Чӗмпӗрти чӑвашсен «Еткер» фонд (президенчӗ Олег Мустаев) премийӗпе орденне тӑван халӑх умӗнче наука, литература, искусство, журналистика, архитектура тата спорт енӗпе тава тивӗҫлӗ ӗҫсемшӗн параҫҫӗ. Кӑҫал лауреатӑн хисеплӗ ятне тата премине Чӑваш халӑх художникӗ Владимир Агеев (чӑваш халӑх ӑс-хакӑлне ӳнер витӗр ҫине тӑрса ӗҫлесе тӗнче шайне ҫитернӗшӗн), Тутарстанри чӑвашсен культурӑпа автономи председателӗ, философи ӑслӑлӑхӗсен докторӗ Константин Яковлев (чӑваш чӗрӗлӗхӗпе пӗрлӗхӗшӗн ҫине тӑрса ӗҫленӗшӗн), Чӗмпӗрти усламҫӑ, Чӗмпӗр, Сарӑ Ту, Пенза тӑрӑхӗнчи чӑвашсен энциклопедийӗн редакторӗ тата пӗртен-пӗр спонсорӗ (чӑвашсен еткерлӗхне аталантарса упрама тӑрӑшнӑшӑн) илме тивӗҫнӗ.

Пӗлсе тӑма: Чӗмпӗрти чӑвашсен «Еткер» фондне ҫак ятлах телекӑларӑмӑн тӗп редакторӗ Олег Николаевич Мустаев йӗркеленӗ. 1992 ҫулта пултаруллӑ чӑвашсене татах хавхалантарас шутпа фондӑн ятарлӑ И.Я.Яковлев ячӗпе хисепленекен премине туса хунӑ. 2002 ҫулта унӑн ятарлӑ паллине ҫирӗплетнӗ, ӑна И.Я.Яковлев орденӗ ятпа преми ҫумне пама тытӑннӑ. 2004 ҫулта И.Я.Яковлев орденӗ Раҫҫейри обществӑлла наградӑсен реестрне кӗнӗ. Вунҫичӗ ҫул хушшинче «Еткер» фонд премине Чӑваш Республикинчи, Чӗмпӗр тӑрӑхӗнчи, Тутарстанри, Мускаври паллӑ ҫынсем тивӗҫнӗ: Атнер Хусанкай, Светлана Асамат, Сандр Пикл, Валентина Тарават, Порфирий Афанасьев, Владимир Афанасьев, Валери Туркай, Николай Абрамов, Олег Захаров тата ыт.те. Лауреатсене «Еткер» фондри ятарлӑ комисси кашни пилӗк ҫулта палӑртать.

#Чӗмпӗр, #Тутарстан, #фондсем, #чыслав