Ҫитес ҫул, ака уйӑхӗн 24–26-мӗшӗсенче, Википедин пушкӑрт уйрӑмӗ 10 ҫул тултарнине паллӑ туса «Вики-сабантуй 2015» мероприяти ирттерес шухӑшлӑ. Вӑл тӗрлӗ конкурссенчен тата конференцирен тӑрӗ. Тӗп вырӑнта «Википеди тата информаци обществи» ятлӑ Пӗтӗм тӗнчери ӑслӑлӑхпа ӗҫлӗх уҫӑ конференцийӗ пулӗ. Ӑна Пушкӑрт патшалӑх университечӗ, Ӗпхӳри истори, чӗлхе тата литература институчӗ, «Викимедия РУ» пӗрлӗх йӗркелеҫҫӗ. Пушкӑртсем ҫак конференцие пурне те хутшӑнма йыхравлаҫҫӗ.

Сӑмах май логотипсен конкурсӗсем пуҫланнӑ та. Хутшӑнакансем пӗр 20 яхӑн тӗрлӗ ӗҫ тӑратнӑ. Ҫавӑн пекех ҫак паллӑ куна халалласа пушкӑртла калаҫма вӗренмелли текстсем хатӗрлеме тытӑннӑ.

Пушкӑртсен пайӗ 2002 ҫулхи ҫӗртмен 2-мӗшӗнче ҫуралнӑ. Анчах ун чухне статьясем пулман-ха. Пӗрремӗш статья вара 2005 ҫулхи ака уйӑхӗн 16-мӗшӗнче кун ҫути курнӑ. Хальхи вӑхӑтра вӗсен уйрӑмӗнче 33 пин те 319 статья шутланать. Танлаштарма: пирӗн чӑваш уйрӑменче — 30 244 кӑна-ха. Пирӗн чӑваш уйрӑмӗн ҫуралнӑ кунӗ 2004 ҫулхи чӳкӗн 22-мӗшӗ шутланать.

#Ӗпхӳ, #тӗнче тетелӗ, #пушкӑрт чӗлхи, #Пушкӑртстан, #Википеди, #конференцисем