Чӑваш кӗнеке издательстви ҫулсерен иртекен «Чӑваш кӗнеки. Ҫамрӑк талантсем» конкурс пирки пӗлтерет. Ӑна кӑҫалхи Литература, Константин Иванов ҫулталӑкӗсене тата издательство 95 тултарнине халалланӑ.

Конкурса Чӑваш Енри кӑна мар, чӑваш чӗлхине вӗренекен ытти регионти ачасем те хутшӑнма пултараҫҫӗ. Чӑваш культурипе кӑсӑкланакан ытти ачан та ку ӑмӑртура хӑйне кӑтартма май пур. Конкурса хутшӑнакансене ҫулне кура ҫапларах уйӑрнӑ: 6–12 ҫултисем, 13–15-рисем, 15–18-тисем.

Кӑҫалхипе улттӑмӗш хут иртекен конкурса кӑҫал ҫак номинаципе йӗркелеҫҫӗ:

1. «Кӑсӑклӑ кӗнеке» темӑпа сочинении е калав ҫырмалла.

2. «Литературӑри манӑн юратнӑ сӑнар» ӳкерчӗк.

3. «Вулама сӗнетӗп!» темӑпа плакат, буклет, листовка е календарь.

4. «Ача аллипе ӑсталанӑ кӗнеке» номинацие хутшӑнас тесен ачасем хӑйсем ҫырнӑ сӑвӑсен, калавсен, заметкӑсен, очерксен кӗнекине алӑпа хатӗрлемелле. Кӗнекен хуплашки, ячӗ, автор тата художник-иллюстратор ҫинчен ҫинчен калани кирлӗ.

5. «Кӗнеке — пирӗн ҫемьери чи лайӑх тус». Кунта кӗнеке этем пурнӑҫӗнче епле вырӑн йышӑнни пирки эссе ярса парасса кӗтеҫҫӗ.

6. Конкурса хутшӑннӑ чух 2010–2014 ҫулсенче Чӑваш кӗнеке издательствинче кун ҫути курнӑ кӗнексемпе усӑ курма сӗнеҫҫӗ.

Ҫӗнтерӳҫӗсене издательствӑн 95 ҫулхи юбилейӗнче, кӑҫалхи чӳкӗн 12-мӗшӗнче, хаклӑ парнесем кӗтеҫҫӗ. Ӗҫсене нарӑсӑн 1-мӗшӗнчен тытӑнса юпан 12-мӗшӗччен йышӑнаҫҫӗ. Вӗсене Шупашкарти Пичет ҫуртӗнчи (вӑл Иван Яковлев проспектӗнчи 13-мӗш ҫуртра вырнаҫнӑ) 703-мӗш тата 713-мӗш пӳлӗмсене ҫитермелле. Ыйтса пӗлмелли телефон – (8352) 644451ӗ Сочиненисене, калавсене, эссесене nadesda-1@yandex.ru электронлӑ адреспа та йышӑнаҫҫӗ. «Конкурса» тесе палӑртма манмалла мар.

#культура, #Чӑваш кӗнеке издательстви, #Литература ҫулталӑкӗ, #Константин Иванов ҫулталӑкӗ, #кӗнекесем, #конкурссем, #ачасем