Улатӑр округӗнчи Стемас ялӗнче ҫӗнӗ фельдшерпа акушкр пункчӗ тума палӑртнӑ. Ку ӗҫе «Вӑрӑм та хастар пурнӑҫ» наци проекчӗпе килӗшӳллӗн пурнӑҫлаҫҫӗ.
ФАП ку тӑрӑзра пурӑнакан 1100 ҫынна медицина пулӑшӑвӗ парӗ. Вӑл тӗп урамра пулӗ. Ҫывӑхрах – почта, лавккасем, автобус чарӑнӑвӗ, ача-пӑча лапамӗ.
Ӗҫе пуҫӑннӑ ӗнтӗ. Паян строительсем вырӑна ҫитсе свайӑсем ҫапма тытӑннӑ.
Чӑваш Енре пурӑнакан пӗр хӗрарӑмӑн кӑкӑр ракӗ тупӑннӑ. Ӑна васкавлӑн операци тумалла пулнӑ. Пӗр амакӗ ҫитмен, тепри тупӑннӑ. Хӗрарӑм чӗре чирӗпе нушаланать иккен.
Республикӑри онкологи диспансерӗн тата Республикӑри кардиологи дсипансерен врачӗсем пӗр-пӗринпе тӗплӗн канашласа пӑхнӑ хыҫҫӑн икӗ операцие пӗр харӑс тума йышӑннӑ.
Операци тӑватӑ сехете яхӑн тӑсӑлнӑ. Малтан митраль клапанне ылмаштарнӑ, унтан мастэктоми текен операцие туса ирттернӗ.
Улатӑр районӗнчи пушарта икӗ ача пурнӑҫӗ татӑлнӑ. Пӑтӑрмах тӗлӗшпе пуҫиле ӗҫ пуҫарнӑ.
Пушар нарӑс уйӑхӗн 16-мӗшӗнчи ҫӗрле тухнӑ. Атрать посёлокӗнчи йывӑҫ пӳртре инкек вӑхӑтӗнче 2 тата 2 ҫулти ачасем, вӗсен ашшӗ-амӑшӗ пулнӑ. Ҫунакан пӳртрен аслисем тухма пултарнӑ. Пиҫсе кайнӑскерсене пульницӑна ӑсатнӑ.
Паян, нарӑс уйӑхӗн 15-мӗшӗнче, 17 сехет те 35 минутра «Сӑр» ҫул ҫинче амӑшӗпе хӗрӗн пурнӑҫӗ татӑлнӑ.
Талой ялӗ тӗлӗнче «ВАЗ-2115» автомобиль хирӗҫ килекен ҫул ҫине тухса кайнӑ та «Газель» машинӑпа пырса ҫапӑннӑ.
«ВАЗри» икӗ пассажир — 34 ҫулти хӗрарӑм тата 11 ҫулти хӗрача – вилнӗ. Инкек вӑхӑтӗнче хӗрарӑм малти ларкӑч ҫинче пулнӑ, ача — водитель хыҫӗнче. ВАЗӑн 32-ри водительне пульницӑна ӑсатнӑ.
Шупашкар хулинчи производство предприятийӗсенчен пӗринче рабочи пурнӑҫӗ татӑлнӑ.
Йывӑҫран сӗтел-пукан туса кӑларакан предприятире бункера пӑчкӑ кӗрпинчен пушатнӑ чухне арҫын пухмач ӑшне кӗрсе ӳкнӗ. Пӑчкӑ кӗрпи сывлав ҫулӗсене лекнине пула вӑл чыхӑнса вилнӗ.
Тӗпчевҫӗсем палӑртнӑ тӑрӑх, предприятире ӗҫ сыхлавӗн требованийӗсене пӑснӑ. Халӗ ҫав пӑтӑрмахпа ҫыхӑннӑ пуҫиле ӗҫе тӗпчеҫҫӗ.
Улатӑр районӗн тӗп пульницин хирургӗсем ватӑ хӗрарӑма операци туса пурнӑҫне ҫӑлнӑ. Халӗ вӑл хӑйне аванах туять.
Галина Парфеновнӑн ӳт температури хӑпарнӑ, хырӑмӗ ыратнӑ, кӑмӑлӗ пӑтраннӑ. УЗИ тунӑ хыҫҫӑн унӑн ват хӑмпинчен чулсем пулни палӑрнӑ. Пациентӑн ӳсӗмне кура тухтӑрсем малтан ӑна сиплеме йышӑннӑ. Анчах ку пулӑшман, чул ват хӑмпинчех юлнӑ.
Теветкеллӗ пулсан та кинемее операци тума тивнӗ. Телее, вӑл ӑна чиперех чӑтса ирттернӗ, майӗпен утса ҫӳреме пуҫланӑ. Тухтӑрсем ӑна кӑшт сӑнанӑ хыҫҫӑн киле янӑ.
Кӑҫал Канаш округӗнче икӗ ҫӗнӗ фельдшерпа акушер пункчӗ пулӗ: Ҫӗнӗ Мамире тата Кӑшаруйра.
Ҫак икӗ ялта 500 яхӑн ҫын пурӑнать. Ҫӗнӗ ФАПсенче халӑха тивӗҫлӗ медицина пулӑшӑвӗ пама пӗтӗм услови пулӗ. Хальхи йышши оборудовани вырнаҫтарӗҫҫ, эмелсене упрамалли ятарлӑ вырӑн пулӗ. Унта вакцинаци тума, диспансеризацин малтанхи тапхӑрӗ витӗр тухма та условисем тӑвӗҫ.
ФАП сусӑрсене кӗрсе ҫӳремешкӗн те меллӗ пулӗ.
Мари Элте пурӑнакан арҫынна Республикӑри кардиологи диспансерне илсе килнӗ. Вӑл хӑйне питӗ япӑх туйнӑ: йывӑррӑн сывланӑ.
Диагностика унӑн чӗрин клапанӗпе япӑх пулнине кӑтартнӑ. Операци тумасан арҫын темиҫе эрне ҫеҫ пурӑнма пултарнине каланӑ.
Кӳршӗ республика ҫыннине часрах операци тунӑ. Опытлӑ кардиохирургсен командине Николай Трофимов ертсе пынӑ. Операци 4 сехет пынӑ.
«Клапана юсаса мана пурнӑҫа каялла тавӑрчӗҫ», - пӗлтернӗ Иван ятлӑ пациент. Вӑл халӗ хӑйне аванах туять.
Мӑнукне пӑвса вӗлернӗ хӗрарӑма сиплеме ярасшӑн. Кун пирки Телеграмри «Пуринчен малтан» каналта пӗлтернӗ.
Пӗлтӗрхи ака уйӑхӗнче Шупашкарта 61-ри хӗрарӑм 9-ти мӑнукне пӑвса вӗлернӗ.
Херарӑм тӗлӗшпе пуҫарнӑ пуҫиле ӗҫе тишкерсе пӗтернӗ. «Тӗрлӗ экспертиза ирттернӗ хыҫҫӑн хӗрарӑм психика чирне пула хӑй мӗн тунине ӑнланман тесе палӑртнӑ. Специалистсем ӑна медицина учрежденийӗнче сиплеме сӗннӗ. Ҫитес вӑхӑтра унӑн шӑпине суд татса парӗ», — хыпарлана эпир маларах асӑнна ҫӑлкуҫра.
Кӑҫалхи иккӗмӗш эрнере республикӑра гриппа чирленӗ 12 ҫынна тупса палӑртнӑ. Вӗсен йышӗнче ачасем пур. Роспотребнадзор пӗлтернӗ тӑрӑх, пӗри те грипран прививка туман.
Гриппа чирленӗ ҫынран 6-шӗ – ачасем: 5-шӗ 14 ҫул тултарманнисем, пӗри 15-17 ҫулти.
Иртнӗ эрнере ОРВИпе чирленӗ 3266 тӗслӗхе шута илнӗ. Ку, унчченхи ҫулсенчи вӑтам кӑтартупа танлаштарсан, 24,8 процент пӗчӗкрех.
Сӑмах май, 2024 ҫулхи раштавӑн 20-мӗшӗ тӗлне республикӑра 518580 ҫын грипран прививка тутарнӑ.
+10.3 °C