Ладыков Шупашкар ҫыннисене Мускава каясран ӳкӗте кӗртесшӗн

Андрей Кулагин депутат ертсе пынипе Мускава тухнӑ Шупашкар ҫыннисем Улатимӗр облаҫӗнчи Гороховеца кӑна ҫитейнӗ — ҫынсене ӗнентернӗ тӑрӑх автобусӗсем ҫӗмӗрӗлнӗ имӗш. Ҫула илсе тухнӑ автобус хуҫисем ҫине Шупашкартах ура хума тытӑнни пирки пӗлтереҫҫӗ. Ҫав-ҫавах Чӑваш Енӗн тӗп хулинчен вӗсем тухма пултарнӑ-ха. Автобуссенче пенсионерсем, ачасем ларса тухнӑ.

Гороховеца ҫитсен малтан вӗсене автобус ҫӗмӗрӗлни пирки каланӑ, каярах вара малалла кайма май ҫукки пирки, ҫынсене каялла ҫеҫ илсе ҫитерме май пурри пирки каланӑ. Шупашкар ҫыннисене ку, паллах, килӗшмен — вӗсем вара Гороховецрах выҫӑ тытма ларнӑ, Мускава илсе ҫитермесен ҫӑвара апат та ямӑпӑр тесе пӗлтернӗ.

Асаилтеретпӗр, Мускав Шупашкарти «Шанхай» ҫыннисем пӗрремӗш хут ҫу уйӑхӗн 16-мӗшӗнче тухнӑччӗ. Ун чухне вӗсене вырӑнти полици ҫыннисем ирӗк ҫук тесе пуху ирттерттермен, каялла Шупашкара ӑсатнӑ. Кайран вара вӗсен ыйтӑвӗ пирки Чӑваш Ен Элтеперӗ Михаил Игнатьев та сӑмах каланӑччӗ — икӗ ене пӗр чӗлхе тупма тӑрӑшма сӗннӗччӗ, тӳре-шарана ҫак ыйту ҫине тимлӗх уйӑрма хушнӑччӗ. Ҫынсем каллех Мускав ҫул тытни, тӗрӗслӗхе Путинран тупассине кӑна шанни вырӑнти тӳре-шара хӑйӗн тивӗҫне ҫителӗклӗ пурнӑҫламаннине кӑтартать ӗнтӗ.

«Шанхай» ҫыннисем ҫула ӗнерех тухасшӑн пулнӑ, анчах малтан пӗр автобус хуҫи вӗсене илсе ҫитерме килӗшмен, кайран ҫынсем патне Алексей Ладыков та ҫитнӗ, Мускав каяссинчен ӳкӗте кӗме тӑрӑшнӑ.

#Шанхай, #Шупашкар, #Гороховец, #Улатимӗр облаҫӗ, #выҫӑ тытни, #политика, #ЛДПР, #тӳре-шара