Ака уйӑхӗн 10-мӗшӗнче Хӗрлӗ Чутай районӑн Культура ҫуртӗнче Аслӑ Ҫӗнтерӗве 70 ҫул ҫитнине, Литературӑпа Константин Иванов ҫулталӑкне, вырӑс тата чӑваш ҫыравҫисемпе поэчӗсене юбилейӗсене халалланӑ чаплӑ гала-концерт иртрӗ. Ял тӑрӑхӗсен йӑлана кӗнӗ смотр-отчечӗсем вӑхӑтӗнче пултарулӑх ушкӑнӗсен чи лайӑх номерӗсене суйласа илнӗ, шӑпах ҫавсене курма халӑх йышлӑ пухӑннӑ та. Районти чи лайӑх хор, ташӑ, фольклор коллективӗсем хутшӑнчӗҫ гала-концерта. Пӗччен е иккӗн юрлакансем те, кулӑшла сценкӑсем кӑтартакансем те, сӑвӑ калакансем те пулчӗҫ. Вӗсене залта ларакансем тӑвӑллӑн алӑ ҫупса йышӑнчӗҫ.

Чи малтанах ачасен пултарулӑхӗ пирки каласа хӑварас килет. Ҫитӗнекен ӑру сцена ҫине тухни пурин кӑмӑлне те каять, ку хутӗнче те ачасен хорӗ шӑрантарнӑ юрӑсемпе, илемлӗ ташӑсемпе куракан кӑмӑллӑ юлчӗ. Штанаш, Пантьӑк, Хӗрлӗ Чутай, Кив Атикасси ял тӑрӑхӗсенчи фольклор ушкӑнӗсем чӑваш ташши-юррисемпе савӑнтарчӗҫ.

Штанашсен Константин Ивановӑн «Нарспи» поэмипе ҫыхӑнтарса лартса панӑ ӗлӗкхи чӑваш туйӗ, ташӑ-юрӑ композицийӗ куракансен кӑмӑлне кайрӗ. Хусанушкӑньсен «Аслӑ Ҫӗнтерӳ ячӗпе» музыкӑпа хореографи композицийӗ те асра юлчӗ. Паллах, 10 ял тӑрӑхӗнчи, районти Культура ҫуртӗнчи, Ачасен искусство шкулӗнчи, Хӗрлӗ Чутай шкулӗнчи, «Пилеш» ача пахчинчи пултарулӑх ушкӑнӗсен номерӗсенчен тӑракан концерт хӑвӑрт вӗҫленессе никам та кӗтмерӗ, пачах та урӑхла, лайӑх номерсемпе киленсе канас шутпа пухӑнчӗҫ куракансем.

Концерт программи пуян, ытти ҫулхисенчен расна пулчӗ. Смотр-отчет тематикине пӑхӑнса хатӗрленӗ номерсем чуна тыткӑнламалла пиҫсе тухнӑ. Вӗсенче тӗрлӗ халӑх йӑли-йӗрки, туйӑмӗ палӑрчӗ.

Сӑнсем (183)

#Хӗрлӗ Чутай, #Хусанушкӑнь, #Ҫӗнтерӳ кунӗ, #Константин Иванов ҫулталӑкӗ, #Литература ҫулталӑкӗ, #концертсем, #культура, #Хӗрлӗ Чутай районӗ, #Штанаш, #ача пахчисем, #шкулсем