӑна сывлӑхне кура саппаса янӑ. 2022 ҫулта вӑл тулли мар мобилизаципе ятарлӑ ҫар операцине кайнӑ. 2023 ҫулта йывӑр аманнӑ, вӑл службӑна юрӑхсӑр тесе йышӑннӑ.
Чӑваш Енӗн вице-премьерне Дмитрий Краснова чикӗ леш енне кайма чармӗҫ. Унччен унӑн ҫавӑн пек чару пулнӑ-мӗн. Халӗ вӑл ҫав йышӑнӑва суд урлӑ пӑрахӑҫлаттарнӑ.
Дмитрий Краснова чике леш енне кайма чарни «Вкладсене страхлакан агентство» патшалӑх корпорацийӗ ыйтнипе ҫыхӑннӑ. Ӑна тата тепӗр сакӑр ҫынна «Розничное и корпоративное страхование» компани ӗҫӗпе ҫыхӑнтарнӑ. Мускаври ҫав предприятире Дмитрий Краснов 2016-2020 ҫулсенче гендиректор пулса ӗҫленӗ, 2021 ҫулта предприяти панкурта тухнӑ.
2025 ҫулхи ҫу уйӑхӗнче Мускаври Арбитраж сучӗ бенефициарсене тата топ-менеджер пулнӑ ҫынсене чикӗ леш енне кайма чарнӑ. Дмитрий Краснов кунпа килӗшмесӗр суда панӑ, суд ӑна майлӑ пулнӑ, мӗншӗн тесен паянхи кун тӗлне илсен Красновран тӑкаксене шыраса илесси ҫинчен калакан хут ҫук.
Муркаш районӗнчи Шомикри иртернат-ҫурт директорӗ пулнӑ ҫынна суд тенкелӗ ҫине лартнӑ. Ӑна РФ Пуҫиле кодексӗн 160-мӗш статйин 3-мӗш пайӗпе тата 187-мӗш статйин 1-мӗш пайӗпе айӑпланӑ.
Экс-директор интернатра пурӑнакан ҫынсен пенсийӗн пӗр пайӗпе усӑ курнӑ, вӗсем валли тавар туяннӑ пек туса суя килӗшӳсем тунӑ. Хӗрарӑм ватӑсене 420 пин ытла тенкӗлӗх шар кӑтартнӑ. Пӗтӗмпе вӑл 114 ҫынна улталанӑ.
Хӗрарӑма тӗрмене хупса хумасӑр 3 ҫуллӑха ирӗкрен хӑтарнӑ. 100 пин тенкӗ штраф хурса панӑ.
Чӑваш Ене ыран, ута уйӑхӗн 3-мӗшӗнче, Раҫҫей Президенчӗн Федерацин Атӑлҫи округӗнчи элчи килӗ.
Вӑл «Навигационная безопасность – 2025» (чӑв. Навигаци хӑрушсӑрлӑхӗ - 2025) наци форумне уҫма хутшӑнӗ. Унта навигаци тытӑмӗпе инфраструктура хӳтӗлевӗн нацин хӑрушсӑрлӑхне тата ҫӗршывӑн технологи суверенитетне сӳтсе явӗҫ.
Игорь Комаров республикӑри социаллӑ пӗлтерӗшлӗ объектсене те ҫитсе курӗ, унта канашлусемпе тӗлпулусем ирттерӗ. Унсӑр пуҫне вӑл ача-пӑчапа ҫамрӑксен театр коллективӗсен «Театр Атӑлҫийӗ» фестивалӗн ҫӗнтерӳҫисемпе курса калаҫӗ.
Ҫӗнӗ Шупашкар хулин пуҫлӑхӗ Максим Семёнов хӑйне отставкӑна янипе килӗшесшӗн мар. Вӑл вырӑнти Депутатсен пухӑвӗн йышӑнӑвне хирӗҫлесе суда тавӑҫпа тухнӑ.
«Правда ПФО» тӗнче тетелӗнчи хаҫат хыпарланӑ тӑрӑх, суд ун пек ӗҫсене хӑвӑрт, заявлени пырса ҫитнӗ хыҫҫӑн 10 кунта, пӑхса тухать. Юристсем шухӑшланӑ тӑрӑх, ответчика хӳтӗленме ҫӑмӑл пулас ҫук, мӗншӗн тесен муниципалитет органӗ ун пек йышӑнӑва хӑйӗн полномочийӗпе килӗшӳллӗн туман имӗш.
Тӑвай округӗнчи Енӗш Нӑрваш шкулӗнчи пӑтӑрмах пирки Чӑваш халах сайчӗ унччен пӗлтернӗччӗ-ха. Аса илтерер: унти юлашки шӑнкӑрав вӑхӑтӗнче 10-мӗш класра вӗренекен пӗр хӗрача тухса калаҫнӑ чухне ӑна директор тата хӑш-пӗр учитель кӳрентернине пӗлтернӗ. Видеона тӗнче тетелне вырнаҫтарнӑ хыҫҫӑн шкулта прокуратура тӗрӗслев пуҫарнӑ.
Чӑваш Ен Патшалӑх Канашӗн депутачӗ Александр Андреев пӑтӑрмах хыҫҫӑн республикӑн Вӗренӳ министерствине ҫыру ҫырнӑ. Унтисем ӑна хуравланӑ тӑрӑх, шкул директорӗ Раиса Иллариронова ӗҫрен пӑрахма ыйтса заявлени ҫырнӑ иккен, ҫӗртме уйӑхӗн 3-мӗшӗнчен вӑл директор пуканне пушатнӑ.
10-мӗш класс хӗрачипе тата унпа пӗр класра вӗренекенсемпе калаҫу ирттернӗ-мӗн. Шкулта вӗренме ачасене хӑтлӑ пултӑр тесе ҫӗнӗ вӗренӳ ҫулӗнче те тӗрлӗ ӗҫ туса ирттересшӗн-мӗн.
Чӑваш Ен Элтеперӗн Олег Николаевӑн пресс-службин управленийӗн пуҫлӑхне Юлия Стройковӑна пысӑкрах должность шанса панӑ. Вӑл Чӑваш Ен Элтеперӗн Администрацийӗн ертӳҫин ҫумӗ — пресс-служба тата протокол управленийӗн пуҫлӑхӗ пулса тӑнӑ.
Юлия Стройкова пресс-служба управленине виҫӗ ҫула яхӑн ертсе пынӑ, ҫав шутра Элтеперӗн пресс-секретарӗ пулса та тӑрӑшать.
Юлия Викторовна 1968 ҫулхи раштав уйӑхӗнче ҫуралнӑ. «Канале 5 плюс» каналта журналист тата ведущи пулнӑ, унтан «Чебоксары-ТВ» телеканалта ӗҫленӗ. Чӑваш Енӗн Наци телерадиокомпанине уҫнӑ хыҫҫӑн директорӑн заместителӗ пулса тӑнӑ, 2013-2014 ҫулсенче унта ертӳҫӗ тивӗҫне пурнӑҫланӑ. 2015 ҫулхи ҫӗртме уйӑхӗнче вӑл республикӑн информаци политикин министрӗн ҫумӗн пуканне йышӑннӑ. Ку должноҫре ҫичӗ ҫул ӗҫленӗ. 2022 ҫулхи ҫурла уйӑхӗнче ӑна Чӑваш Ен Элтеперӗн Олег Николаевӑн пресс-службин управленийӗн пуҫлӑхӗ пулма шаннӑ.
ЧР вӗренӳ министрӗн пӗрремӗш ҫумӗ пулнӑ Антонина Буданцова Шупашкарти 4-мӗш гимназие ертсе пыма тытӑннӑ. Вӑл министр ҫумӗнче 2024 ҫулхи кӑрлачран пуҫласа кӑҫалхи ҫу уйӑхӗччен ӗҫленӗ.
Гимназире вара унччен унта физкультура учителӗнче ӗҫленӗ ҫын директор пулнӑ. Вӑл должноҫрен кайнӑ. Ун умӗн вара чылай вӑхӑт, 2022 ҫулхи авӑн уйӑхӗнченпе, директор тупайман.
Ӗнер, ҫӗртмен 19-мӗшӗнче, Патшалӑх Думин депутатне Анатолий Аксакова Кремльте III степень «Тӑван ҫӗршыв умӗнчи тава тивӗҫлӗ ӗҫсемшӗн» орденпа чысланӑ.
Иртнӗ эрнере те наградӑна тивӗҫнӗ вӑл. Ун чухне Анатолий Аксакова Аслӑ Ҫӗнтерӳ пулнӑранпа 80 ҫул ҫитнине халалланӑ астӑвӑм медалӗпе чысланӑ. Нарӑс уйӑхӗнче ӑна Крым Патшалӑх Канашӗн медалӗпе наградӑланӑ.
Аса илтерер: пӗлтӗр Анатолий Аксаков Шупашкарӑн хисеплӗ ҫынни пулса тӑнӑ, ҫавӑн пекех РФ Спорт министерстви йӗркеленнӗренпе 100 ҫул ҫитнине халалланӑ юбилейлӑ медале тивӗҫнӗ.
Чӑваш Енре «Туризм тата хӑнасене кетсе илесси» наци проекчӗпе килӗшӳллӗн глэмпингсем тӑвассине эпир унчечн темиҫе хутчен те пӗлтернӗччӗ. Тӗллевле укҫана тивӗснисенчен пурте унпа йӗркелле тата вӑхатра усӑ курайманнисенчен кӗмӗле каялла илнине те хыпарланӑчче.
Глэмпингсене Йӑлӑмра, Улатӑр, Шупашкар, Куславкка тата Красноармейски тӑрӑхӗсенче тунӑ. Вӗсем хӑнасене йышӑнма та пуҫланӑ. Инвесторсен укҫипе хута янӑ глэмпингсем те пур.
Республикӑн экономика министре
«Эпӗ республикӑри мӗнпур глэмпинга ҫитсе куртӑм, вӗсен пахалӑхӗ тата сервисӗ аван. Паллах, ӗҫлемелли, лайӑхлатмалли татах пур, анчах юлашки ҫулсенче пурнӑҫ ыйтнипе тан пыни питӗ лайӑх», — тенӗ Дмитрий Краснов вице-премьер.
+3.3 °C