Мускаври ҫавра ҫул ҫинче Чӑваш Енри 11 ҫын шар курнӑ. Сарӑмсӑрлӑха республика правительствинчи планеркӑра сӳтсе явнӑ.

Инкек курнӑ арҫынсем — Мускав облаҫне ӗҫлеме кайнӑскерсем иккен. Чӑваш Енри полицейскисем инкек пулнин сӑлтавне палӑртасшӑн-мӗн. Министрсен Кабинетне комисси пухма хушнине те пӗлтерет REGNUM информагентство.

Инкек нарӑсӑн 28-мӗшӗнче сиксе тухнӑ. Чӑваш Енрен кайнӑ «Фиат» автобусра 18 ҫын пулнӑ, 11-шӗ аманнӑ, вӗсенчен пӗри ӗнер Мускаври пульницӑра вилнӗ. Транспорт бетон блокӗ ҫине пырса кӗсе тӳнсе кайнӑ. Пӗчӗк автобус водителӗ, пуҫ мимине чӗтретнӗскер, Шупашкара таврӑннӑ, вӑл васкавлӑ медпулӑшу паракан пульницӑра выртать иккен. «Мӗншӗн Мускаври пульницӑна кайманни ыйту ҫуратать», — тенӗ-мӗн Чӑваш Ен Элтеперӗ Михаил Игнатьев. Автобус Патӑрьел районӗнче регистрациленӗскер пулнине те пӗлтернӗ вӑл.

Ку инкек пирки правительство комиссийӗ пухма, лару-тӑрӑва тишкернӗ хыҫҫӑн информацие муниципалитет пуҫлӑхӗсем патне ҫитерме хушнӑ Игнатьев Элтепер.

ЧР шалти ӗҫсен министрӗн ҫумӗ Андрей Тимофеев инкек сӑлтавне тишкерме пулнӑ. Вӑл ют региона ӗҫлеме каякансем автобус тытса ют региона самайӑн тухса кайнине, кун пек юхӑм малашне те пулассине палӑртса хӑварнӑ.

Михаил Игнатьев Элтепер вара «рабочисем валли ӗҫ вырӑнӗ ялта та пур» тесе палӑртнӑ, ял хуҫалӑхӗнче ӗҫлесен те «ҫавӑн пекех тенӗ пек укҫа ӗҫлесе илме пултараҫҫӗ», — тенӗ вӑл.

Чӑваш Енри рабочисем инкеке унччен те лекнӗ тӗслӗх пулнӑччӗ. 2013 ҫулхи ҫу уйӑхӗн 14-мӗшӗнче Пенза облаҫӗнче инкеке лекнӗ автобусри 18 пассажиртан 10-шӗ вилнӗччӗ.

#ӗҫ вырӑнӗсем, #Мускав, #пӑтӑрмахсем, #Патӑрьел районӗ, #Шупашкар, #транспорт, #автобуссем