Чӑваш патшалӑх гуманитари ӑслӑлӑхӗсен институтӗнче паян Кашкар Махмучӗ ячӗллӗ 3-мӗш литература конкурсӗн ҫӗнтерӳҫисене чысларӗҫ. Мероприятине институт директорӗ Юрий Исаев уҫрӗ. Сас-хура пӗлтернӗ тӑрӑх маларах ку чыслав наци вулавӑшӗнче иртмелле пулнӑ, анчах чӑрмавсем кӳнине пула юлашки вӑхӑтра ҫеҫ мероприяти вырӑнне тупма пултарнӑ.

Чыслава Турцирен килнӗ хӑнасем килчӗҫ. Вӗсем ҫӗнтерӳҫӗсене ӗнентерӳ хучӗсемпе тата хаклӑ парнесемпе чысларӗҫ. Асилтеретпӗр, пӗрремӗш вырӑна (чӑваш тапхӑрӗнче) Илле Ивановӑн «Durak» калавӗ тухнӑ. Иккӗмӗш вырӑн Елена Мустаевӑн «Ҫылӑх» калавӗ йышӑннӑ, виҫҫӗмӗшӗ — Евгений Турханӑн «Лаша ӑҫта ҫухалнӑ?» калавӗ. Унччен эпир пӗлтернӗ тӑрӑх виҫҫӗмӗш вырӑна Анатолий Смолинӑн «Касу, е Хӗвел тымарӗ» калавӗ тухни пирки калаҫу пыратчӗ, анчах каярах ҫак хайлав маларах пичетленни пирки пӗлнӗ те ӑмӑртуран кӑларнӑ. Илле Ивановӑн «Durak» калавӗпе вара ҫитес вӑхӑтра («Салам» хаҫатра пичетленсе тухнӑ хыҫҫӑн) эсир пирӗн электронлӑ вулавӑшра паллашма пултаратӑр.

Кашкар Махмучӗ — Махмут ибн ал-Хусейн ибн Муххамад ал-Кашгари — 1008 ҫулта Кашкар хулинче ҫуралнӑ, 1101 е 1126 ҫулта вилнӗ. 2008 ҫулта ЮНЕСКО Еврази ҫыравҫисен пӗрлешӗвӗ сӗннипе Кашкар Махмучӗ 1000 ҫул тултарнине паллӑ тунӑ. Махмуд ал-Кашгарин паллӑ ӗҫӗ — «Тӗрӗк чӗлхисен пуххи» тӗрӗк энциклопедийӗ. Унта историпе культура, этнографи тата лингвистика материалӗсем кӗнӗ. Вӑл вунпӗрмӗш ӗмерти тӗрӗк халӑхӗсен авалхи ламсен нисеп хаклӑхӗсене тата тыткаларӑш виҫисене, ҫавӑн пекех тӗнче курӑмне кӑтартса паракан палӑк шутланать.

#чӑваш чӗлхи, #ЧПГӐИ, #чыславсем, #литература, #Турци, #конкурссем, #Чӗмпӗр, #Тутарстан